People & Culture
ᖃᐅᔨᓴᖅᑕᐅᓕᖅᑎᓪᓗᒍ ᐅᑭᐅᖅᑕᖅᑐᖅ, ᑲᓇᑕᒥ ᐅᓇᑕᖅᑐᒃᓴᖑᐊᑦ ᐅᖓᓯᓛᒧᑦ ᖃᐅᔨᓴᕆᐊᓕᓚᐅᖅᐳᑦ ᑕᐃᒪᖓᓂᑦ ᐱᒋᐊᖓᓚᐅᖅᓯᒪᓪᓗᑎᒃ − ᐊᖅᑯᓯᐅᖅᖢᑎᒃ ᓯᕗᒻᒧᑦ ᑲᓇᑕᒥ ᓴᐳᒻᒥᔨᐅᓪᓗᑎᒃ ᐊᒻᒪ ᐱᓕᕆᒻᒪᕆᒋᐊᖅᖢᑎᒃ ᐅᑭᐅᖅᑕᖅᑐᒥᐅᓄᑦ
ᓯᕿᓂᖅ ᓱᓕ ᓄᐃᓚᐅᖏᑎᓪᓗᒍ ᐅᖅᓱᖅᑑᖅ, ᓄᓇᕗᒥᐅᑦ ᓱᓕ ᓯᓂᒃᑎᓪᓗᒋᑦ ᐃᒃᑮᕐᓇᖅᑎᓪᓗᒍ ᒫᑦᓯᒥ ᐅᓪᓛᒻᒪᕆᒃᑯᑦ, ᑕᑯᒃᓴᐅᔪᖃᖅᐳᖅ ᐊᒥᓱᓂᒃ ᐃᓄᖕᓂᒃ ᐊᖅᑯᑎᒧᑦ. ᐊᓂᖅᓵᖅᑐᕐᓂᖏᓪᓗ ᑕᑯᒃᓴᐅᔪᑐᐊᖑᓪᓗᑎᒃ ᓯᑭᑑᖏᓪᓗ ᐳᔪᕐᓂᖏᑦ ᑕᑯᒃᓴᐅᔪᑐᐊᖑᓪᓗᑎᒃ, ᐅᓯᓕᖅᑐᐃᓕᖅᑎᓪᓗᒋᓪᓗ ᖃᒧᑎᒥᖕᓄᑦ ᓯᑭᑑᖏᑦᑕ ᑲᓕᔭᖏᓐᓂᒃ, ᐃᑭᑦᑐᖃᖅᐳᖅ ᓯᑭᑑᓂᒃ ᐊᐅᐸᖅᑐᓂᒡᓗ ᑕᑯᒃᓴᐅᓚᐅᐱᓪᓚᒃᑐᖃᖅᖢᓂ ᖁᓕᑦᑕᖏᓐᓂᒃ. ᖃᐅᒻᒪᖅᐸᓪᓕᐊᓕᖅᑎᓪᓗᒍ ᓇᓗᓇᖏᓕᖅᐳᖅ ᖃᓄᐃᓕᐅᕐᓂᖏᓐᓄᑦ.
ᑕᓕᖏᓐᓂ ᑎᑎᕋᖅᓯᒪᓪᓗᓂ Op Nanook-Nunalivut, ᑕᐃᒍᖅᑕᐅᒍᓯᖏᑦ ᐊᕐᕌᒍᑕᒫᖅᓯᐅᑎ ᐅᑭᐅᒃᑯᑦ ᐅᓇᑕᖅᑐᒃᓴᐃᑦ ᐱᓕᕆᓂᖏᓐᓄᑦ ᐆᒃᑐᕋᕐᓂᖏᓐᓄᑦ ᓯᕗᓕᖅᑎᖃᖅᖢᑎᒃ ᑲᓇᑕᒥ ᐅᓇᑕᖅᑐᒃᓴᒃᑯᓐᓂᒃ ᐅᑭᐅᖅᑕᖅᑐᒥ, ᐊᒻᒪ ᐃᒪᓐᓇ 1CRPG, ᑐᑭᓕᒃ ᐃᒪᓐᓇ ᓯᕗᓪᓕᖅᐹᒥ ᑲᓇᑕᒥ ᐅᓇᑕᖅᑐᒃᓴᖑᐊᑦ ᖃᐅᔨᓴᕐᓂᖏᑦ ᑎᒥᐅᔪᑦ − ᑕᒪᒃᑯᐊ ᐃᓚᐅᓪᓗᑎᒃ ᐅᓇᑕᖅᑐᒃᓴᖑᐊᑦ ᔪᑲᓐᒥᑦ, ᓄᓇᑦᓯᐊᒥ ᐊᒻᒪ ᓄᓇᕗᒥᑦ. ᐊᖕᒪᓗᖅᑐᒥᒃ ᓇᓗᓇᐃᒃᑯᑕᖃᖅᖢᑎᒃ ᑎᑎᕋᖅᓯᒪᓪᓗᓂ ᐊᒪᕈᖅᒪ ᐃᓄᒃᑎᑐᑦ ᑐᑭᖃᖅᖢᓂ ᐊᒪᕈᕐᒥᒃ.
ᑕᐃᒪᓐᓇ ᐊᒪᕈᕐᒥᒃ ᑕᐃᒍᖅᑕᐅᓪᓗᑎᒃ ᐊᑎᖃᖅᖢᑎᒃ ᐅᖓᓯᖕᓂᖃᖅᑐᒧᑦ 5,200-ᑭᓛᒥᑕᓂᒃ ᓯᑭᑑᒃᑯᑦ ᐊᐅᓪᓛᕐᓂᐊᖅᖢᑎᒃ ᖃᐅᔨᓴᕐᓗᑎᒃ ᐊᒻᒪ ᐱ ᒋᐊᕐᓗᑎᒃ ᕕᕗᐊᕆ ᕿᑎᐊᓂ ᐃᓄᕕᖕᒥᑦ, ᓄᓇᑦᓯᐊᒥ, ᑲᐃᕙᓪᓗᑎᒃ ᔪᑳᓐᒧᑦ, ᓯᒡᔭᒃᑯᑦ ᑲᓇᖕᓇᓕᐊᖅᑐᑦ ᐃᖏᕐᕋᓪᓗᑎᒃ Northwest Passageᖑᓂᕋᖅᑕᐅᔪᒃᑯᑦ, ᑕᒫᓃᓕᖅᐳᑦ. ᑕᒡᕙᖓᑦ, ᓂᒋᕐᒧᖓᐅᓂᐊᖅᖢᑎᒃ ᓯᒡᔭᖓᒍᑦ ᑕᓯᐅᔭᕐᔪᐊᑉ ᑎᑭᓐᓂᐊᖅᖢᑎᒃ ᑰ’ᔪᐊᒧᑦ, ᒫᓂᑑᐸᒥ.
ᖃᖓᑐᐃᓐᓇᒃᑯᑦ ᑖᒃᑯᐊ ᑲᑎᖓᓪᓗᑎᒃ ᐊᒥᓲᓂᖃᖃᑦᑕᖅᐳᑦ 12-ᖑᓪᓗᑎᒃ ᑲᓇᑕᒥ ᐅᓇᑕᖅᑐᒃᓴᖑᐊᑦ ᓯᑭᑑᒃᑯᑦ ᐃᖏᕐᕋᓪᓗᑎᒃ, ᐃᑲᔪᖅᑕᐅᓪᓗᑎᒃ 214-ᓄᑦ ᓇᓂᑐᐃᓐᓇᖅ ᐅᑭᐅᖅᑕᖅᑐᒥ ᖃᐅᔨᓴᖅᑕᐅᓪᓗᑎᒃ ᐃᖏᕐᕋᑎᓪᓗᒋᑦ. ᐊᖅᑯᓵᕐᓂᐊᖅᖢᑎᒡᓗ ᓄᓇᓕᖕᓄᑦ 17−ᓄᑦ, ᑖᒃᑯᐊᓗ ᓄᓇᓖᑦ ᓇᖕᒥᓂᖅ ᐅᓇᑕᖅᑐᒃᓴᖑᐊᖃᕆᓪᓗᑎᒃ ᐃᑲᔪᕐᓂᐊᖅᑐᑦ ᐅᖓᓯᒃᑐᒧᑦ ᐃᖏᕐᕋᑎᓪᓗᒋᑦ ᓄᓇᒃᑯᑦ, ᓯᑯᒃᑯᑦ ᖃᐅᔨᒪᔭᒥᑎᒍᑦ. ᐅᖓᓯᓛᖑᓂᐊᖅᐳᖅ ᐃᖏᕐᕋᓂᕆᓂᐊᖅᑕᖓᑦ ᑲᓇᑕᒥ ᐅᓇᑕᖅᑐᒃᓴᖑᐊᑦ−ᐃᑲᔪᖅᖢᑎᒃ ᐅᑭᐅᖅᑕᖅᑐᒥ ᓴᓐᖏᓂᖃᕐᕕᒋᔭᒥᖕᓂ ᓄᓇᒋᔭᒥᖕᓂ ᓇᖕᒥᓂᕆᔭᒥᖕᓂ ᑕᐃᒪᐃᓕᐅᖅᖢᑎᒃ ᓯᕗᓪᓕᐅᓪᓗᑎᒃ.
ᑖᒃᑯᐊ ᐅᓇᑕᖅᑐᒃᓴᖑᐊᑦ ᓯᕗᓪᓕᖅᐹᒥ ᑲᓇᑕᒥ ᐅᓇᑕᖅᑐᒃᓴᖑᐊᑦ ᖃᐅᔨᓴᕐᓂᖏᑦ ᑎᒥᐅᔪ, ᑕᐃᒪᓐᓇᑎᑐᑦ ᑕᓪᓕᒪᑎᑐᑦ ᐅᓇᑕᖅᑐᒃᓴᖑᐊᑎᑐᑦ ᑲᓇᑕᒥ, ᐃᓚᒋᔭᐅᕗᑦ ᑲᓇᑕᒥ ᐅᓇᑕᖅᑐᒃᓴᑎᑐᑦ ᓇᐅᑦᓯᐅᒪᒍᑎᐅᔪᑦ. ᑭᓯᐊᓂ ᑐᑭᓯᐅᒪᔭᐅᑦᓯᐊᖏᓚᑦ ᖃᓄᐃᓕᐅᓪᓚᑦᑖᖃᑦᑕᕐᒪᖔᑕ. “ᐃᓄᐃᑦ ᐃᓱᒪᖃᑦᑕᖅᐳᑦ ᐅᓇᑕᖅᑐᒃᓴᓪᓚᑦᑖᖑᖏᓐᓂᖏᓐᓄᑦ, ᑕᒪᓐᓇ ᓱᓕᖏᑦᖢᓂ, ᐅᕙᓘᓐᓃᑦ ᐃᓱᒪᒋᔭᐅᕙᒃᖢᑎᒃ ᐅᓇᑕᓪᓚᑦᑖᖃᑕᐅᖃᑦᑕᕐᓂᖏᓐᓄᑦ, ᑕᒪᓐᓇ ᓱᖏᓕᑭᓪᓗᓂ,” ᐅᖃᓚᐅᖅᐳᖅ ᓗᑕᓇᑦ ᑐᕌᕙᔅ ᕼᐃᓐᔅ, ᑲᒪᔨᒋᔭᐅᔪᖅ ᑖᒃᑯᓄᖓ 1CRPG. ᑭᓯᐊᓂ, ᕼᐃᓐᔅ ᐅᖃᓚᐅᖅᐳᖅ, ᑕᐃᒪᓐᓇ ᑖᒃᑯᐊ ᐊᔾᔨᒌᖏᑦᑐᑦ ᑖᒃᑯᓇᖓᑦ ᑲᑎᖓᓪᓗᑎᒃ: ᐅᓇᑕᓪᓚᕆᖃᑦᑕᖏᑦᖢᑎᒃ ᐋᖅᑭᒃᑕᐅᓯᒪᓪᓗᑎᒃ ᖃᓄᐃᓕᐅᖃᑦᑕᕐᓂᕐᒧᑦ ᐱᓕᕆᐊᕆᔭᖏᑦ ᒪᓕᒃᖢᒋᑦ ᐅᓗᕆᐊᓇᖅᑐᖃᓕᖅᐸᑦ ᐃᑲᔪᖅᑎᒃᓴᒫᖑᓪᓗᑎᒃ.
ᓯᕗᓪᓕᖅᐹᒥ ᓴᖅᑭᑕᐅᓚᐅᖅᓯᒪᓪᓗᑎᒃ ᐳᕆᑎᔅ ᑲᓚᑉᐱᐊᒥ ᑐᖏᓕᐊᓂ ᐅᓇᑕᕐᔪᐊᕐᓇᐅᑎᓪᓗᒍ, ᑖᕙᓂ ᓯᒡᔭᒥ ᐅᓇᑕᖅᑐᒃᓴᐅᓂᕋᖅᑕᐅᓪᓗᑎᒃ (ᑕᐃᑦᓱᒪᓂ ᑕᐃᒪᓐᓇ ᖃᐅᔨᒪᔭᐅᓚᐅᖅᓯᒪᓪᓗᑎᒃ) ᓴᐳᒻᒥᔨᐅᓚᐅᖅᓯᒪᓪᓗᑎᒃ ᓯᒡᔭᖓᓂ ᐃᓗᐊᓂᓗ ᐱᓕᕆᐊᖃᖅᑎᑕᐅᓪᓗᑎᒃ ᓴᐳᒻᒥᓂᕐᒧᑦ ᔭᐸᓃᓯᒃᑯᑦ ᑖᕗᖓᐅᔪᕕᓂᐅᒃᐸᑕ ᑕᐃᑦᓱᒪᓂ. ᐅᓇᑕᕐᔪᐊᕐᓇᖅ ᑐᖏᓕᐊᓂ ᐃᓱᓕᑎᓪᓗᒍ, ᐊᑐᖅᑕᐅᔪᓐᓃᓚᐅᖅᓯᒪᕗᑦ, ᑭᓯᐊᓂ ᒪᑭᑕᐅᓕᕆᓪᓗᑎᒃ ᐱᒋᐊᒃᑲᓐᓂᖅᑕᐅᓕᕆᓪᓗᑎᒃ ᑲᓇᑕᒥ ᐅᓇᑕᖅᑐᒃᓴᖑᐊᖑᑎᑕᐅᓪᓗᑎᒃ. ᑕᐃᒪᖓᓂᑦ ᖃᓄᐃᓕᐅᕈᓯᖏᑦ ᐊᓯᔾᔨᓚᐅᖅᓯᒪᖏᑦᖢᓂ.
ᐅᓇᑕᖅᑐᒃᓴᖑᐊᑦ ᐃᓚᒋᔭᐅᓯᒪᕗᑦ ᑲᓇᑕᒥ ᐅᓇᑕᖅᑐᒃᓴᓄᑦ ᖃᐅᔨᓴᖅᑎᐅᓪᓗᑎᒃ ᐃᔨᒋᔭᐅᓪᓗᑎᒃ ᑐᓴᖅᑎᑎᔨᐅᓪᓗᑎᒃ ᓯᐅᑎᒋᔭᐅᓪᓗᑎᒡᓗ ᐅᖓᓯᒃᑐᒥᐅᑕᐅᓪᓗᑎᒃ, ᓯᒡᔭᒥᐅᑕᐅᓪᓗᑎᒃ ᐊᒻᒪ ᐅᑭᐅᖅᑕᖅᑐᒥᐅᑕᐅᓪᓗᑎᒃ ᓄᓇᓕᖕᓂ.
ᐅᓇᑕᖅᑐᒃᓴᐅᖑᐊᑦ ᐃᔨᒋᔭᐅᓪᓗᑎᒃ ᓯᐅᑎᒋᔭᐅᓪᓗᑎᒡᓗ ᐅᖓᓯᒃᑐᒥᐅᑕᐅᓪᓗᑎᒃ, ᓯᒡᔭᒥᐅᑕᐅᓪᓗᑎᒃ ᐅᑭᐅᖅᑕᖅᑐᒥᐅᖑᓪᓗᑎᒡᓗ ᓄᓇᓕᖕᓂᒥᐅᑦ − ᑕᐃᒪᓐᓇ ᐱᓕᕆᔨᐅᓪᓗᑎᒃ ᖃᓄᐃᓕᐅᕐᓂᐊᕐᓂᕋᐅᑎᖃᖅᖢᑎᒃ ᐃᒪᓐᓇ, “Vigilans,” ᑖᓐᓇ ᐅᖃᐅᓯᖅᑕᖅ ᑐᑭᖃᖅᖢᓂ “ᖃᐅᔨᓴᖅᑎᑦ ᐅᐊᑦᓯᔨᑦ” ᓛᑕᓐᑎᑐᑦ. ᖃᐅᔨᓴᖃᑦᑕᖅᖢᑎᒃ ᐊᐅᓪᓛᖅᖢᑎᒃᒪ ᐃᒥᖃᑦᑕᖅᖢᑎᒃ ᐸᖅᓴᐃᔨᐅᓪᓗᑎᒃ ᐊᓐᓇᐃᔨᐅᓪᓗᑎᒡᓗ, ᐅᖃᐅᓯᖃᖃᑦᑕᖅᖢᑎᒡᓗ ᐊᔾᔨᐅᖏᑦᑐᒥᒃ ᑕᑯᒑᖓᒥᒃ ᖃᓄᐃᓕᐅᕈᑕᐅᔪᓂᒃ ᓱᓇᑐᐃᓐᓇᕐᓂᒡᓗ ᓱᖏᐅᑎᔭᐅᓯᒪᖏᑦᑐᓂᒃ, ᑲᑎᖅᓱᐃᔨᐅᓪᓗᑎᒃ ᓄᓇᓕᖕᓂ ᑐᑭᓯᒋᐊᕈᑎᒃᓴᓂᒃ ᐅᓇᑕᖅᑐᒃᓴᓄᐊᖓᔪᓂᒃ ᖃᐅᔨᒪᑎᒋᔭᐅᓪᓗᑎᒡᓗ ᐃᓕᓐᓂᐊᖅᑎᑎᔨᐅᓪᓗᑎᒡᓗ ᐅᓇᑕᖅᑐᒃᓴᓄᑦ ᑕᐃᒪᓐᓇ ᐱᒋᐊᖃᕈᑎᒃ − ᐱᓕᕆᐊᖃᖅᐸᒃᖢᑎᒃ ᖃᓄᑐᐃᓐᓇᖅ ᑐᒥᒋᔭᐅᓪᓗᑎᒃ ᐅᑭᐅᖅᑕᖅᑐᒥ ᐊᕙᑎᒥᐅᑕᓂ ᓄᓇᓕᖕᓂᓗ ᐅᓇᑕᖅᑐᒃᓴᐃᑦ ᐱᓕᕆᐊᖏᑦᑕ ᓴᓂᐊᒍᑦ. ᑲᓇᑕᒥ, ᐊᒥᓲᓂᖃᖅᖢᑎᒃ ᐃᒻᒪ 5,000 ᑲᓴᐅᓪᓗᑎᒃ. ᓄᓇᖃᖅᖢᑎᒡᓗ 200 ᐅᖓᑖᓂ ᓄᓇᓕᖕᓂ ᐅᖃᐅᓯᖃᖅᖢᑎᒡᓗ 26-ᓂᒃ ᐊᔾᔨᒌᖏᑦᑐᓂᒃ ᐅᖃᐅᓯᑐᖃᒥᖕᓂᒃ.
ᐅᑭᐅᒃᑯᑦ ᐊᓐᓄᕌᕆᖃᑦᑕᖅᑕᑦ ᖃᑯᖅᑕᐅᕗᑦ ᑖᒃᑯᐊ ᐊᔪᖏᓴᖅᑐᑦ ᐃᖃᓗᒃᑑᑦᓯᐊᒥᐅᑕᐃᑦ, ᐃᓚᒋᔭᐅᖃᑕᐅᓪᓗᑎᒃ ᑖᒃᑯᓄᖓ Operation Nanook-Nunalivut−ᑯᓐᓄᑦ, ᐅᓇᑕᖅᑐᒃᓴᖑᐊᖏᑦ ᐊᓐᓄᕌᖅᓯᒪᖃᑦᑕᖅᐳᑦ ᓇᓗᓇᐃᒃᑯᑕᖃᖅᖢᑎᒃ ᐊᐅᐸᖅᑐᓂᒃ ᓇᓴᖃᖅᖢᑎᒃ ᑎᖅᑭᐊᓕᖕᓂᒃ ᐊᒻᒪ ᖁᓕᑦᑕᐅᔭᖑᐊᓂᒃ ᓇᓴᖃᖅᑐᓂᒃ ᐊᐅᐸᖅᑐᓂᒃ ᔭᐃᑲᖃᖅᖢᑎᒃ, ᐆᔭᐅᔭᕐᓂᒃ ᖃᕐᓕᖃᖅᖢᑎᒃ. “ᐃᔨᖅᓯᒪᖏᑦᑐᒍᑦ,” ᐅᖃᓚᐅᖅᐳᖅ ᕼᐊᐃᓐᔅ. “ᖃᐅᔨᒪᑎᑎᒍᒪᓪᓚᕆᒃᐳᒍᑦ ᐊᒃᓱᐊᓗᒃ ᐅᓇᑕᖅᑐᒃᓴᕗᑦ ᐃᑲᔪᕋᓱᐊᕐᓂᖏᓐᓄᑦ…. ᐃᓗᖏᖅᑐᖅᖢᑎᒃ.”
ᐊᒻᒪ ᐊᑕᐅᑦᓯᒃᑯᑦ, ᐱᕙᓪᓕᐊᓪᓗᑕ ᖁᒻᒧᑦ ᐊᒻᒧᓪᓗ ᑐᑭᖃᖅᖢᓂ ᑕᐅᖅᓰᔪᓐᓇᖅᖢᑎᒃ ᐊᓐᓄᕌᒥᖕᓂᒃ ᐅᓇᑕᖅᑐᒃᓴᓪᓚᕆᐅᓂᕐᒧᑦ ᑕᐃᒪᓐᓇ ᐱᒋᐊᖃᕈᑎᒃ.
ᑕᐃᒪᓪᓇ ᐊᔾᔨᒌᓂᒃ ᐊᓐᓄᕌᖃᕋᓗᐊᖅᖢᑎᒃ, ᕼᐃᓐᔅ ᐅᖃᓚᐅᖅᐳᖅ, ᐃᓄᑐᐃᓐᓇᐅᓪᓗᑎᒃ, ᐊᒥᓱᑦ ᐅᓇᑕᖅᑐᒃᓴᖑᐊᑦ ᐊᔾᔨᒌᖏᑦᓯᐊᖅᐳᑦ. “ᐃᓚᖏᑦ ᓗᐃᔪᖑᓪᓗᑎᒃ. ᐃᓚᖏᓪᓗ ᐃᓕᓐᓂᐊᖅᑎᑎᔨᐅᓪᓗᑎᒃ. ᐃᓚᖏᓪᓗ ᐃᓄᑐᐃᓐᓇᐃᑦ… ᐃᓅᓯᓕᒫᒥᖕᓂ ᒥᑭᒋᐊᕐᓂᐅᖅᑎᐅᓯᒪᓕᓗᑎᒃ,” ᑕᐃᒪᓐᓇ ᐅᖃᓚᐅᖅᐳᖅ. “ᑕᐃᒪᓐᓇᐃᑦᑐᓂᒃ ᑕᑯᓚᐅᖅᓯᒪᖏᑉᐳᖓ ᐊᓯᖏᓐᓂᒃ, ᑲᑎᓯᒪᔪᓂᒃ ᑎᒥᐅᔪᒥᒃ (ᐊᒻᒪ) ᐊᑭᓕᖅᑐᖅᑕᐅᖏᑦᖢᑎᒃ ᐱᓕᕆᔪᓂᒃ.”
ᑕᐃᒪᓐᓇ ᐅᑭᐅᖅᑕᖅᑐᒥᐅᑕᐅᓪᓗᑎᒃ ᐊᓐᓄᕌᖃᖅᖢᑎᒡᓗ ᐊᔾᔨᒌᓂᒃ, ᐃᓚᒋᔭᐅᔪᑦ ᑖᒃᑯᓄᖓ 1CRPG−ᑯᓐᓄᑦ “ᐊᔪᖏᑦᓯᐊᖅᐳᑦ ᐃᓕᓐᓂᐊᖅᓯᒪᑦᓯᐊᖅᐳᓪᓗ ᐅᓇᑕᖅᑐᒃᓴᐃᑦ ᐃᓕᓐᓂᐊᖅᓯᒪᒍᑎᖏᓂᒃ” ᐅᖃᓚᐅᖅᐳᖅ ᕼᐃᓐᔅ. “ᐊᓐᓇᐅᒪᔪᓐᓇᖅᐳᑦ ᓄᓇᒥ, ᖁᑭᐊᒍᓐᓇᖅᖢᑎᒡᓗ, ᓯᑭᑑᓂᒃ ᐊᑐᕈᓐᓇᖅᖢᑎᒡᓗ, ᓄᓇᓯᐅᑎᓂᒡᓗ ᒪᓂᖏᑦᑐᖅᓯᐅᑎᓂᒃ, ᖃᔭᕆᐊᓂᒡᓗ.”
ᐊᔾᔨᒌᖏᓐᓂᖏᓪᓗ ᐅᓇᑕᖅᑐᒃᓴᖑᐊᑦ ᐱᔾᔪᑎᖃᖅᐳᖅ ᐅᑭᐅᖅᑕᖅᑐᒥᐅᑦ ᓄᓇᓕᖏᓐᓂᖔᕐᓂᖏᑦ ᓇᓂᒥᐅᑕᐅᓂᖏᑦ. “ᐅᐱᓐᓇᒻᒪᕆᒃᐳᖅ ᐊᔾᔨᒌᖏᓐᓂᕆᔭᖏᑦ ᐅᓇᑕᖅᑐᒃᓴᖑᐊᑦ ᐃᓄᒋᐊᖏᓐᓂᖅᓴᒥᐅᑕᐃᑦ ᓄᓇᓂᑦ ᐊᖏᓂᖅᓴᒥᐅᑕᐅᔪᓂᑦ,” ᐅᖃᓚᐅᖅᐳᖅ ᒪᔭ ᐳᐊᕆᐄ, ᐅᓇᑕᖅᑐᒃᓴᖑᐊᖑᖃᑕᐅᔪᖅ ᕙᐃᑦᕼᐅᐊᔅᒥᐅᑕᖅ ᐃᓚᓕᐅᑎᓚᐅᖅᑐᖅ ᐸᐅᓚᑑᒥᑦ, ᓄᓇᑦᓯᐊᒥᑦ. “ᕙᐃᑦᕼᐃᐊᔅᒥ, ᑕᐃᒪᐃᑦᑑᖃᑕᐅᖏᒃᑯᕕᑦ ᓄᓇᓕᖕᓂ ᐅᕙᓘᓐᓃᑦ ᐱᖃᓐᓇᖃᖏᒃᑯᕕᑦ ᐅᓇᑕᖅᑐᒃᓴᖑᐊᖑᖃᑕᐅᔪᒥᒃ … ᖃᐅᔨᒪᒐᔭᖏᑉᐳᑎᑦ ᓱᓇᐅᓂᖏᓐᓄᑦ ᐅᕙᓘᓐᓃᑦ ᖃᐅᔨᒪᐸᓗᒐᔭᖏᑉᐳᑎᑦ ᖃᓄᐃᓕᐅᖅᑎᐅᓂᖏᓐᓄᑦ, ᓄᓇᓕᐊᓛᒧᐊᕈᕕᑦ, (ᑖᒃᑯᐊ) ᓄᓇᓕᐊᓛᑦ ᐅᓇᑕᖅᑐᒃᓴᖑᐊᖑᖃᑕᐅᕕᐅᑦᓯᐊᕐᒪᑕ ᐊᒥᓱᓄᑦ.”
ᑕᒪᒃᑯᐊ ᐅᓇᑕᖅᑐᒃᓴᖑᐊᖑᖃᑕᐅᔪᑦ ᐱᓕᕆᓕᕌᖓᒥᒃ ᐱᖃᓐᓇᕆᔭᒥᓄᑦ ᐃᓚᒥᓄᓪᓗ ᑲᑎᖃᑦᑕᖅᐳᑦ ᐃᓚᖏᓐᓂ ᓄᓇᓕᖕᓂ ᐊᖅᑯᓵᖅᑕᒥᖕᓂ, ᐊᓯᖏᓪᓗ, ᓲᕐᓗ ᐳᐊᕆᐄᑎᑐᑦ, ᑲᑎᖃᑎᖃᕐᓂᖅ ᐊᐅᐸᖅᑑᖃᑎᒥᖕᓂᒃ ᐊᔾᔨᐅᖏᑦᑐᒥᒃ ᐃᒃᐱᖕᓇᓲᖑᕗᖅ. “ᑲᑎᑦᓯᓗᓂ ᐅᓇᑕᖅᑐᒃᓴᖑᐊᖃᑎᒥᒃ, ᐃᕿᖃᑦᑕᐅᑎᓗᓂᓗ ᐱᓐᓇᖅᐳᖅ,” ᐅᖃᓚᐅᖅᐳᖅ ᑕᐃᒪᓐᓇ. “ᑕᐃᒪᓐᓇ ᐃᓚᒌᒃᑑᔮᕐᓇᕐᒪᑦ ᑲᑐᔾᔨᖃᑎᒌᖑᖃᑎᖕᓂᒃ ᑲᑎᑦᓯᓪᓗᓂ.”
ᕼᐃᔅᒧᓪᓕ, ᑕᐃᒪᓐᓇ ᐃᓚᒌᑦ ᓲᕐᓗ ᖃᓂᒌᒃᖢᑎᒃ, ᑕᐃᒪᓐᓇ ᐱᓕᕆᖃᑎᒌᑦᓯᐊᕈᓐᓇᕐᓂᖃᖅᐳᑦ. “ᑕᐃᒪᓐᓇᐃᖏᓐᓂᕈᑦᑕ ᐃᓚᒌᖏᓐᓂᕈᑦᑕ, ᐅᑭᐅᖅᑕᖅᑐᖅ ᒪᑭᑲᐅᑎᒋᔪᓐᓇᕐᓂᖃᕋᔭᖏᑉᐳᖅ.”
ᐊᒪᕈᖅ ᐊᖏᓂᖅᓴᐅᓪᓗᓂ ᓇᓄᕐᒥᒃ ᑕᐃᒍᖅᑕᐅᔪᓂ ᐅᓇᑕᖅᑐᒃᓴᖑᐊᓂ ᐱᓕᕆᕗᑦ ᐃᓚᐅᔪᑦ ᐊᒥᓲᓂᖃᖅᖢᑎᒃ 1,300 ᑲᓇᑕᒥ ᐅᓇᑕᖅᑐᒃᓴᖑᐊᓂᒃ ᐊᒻᒪ ᑲᓇᑕᒥᐅᑕᐅᖏᑦᑐᓂᒃ − ᑕᐃᒪᓐᓇᓗ ᑕᒪᒃᑯᐊ ᖃᓪᓗᓈᑦ ᓄᓇᖓᓐᓂᒥᐅᑕᐃᑦ ᐅᓇᑕᖅᑐᒃᓴᐃᑦ ᖃᐅᔨᒪᓂᖅᓴᐅᓕᖁᓪᓗᒋᑦ ᐅᑭᐅᖅᑕᖅᑐᒥᒃ, ᖃᐅᔨᒪᕙᓪᓕᐊᖁᓪᓗᒋᑦ ᖃᓄᐃᖃᑦᑕᕐᓂᖓᓄᑦ ᐃᓕᓐᓂᐊᕐᓗᑎᒡᓗ ᐅᑭᐅᖅᑕᖅᑐᒥᐅᑦ ᖃᐅᔨᒪᔭᖏᓐᓂᒃ ᖃᐅᔨᒪᔨᖃᖅᖢᑎᒃ, ᐊᒻᒪ ᖃᐅᔨᒪᓂᖅᓴᐅᓕᖁᓪᓗᒋᑦ ᖃᓄᐃᓕᐅᕈᓯᐅᔪᓂᒃ ᐅᑭᐅᖅᑕᖅᑐᒥ. ᐊᒻᒪ ᕕᑦᓂ ᓚᑭᓐᐸᐅᕙ, ᖃᐅᔨᒪᑎᒋᔭᐅᔪᖅ ᐅᑭᐅᖅᑕᖅᑐᒥ ᖃᓄᐃᓕᐅᕈᑕᐅᓯᒪᔪᓂᒃ ᑕᐃᑦᓱᒪᓂᑐᖃᖅ ᐅᑭᐅᖅᑕᖅᑐᒥᓗ ᐊᑐᐊᒐᕐᓂᒃ ᑕᐃᑲᓂ ᓯᓚᑦᑐᖅᓴᕐᕕᒡᔪᐊᖓᓂ Trent University, ᐅᖃᓚᐅᖅᐳᖅ ᑕᒪᒃᑯᐊ ᐊᖏᔪᑦ ᐃᓕᓐᓂᐊᕈᑕᐅᖃᑦᑕᖅᑐᑦ ᐊᓯᖏᓐᓂ ᑲᓇᑕᒥᐅᑕᐅᖏᑦᑐᑦ ᖃᐅᔨᕚᓪᓕᖁᓪᓗᒋᑦ ᑲᓇᑕᒥᐅᑦ ᑕᐃᒪᓐᓇ ᐅᓇᑕᕐᓂᕐᒧᑦ ᐱᒋᐊᕈᑎᖃᕈᓐᓇᕐᒪᑕ ᐅᑭᐅᖅᑕᖅᑐᒥ − ᐊᒻᒪ ᑕᒪᒃᑯᐊ ᐃᓕᓐᓂᐊᖅᓯᒪᒍᑎᒋᓕᖅᑕᖏᑦ ᓄᒃᑎᖅᑕᐅᔪᓐᓇᕐᒪᑕ ᐊᓯᖏᓐᓂ ᓄᓇᓕᐅᔪᓂ, ᑲᓇᑕᒥ ᓯᓚᕐᔪᐊᒥᓗ.
ᓯᑯᐃᑦ ᒪᓂᕋᐅᖏᑦᑐᑦ ᑕᕆᐅᒥ ᑕᒫᓂ Rae Strait−ᒥ ᐊᑯᓐᓂᖓᓂ ᐅᖅᓱᖅᑑᑉ ᐊᒻᒪ ᐃᑎᕐᓕᐅᑉ ᓱᒃᑲᐃᓗᑕᐅᕗᖅ ᐃᒻᒪᖃ 30 ᑭᓚᒥᑕᓄᑦ ᐃᑲᕋᒧᑦ. ᓄᖅᑲᓚᐅᐱᓪᓚᖃᑦᑕᖅᖢᑎᒡᓗ ᐃᖏᕐᕋᔪᑦ, ᐆᓇᖅᑐᒥᒃ ᐃᒥᖅᐸᒃᖢᑎᒃ ᓂᕆᐊᕐᔪᒃᐸᒃᖢᑎᒡᓗ, ᖁᐃᔭᖅᑐᖅᐸᒃᖢᑎᒡᓗ ᖃᐅᔨᓴᖃᑦᑕᖅᖢᑎᒡᓗ ᐃᖏᕐᕋᖃᑎᒥᖕᓂᒃ ᓯᑭᑑᓂᒡᓗ ᖃᓄᐃᖏᒃᑲᓗᐊᕐᒪᖔᑕ. ᑭᓛᒥᑕᐃᑦ ᐃᑲᕋᐃᓪᓗ ᐊᓂᒍᖅᐸᓪᓕᐊᑎᓪᓗᒋᑦ, ᑕᐃᒪᓐᓇᐃᓕᐅᖏᓐᓇᖃᑦᑕᖅᖢᑎᒃ ᖃᑯᑎᒃᑯᑦ ᖃᐅᔨᓴᖃᑦᑕᐅᑎᑉᓗᑎᒃ.
ᑕᒡᕙᓂ ᐅᓪᓗᑦᓴᐃᓐᓇᒥ ᓄᖅᑲᓚᐅᐱᓪᓚᒃᓯᒪᑎᓪᓗᒋᑦ ᐅᓐᓂᓴᒃᑯᑦ, ᑕᑯᓚᐅᖅᐳᑦ ᓱᓇᒥᑭᐊᖅ ᖃᐅᔨᒪᖏᑕᒥᖕᓂᒃ ᖃᖁᖅᑐᒥᒃ, ᐳᖅᑐᓪᓗᓂ ᐊᖏᔪᖅ ᓯᕗᓂᖓᓐᓂ ᐅᖓᓯᒃᑐᒥ, ᕿᓪᓕᖅᑕᐅᓪᓗᓂ ᑕᑭᔪᐊᓘᓐᓗᓂᓗ ᖁᒻᒧᑦ ᓲᕐᓗ ᑕᕐᕆᔭᐅᑎᑎᑐᑦ ᓱᓇᐅᓂᖓ ᖃᐅᔨᒪᔭᐅᖏᑦᖢᓂ ᐱᓐᖑᐊᖑᔮᖅᖢᓂᓗ. ᐃᑲᕋᖅ ᐊᕝᕙᓪᓗᐊᖓᓂ ᐃᖏᕐᕋᓚᐅᖅᖢᑎᒃ, ᓇᓗᓇᕈᓐᓃᓚᐅᖅᐳᖅ ᓱᓇᐅᓂᖓᓄᑦ, ᑕᐃᒪᓐᓇ ᐳᖅᑐᔫᓪᓗᓂ ᐱᓐᖑᐊᖑᔫᔮᓪᓚᕆᒃᖢᓂ, ᑭᓯᐊᓂ ᑕᕐᕆᔭᐅᑎᑎᑑᖏᑦᑐᖅ ᐱᓪᓚᕆᐅᓪᓗᓂ. ᐊᐳᑎᖃᖅᖢᓂ ᖄᖓᒍᑦ ᓴᓇᓯᒪᔪᖅ ᖃᑯᖅᑕᐅᓪᓗᓂ ᐊᖏᔪᖅ ᐊᖕᒪᓗᖅᑐᖅ ᐊᖅᓴᐅᔮᖅᖢᓂ, ᒪᕐᕉᖕᓄᑦ ᑕᐃᒪᐃᑦᑐᑲᓴᖕᓄᑦ ᐊᕙᓗᔭᐅᓯᒪᓪᓗᓂ ᐊᓯᖏᓪᓗ ᒥᑭᓂᖅᓴᐅᓪᓗᑎᒃ ᓴᓂᐊᓂ: ᐊᓱ ᑑᓚᐃᓐ ᐅᓇᑕᖅᑐᒃᓴᓄᑦ ᖃᐅᔨᓴᕈᑦ.
ᐅᑭᐅᖅᑕᖅᑐᒥ ᐅᓇᑕᖅᑐᒃᓴᓄᑦ ᖃᐅᔨᓴᕈᑦ ᑑᓚᐃᓐ ᑕᒪᒃᑯᐊ ᐱᓕᕆᐊᕆᔭᐅᕕᐅᓪᓗᑎᒃ ᐊᒥᐊᓕᑲᓄᓪᓗ−ᑲᓇᑕᒥᐅᑕᓄᓪᓗ ᖃᐅᔨᓴᕈᑎᑦ 47-ᖑᓪᓗᑎᒃ ᐅᑭᐅᖅᑕᖅᑑᑉ ᐃᒪᖓᑕ ᓴᓂᐊᓂ. ᑕᐃᒪᓐᓇ, ᓯᓚᒥᐅᑕᐃᑦ ᖃᖓᑕᔫᓂᒃ ᖃᐅᔨᓴᕈᑎᑦ ᑲᓇᑕᒥ ᐅᖓᓯᒃᑐᒥ, ᖃᐅᔨᓴᕈᑕᐅᓪᓗᑎᒃ ᓯᓚᒥᐅᑕᓂᒃ ᐅᐊᑦᓯᒍᑕᐅᓪᓗᑎᒃ ᖃᐅᔨᓴᕈᑕᐅᓪᓗᑎᒃ ᖃᖓᑕᔫᓂᒃ.
ᑕᐃᒪᓐᓇᑎᑐᑦ ᓚᑭᓐᐸᐅᕙᑎᑐᑦ, ᐅᓇᑕᖅᑐᒃᓴᖑᐊᑐᖃᐅᓪᓗᓂ ᐃᓚᒋᔭᐅᖃᑕᐅᓚᐅᖅᑐᖅ ᐃᓚᖓᓂ ᐃᖏᕐᕋᔭᒃᑎᓪᓗᒋᑦ ᐅᓇᑕᖅᑐᒃᓴᖑᐊᑦ ᐊᒪᕈᒃᑯᑦ, ᑕᐃᒪᓐᓇᐃᑦᑐᑦ ᖃᐅᔨᓴᕐᕖᑦ − ᐊᒻᒪ ᐅᓇᑕᖅᑐᒃᓴᖑᐊᓂᒃ ᑕᑯᔪᖃᕌᖓᑦ ᐊᓯᖏᓐᓂᒡᓗ ᐅᓇᑕᖅᑐᒃᓴᓪᓚᕆᖕᓂᒃ − ᐆᒃᑑᑎᒋᔭᐅᔪᓐᓇᖅᐳᑦ ᑕᐃᒪᓐᓇ ᐅᖃᐅᓯᕆᔭᐅᕙᒃᑐᓄᑦ ᑕᑯᒐᔪᒃᑕᒥᓂᒃ. “ᑕᐃᒪ ᓱᓕᖏᑦᑐᒥᒃ ᖄᖅᑎᑎᔪᓐᓇᕈᒪ, ᑕᐃᒪ ᐃᓱᒪᒃᑯᑦ ᓴᐳᒻᒥᔭᐅᖏᑦᑐᒥᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ,” ᑕᐃᒪᓐᓇ ᐅᖃᓚᐅᖅᐳᖅ. “ᑕᐃᒪᓐᓇ ᓱᓕᖏᑦᑐᓂᒃ ᓲᕐᓗ ᐅᖃᐅᓯᖃᕐᓂᖅ ᑕᐅᑦᑐᒃᑯᑦ ᐅᓗᕆᐊᓇᖅᑐᒦᑉᐳᒍᑦ, ᑭᓯᐊᓂ ᑭᒡᒐᖅᑐᖅᑎᐅᖏᑦᑑᔮᖅᐳᑦ ᐱᓪᓚᕆᐅᔪᓂᒃ ᓄᓇᒥ ᑐᓐᖓᓪᓗᑎᒃ.”
ᑕᒪᒃᑯᐊ ᐅᖃᐅᓯᑦ, ᐃᓚᐅᑎᑕᐅᓪᓗᑎᒃ ᕋᓴ ᐅᕙᓘᓐᓃᑦ ᓴᐃᓃᓯᒃᑯᑦ ᐅᓇᑕᑐᐃᓐᓇᕆᐊᖃᕐᓂᖏᓐᓄᑦ ᑲᓇᑕᒥᐅᑦ ᐅᑭᐅᖅᑕᖅᑐᒥᐅᑕᖏᓐᓂᒃ, “ᓱᓕᖏᓚᑦ” ᓚᑭᓐᐸᐅᕙᒧᑦ. ᑭᓯᐊᓂ ᐅᖃᓚᐅᕆᓪᓗᓂ ᑕᐃᒪᓐᓇ ᐅᓇᑕᕐᓂᐊᖏᒻᒪᑕᑎᑐᑦ ᐅᑭᐅᖅᑕᖅᑐᒥᐅᓂᒃ ᐊᓯᖏᑦ ᐱᑕᖃᑐᐃᓐᓇᕆᐊᖃᖅᐳᑦ ᓱᓕᔪᑦ. ᐅᓪᓗᒥᐅᓕᖅᑐᖅ, ᑲᓇᑕ, ᑕᐃᒪᓐᓇᑎᑐᑦ ᓯᓚᕐᔪᐊᒥᐅᖃᑎᑦᑎᑐᑦ, ᖃᐅᔨᒪᖏᒻᒪᑕ ᖃᓄᐃᑕᐅᑐᐃᓐᓇᕆᐊᖃᕐᓂᕐᒥᖕᓄᑦ ᓇᑭᑐᐃᓐᓇᖅ. “ᑕᐃᒪ ᐅᑭᐅᖅᑕᖅᑐᖅ ᐃᓱᒫᓗᒋᔭᐅᓗᐊᖑᐊᓕᖅᐳᖅ, ᑲᓇᑕᒥ ᓴᐳᒻᒥᔭᐅᒋᐊᖃᕐᓂᖓᓄᑦ, ᑎᑭᑕᐅᑲᐅᑎᒋᔪᓐᓇᖅᓯᖕᒪᑕ ᓇᑭᑐᐃᓐᓇᖅ.”
ᓯᕿᓐᓂᕐᓂᖅ ᓂᐱᖅᐸᓪᓕᐊᓕᖅᑎᓪᓗᒍ, ᑕᑯᒃᓴᐅᓕᖅᐳᑦ ᓯᑭᑑᑦ ᐅᖓᓯᒃᑐᒥᑦ ᖃᐃᔪᑦ. ᑰᕌᕐᕈᕐᒥᐅᑦ ᐅᓇᑕᖅᑐᒃᓴᖑᐊᖏᑦ ᓯᕗᓕᖅᑎᖃᖅᖢᑎᒃ ᓚᐃᓄ ᑎᒡᕙᕆᐊᒥᒃ, 2 ᓯᑑᔅᒥᒃ ᐊᐅᓚᐅᑎᖃᖅᑐᒥᒃ ᓯᑭᑑᒥᒃ ᐊᑐᖅᖢᓂ ᐋᒃᑎᒃ ᑳᑦ T570−ᒥᒃ, ᓇᓗᓇᐃᒃᑯᑕᖃᖅᖢᓂᓗ ᓴᐃᒻᒪᑎᖃᖅᖢᓂ ᐊᐅᓚᕈᑎᖃᖅᖢᓂ ᑲᓇᑕᐅᑉ ᐱᖓᓂᒃ ᑎᐱᖃᖅᖢᓂᓗ ᐳᔪᖓᓂᒃ ᓯᑭᑑᑉ ᐃᖏᕐᕋᕗᑦ. ᑕᐃᒪᓐᓇ ᐅᖓᓯᒃᑐᒧᐊᖃᑕᐅᖏᑦᖢᓂ, ᑖᒃᑯᐊ ᓇᖕᒥᓂᖅ ᓯᑭᑑᒥᖕᓂᒃ ᐊᑐᖃᑦᑕᖅᐳᑦ, ᒪᓂᕋᐅᖏᑦᑐᒃᑯᓪᓗ ᓄᓇᓯᐅᑎᓂᒃ ᐊᑐᖃᑦᑕᖅᖢᑎᒃ ᓇᖕᒥᓂᕆᔭᒥᖕᓂᒃ, ᖃᒧᑎᓂᒡᓗ ᐊᓯᖏᓐᓂᒡᓗ ᐊᑐᕆᐊᖃᖅᑕᒥᓂᒃ ᓇᖕᒥᓂᕆᔭᒥᖕᓂᒃ ᐊᑐᖃᑦᑕᖅᐳᑦ ᐅᖓᓯᒃᑐᒧᖓᐅᓂᐊᖏᑉᐸᑕ. (ᓇᖕᒥᓂᖅ ᐱᒥᖕᓂᒃ ᐊᑐᖅᐸᑕ ᐅᑎᕐᕕᐅᖃᑦᑕᖅᖢᑎᒃ ᑮᓇᐅᔭᑎᒍᑦ).
ᐃᕿᖃᑦᑕᐅᑎᓚᐅᖅᖢᑎᒃ ᑎᒎᑎᖃᑦᑕᐅᑎᓚᐅᖅᖢᑎᒡᓗ, ᑖᒃᑯᐊ ᒪᕐᕈᐃᓕᖓᔪᑦ ᑎᒥᐅᔪᑦ ᐅᓪᓛᒃᑯᑦ ᖃᓄᐃᓕᐅᕐᓂᐊᕐᓂᕐᒥᖕᓄᑦ ᐅᖃᓪᓚᐅᑎᓚᐅᖅᐳᑦ ᐸᕐᓇᓚᐅᖅᐳᑦ ᖃᓄᐃᓕᐅᕐᓂᐊᕐᓂᕐᒧᑦ. ᑕᐃᒪᓐᓇᐃᓕᐅᓚᐅᖅᖢᑎᒃ, ᑎᒡᕙᕆᐊᒃ ᐊᒻᒪᓗ ᐃᓚᖏᑦ ᐱᖃᑎᒋᓪᓗᒋᑦ ᓯᑭᑑᒥᖕᓄᑦ ᐃᑭᓪᓗᑎᒃ ᓄᓇᓕᐊᓛᒧᖓᐅᓕᖅᐳᑦ ᐃᒡᓗᐊᓛᓄᑦ, ᓯᓂᒃᑕᕆᐊᖅᑐᖅᖢᑎᒃ. ᐊᒻᒪ, ᑖᒃᑯᐊ ᐅᖓᓯᒃᑐᒥᖔᐋᖅᑐᑦ ᓯᑭᑑᒥᖕᓂᒃ ᐃᖏᕐᕋᓯᕗᑦ ᐅᓇᑕᖅᑐᒃᓴᐃᑦ ᑎᖕᒥᓲᓂᒃ ᖃᐅᔨᓴᕐᕕᖏᑦᑕ ᐊᕙᓗᖏᑦᑎᒎᖅᖢᑎᒃ ᒪᓂᕋᐅᓂᖅᓴᒧᐊᖅᖢᑎᒃ ᐃᖏᕐᕋᓯᒃᑲᓐᓂᖅᐳᑦ ᓯᓂᒃᑕᕐᕕᒋᓂᐊᖅᑕᒥᖕᓄᑦ ᐅᐸᒃᖢᑎᒃ. ᑕᐃᒪ, ᑐᐱᖅᖢᑎᒃ ᖁᓪᓕᕐᒥᖕᓂᒡᓗ ᐃᑭᑦᓯᑉᓗᑎᒃ ᑐᐱᖏᑦᑕ ᐃᓗᐊᓂ ᓯᓚᒥ ᐃᒃᑮᕐᓇᖅᑎᓪᓗᒍ.
ᐅᓪᓛᒃᑯᑦ ᓂᒡᓕᓇᕐᓂᖅᓴᐅᓪᓗᓂ -48 ᓂᒡᓕᓇᕐᓂᖃᖅᖢᓂ ᓯᑭᑑᑉ ᓂᒡᓚᓱᖕᓂᖓᓂᒃ ᓯᓚᐅᑉ ᖃᐅᔨᓴᕈᑎᖓᓂ. ᐊᓄᕆᓪᓗᓂᓗ, ᐃᓚᖏᑦ ᓯᑭᑑᑉ ᐃᖏᕐᕋᔾᔭᒍᓐᓇᖃᑦᑕᖏᑉᐳᑦ ᑕᐃᒪᓐᓇᑎᒋ ᓂᒡᓚᓱᒃᑎᓪᓗᒍ ᓯᑭᑑᓪᓗ ᐃᓚᖏᑦ ᐊᐱᔭᐅᓯᒪᓪᓗᑎᒃ. ᑕᐃᒪᓐᓇᐃᓕᕌᖓᑕ ᐋᖅᑭᒃᓯᒍᑎᖃᖅᐸᒃᐳᑦ: ᐊᐅᓚᐅᑎᑦ ᐃᑯᒪᓕᑦ ᐃᑭᑕᐅᓪᓗᑎᒃ ᓯᑭᑑᑉ ᓴᓂᐊᓃᑎᑕᐅᓪᓗᑎᒃ ᐅᓕᒃᑕᐅᓪᓗᑎᒡᓗ ᐅᖁᖅᓴᐃᖃᑦᑕᖅᐳᑦ ᓯᑭᑑᒥᖕᓂᒃ ᐊᐅᓚᔾᔭᓕᖅᖢᑎᒡᓗ ᑕᐃᒪᓐᓇ. ᐅᓇᑕᖅᑐᒃᓴᖑᐊᓪᓗ ᐸᕐᓇᓕᖅᖢᑎᒃ ᐅᓪᓛᒃᑯᑦ ᐅᓯᓕᖅᑐᐃᓪᓗᑎᒃ ᓯᑭᑑᒥᖕᓂᒃ ᐊᒃᓱᕈᕐᓇᖏᑦᑑᔮᖅᖢᓂ ᐱᓕᕆᕙᒃᖢᑎᒃ ᑕᐃᒪᓐᓇ, ᐃᓕᓐᓂᐊᖅᓯᒪᖕᒪᑕ ᖃᓄᐃᓕᐅᕆᐊᒃᓴᖅ ᐊᒻᒪ, ᐱᓗᐊᖅᑐᒥᒡᓗ ᐃᓕᓐᓂᐊᖅᑎᑕᐅᓯᒪᖕᒪᑕ ᖃᓄᐃᓕᐅᕆᐊᒃᓴᖅ ᓂᒡᓚᓱᒃᑲᓗᐊᖅᑎᓪᓗᒍ.
ᑕᒪᒃᑯᐊ ᓯᑭᑑᑦ ᑕᒪᕐᒥᒃ ᐊᐅᓚᓕᖅᑎᓪᓗᒋᑦ ᐊᐅᓚᔾᔭᒃᑕᐅᓯᒪᓕᖅᑎᓪᓗᒋᑦ, ᑲᑎᖅᓯᓪᓗᑎᒃ ᑕᒪᕐᒥᒃ ᑎᒡᕙᕆᐊᒥᒃ ᐊᒻᒪ ᑰᕌᕐᕈᖕᒥ ᐅᓇᑕᖅᑐᒃᓴᖑᐊᑦ ᐊᐅᓪᓛᕆᐊᓕᖅᖢᑎᒃ Simpson Lake−ᑯᑦ ᐃᑳᖅᖢᑎᒃ, ᑕᑯᒃᓴᐅᔪᑐᐊᖑᓕᖅᖢᓂ ᐊᖅᑯᑎᖏᑦ ᓯᑭᑑᖏᑦᑕ ᑕᑯᒃᓴᐅᓂᐊᖏᓕᖅᐳᑦ ᐊᖅᑯᑎᒋᓯᒪᔭᖏᑦ ᐊᐱᑐᐊᖅᐸᑦ ᐊᐳᑦ ᓯᑎᒡᓕᑐᐊᖅᐸᓪᓗ. ᓚᑭᐸᐅᕗ ᑐᒥᖏᑦ ᐱᑕᖃᖏᓕᕋᓗᐊᖅᑎᓪᓗᒋᑦ, ᖃᐅᔨᒪᔭᐅᕗᑦ ᖃᓄᐃᓕᐅᖅᓯᒪᓂᖏᓐᓄᑦ ᓇᐅᒃᑰᓚᐅᕐᓂᖏᓐᓄᓪᓗ.
“ᑕᒪᒃᑯᐊ ᖃᓄᐃᓕᐅᕈᑕᐅᓯᒪᔪᑦ ᑕᑯᒃᓴᐅᑎᑎᖏᑦᖢᑎᒃ ᖃᓄᐃᓕᐅᖅᓯᒪᒥᖏᓐᓄᑦ ᐊᑲᐅᓂᖅᓴᐅᕗᖅ,” ᑕᐃᒪᓐᓇ ᐅᖃᓚᐅᖅᐳᖅ. “ᑭᓯᐊᓂ ᐅᓂᒃᑳᖅᑕᐅᓯᒪᓂᒃᑯᑦ ᐱᑕᖃᓚᐅᕋᓗᐊᖅᐳᑦ ᑕᒪᐅᓈᓚᐅᕋᓗᐊᖅᐳᓪᓗ, ᐱᑕᖃᒃᑲᓐᓂᕐᓂᐊᖅᖢᑎᒡᓗ ᑕᒪᐅᓈᒃᑲᓐᓂᕐᓂᐊᖅᖢᑎᒡᓗ ᑕᐃᒪᓐᓇ ᐱᒋᐊᖃᒃᑲᓐᓂᓕᕈᑎᒃ.”
ᑕᐃᒪᓐᓇ ᓱᓕᕗᖅ ᑖᒃᑯᓄᖓ ᑰᕌᕐᕈᖕᒥ ᐅᓇᑕᖅᑐᒃᓴᖑᐊᓄᑦ, ᐅᑎᕐᓂᐊᖅᑐᓄᑦ ᓲᕐᓗ Simpson Lake−ᒧᑦ ᑰᕌᕐᕈᒃ ᐅᖓᓯᖕᓂᖃᖅᑐᐃᓐᓇᕐᒪᑦ 80 ᑭᓛᒥᑕᓂᒃ ᑕᐃᑲᖓᑦ ᑕᓯᕐᒥᑦ − ᓄᓇᖓᓃᑉᐳᑦ ᖃᓂᑦᖢᑎᒃ. ᐱᕈᖅᓴᓯᒪᓪᓗᑎᒡᓗ ᐅᑎᖅᑕᕋᖅᐸᒃᖢᑎᒃ ᓄᓇᒥᖕᓄᑦ ᑕᐃᑯᖓᓗ ᐱᖃᑎᖃᖅᖢᑎᒃ ᐱᖃᓐᓇᕆᔭᒥᖕᓂᒃ, ᐃᓚᒥᖕᓂᒃ, ᓄᑕᕋᒥᖕᓂᒃ ᐊᒻᒪ ᐃᓐᖑᑕᒥᖕᓂᒃ. “ᐱᐅᒋᕙᕋ ᓄᓇᒋᔭᕗᑦ ᑕᒫᓂ. ᓱᓇᓗᒃᑖᖃᖅᐳᒍᑦ ᐱᒍᒪᔭᑦᑎᓐᓂᒃ ᑕᒫᓂ,” ᐅᖃᓚᐅᖅᐳᖅ ᑎᒡᕙᕆᐊᒃ.
ᑎᒡᕙᕆᐊᖅ ᐅᓇᑕᖅᑐᒃᓴᖑᐊᖑᖃᑕᐅᓚᐅᖅᓯᒪᕗᖅ ᐅᑭᐅᖃᖅᖢᓂ 18-ᓂᒃ ᓄᓇᒧᐊᕆᐊᒃᓴᖅ ᖁᕕᐊᒋᔭᖃᕋᒥ. ᑕᐃᑦᓱᒪᓂ, ᓄᓇᒥ ᖃᓄᐃᓕᐅᕐᓂᕐᒧᑦ ᐃᓕᓐᓂᐊᖅᓯᒪᓪᓗᓂᓗ ᖃᐅᔨᒪᓪᓗᓂᓗ, ᐅᑭᐅᓂᒃ 24 ᐊᓂᒍᖅᓯᒪᓕᕐᒪᑕ ᐅᓇᑕᖅᑐᒃᓴᖑᐊᖑᖃᑕᐅᓯᒪᓕᖅᐳᖅ, ᐃᓕᒃᑲᓐᓂᖅᓯᒪᓕᖅᐳᖅ. ᖃᐅᔨᒪᑦᓯᐊᖅᖢᓂᓗ ᐃᓄᐃᑦ ᐱᖁᖅᓯᑐᖃᖏᓐᓂᒃ, ᐊᑎᖃᖅᑐᓂᒃ ᐃᓄᐃᑦ ᖃᐅᔨᒪᔭᑐᖃᖏᑦ, ᐱᓕᒪᒃᓴᕐᓂᕐᒥᒃ, ᑕᐃᒪᓐᓇ ᐃᓕᓐᓂᐊᖅᓯᒪᓪᓗᓂ ᒪᓕᒃᖢᓂᒋᑦ, ᑕᐅᑐᒃᖢᓂᓗ ᐃᔾᔪᐊᖅᓯᕙᒃᖢᓂᓗ. ᑎᒡᕙᕆᐊᒃ ᐅᖃᕈᓐᓇᖅᐳᖅ, ᑕᐃᒪᓐᓇ ᖃᐅᔨᒪᒐᓗᐊᖅᖢᓂ ᐃᓄᐃᑦ ᐱᖅᑯᓯᖏᓐᓂᒃ ᐊᑯᓂ ᐃᓕᓐᓂᐊᖅᓯᒪᓪᓗᒋᓪᓗ ᐊᑐᖃᑦᑕᖅᖢᒋᓪᓗ, ᑕᐃᒪᓐᓇ ᐃᓕᓐᓂᐊᒃᑲᓐᓂᕈᓐᓇᖅᐳᖅ ᓄᖅᑲᖃᑦᑕᖏᓪᓗᓂ. “ᓱᓕ ᐃᓕᑉᐸᓪᓕᐊᕗᖓ, ᐅᓪᓗᒥᓘᓐᓃᑦ ᓱᓕ ᐃᓕᑉᐸᓪᓕᐊᕗᖓ,” ᐅᖃᓚᐅᖅᐳᖅ ᖁᖓᑦᖢᓂ.
“ᑕᐃᒪᓐᓇ ᐱᓕᕆᖃᑎᒌᖃᑦᑕᖏᒃᑯᑦᑕ, ᐅᑭᐅᖅᑕᖅᑐᖅ ᒪᑭᑕᐃᓐᓇᕈᓐᓇᕋᔭᖏᑉᐳᖅ.”
ᑕᐃᒪ ᐊᒥᓱᑦ ᓯᑭᑑᑦ ᑎᑭᒻᒪᑕ ᑰᕌᕐᕈᖕᒧᑦ, ᓄᓗᕋᖅᑕᐅᓪᓗᑎᒃ ᖁᖓᑕᐅᓪᓗᑎᒡᓗ ᐱᓚᐅᖅᐳᑦ ᑕᒪᒃᑯᓄᖓ ᐃᓄᖕᓄᑦ ᑕᑯᔭᖅᑐᖅᓯᒪᔪᓄᑦ ᖃᓄᐃᓕᐅᖅᐸᓪᓕᐊᖕᒪᖔᑕ.
ᕼᐃᓐᔅ ᐊᒻᒪ ᐊᓯᖏᑦ ᐃᓚᒋᔭᐅᖃᑕᐅᔪᑦ ᑖᒃᑯᓄᖓ, ᓄᓇᓕᖕᓂᒥᐅᑦ ᑰᕌᕐᕈᖕᒥ ᐊᑭᕋᖅᑐᖏᑉᐳᑦ ᑰᕌᕐᕈᖕᒥᐅᑕᐅᔪᓂᒃ ᐅᓇᑕᖅᑐᒃᓴᖑᐊᓂᒃ ᐅᕙᓘᓐᓃᑦ ᐊᐅᓪᓛᖃᑦᑕᕐᓂᖏᓐᓄᑦ. ᑕᐃᒪᓐᓇ ᐅᖓᓯᒃᑐᒧᐊᕐᓂᐊᖅᑎᓪᓗᒋᑦ ᐊᒪᕈᒃᑰᓂᕋᖅᑕᐅᔪᑦ ᐅᓇᑕᖅᑐᒃᓴᖑᐊᑦ, ᐃᓱᒪᒃᑯᓪᓗ ᐅᓗᕆᐊᓇᖅᑐᒦᑦᑕᐃᓕᑎᑎᖃᑦᑕᖅᖢᑎᒃ, ᐅᓇᑕᖅᑐᒃᓴᖑᐊᑦ ᓯᕗᒻᒧᒃᐸᓪᓕᐊᑎᑕᐅᖃᑦᑕᖅᖢᑎᒃ ᐅᓗᕆᐊᓇᖅᑐᒃᑰᕋᓱᐊᖅᖢᑎᒃ. “ᓄᓇᓕᒃ ᐅᖓᓯᖕᓂᖃᕋᓗᐊᖅᐸᑦ 600 ᑭᓛᒥᑕᓂᒃ, ᖃᐅᔨᒪᖕᒪᑕ ᑎᑭᓐᓂᐊᕐᓂᕐᒧᑦ ᑕᐃᒪᓐᓇ ᐅᖓᓯᒃᑲᓗᐊᖅᑎᓪᓗᒍ ᑲᔪᓯᖃᑦᑕᖅᐳᑦ ᐅᖓᓯᒃᑐᒧᖓᐅᖃᑦᑕᕐᓂᕐᒧᑦ,” ᐅᖃᓚᐅᖅᐳᖅ ᕼᐃᓐᔅ.
ᓯᓂᒃᑕᓚᐅᖅᖢᑎᒃ ᑰᕌᕈᒃ ᐱᓐᖑᐊᕐᕕᖓᓂ (ᓄᓇᓕᖕᓄᑦ ᑲᑎᒪᕕᐅᓪᓗᓂᓗ), ᑲᓇᖕᓇᓕᐊᓕᓚᐅᖅᐳᑦ ᐃᑳᖅᖢᑎᒃ Simpson ᓄᕗᐊᒍᑦ ᐊᑯᓪᓕᕐᒧᑦ. ᑕᒡᕙᓂ ᑰᕌᕐᕈᖕᒥᐅᑦ ᐅᓇᑕᖅᑐᒃᓴᖑᐊᖏᑦ ᓄᖅᑲᕐᓂᐊᖅᖢᑎᒃ, ᐊᓯᖏᑦ ᐅᖓᓯᒃᑐᓕᐊᕐᓂᐊᖅᖢᑎᒃ ᐊᐅᓪᓛᕐᓗᑎᒃ ᓂᒋᒧᖓᐅᓪᓗᑎᒃ, ᓇᐅᔮᑦ, ᓄᓇᕗᑦ ᒥᒃᓵᓄᑦ, ᓄᖅᑲᖃᑦᑕᓚᐅᕐᓗᑎᒃ ᐅᖓᓯᒃᓂᖃᖅᑐᓕᐊᕐᓗᑎᒃ 1,200 ᐅᖓᑖᓄᑦ ᑭᓚᒥᑕᓂᒃ ᐅᖓᓯᖕᓂᖃᖅᑐᒧᖓᐅᓗᑎᒃ, ᑰᒡᔪᐊᖅ, ᒫᓂᑑᐸᒧᑦ, ᐄᐳᖑᓕᖅᐸᑦ ᑎᑭᕕᒃᓴᖃᖅᖢᑎᒃ.
ᐊᐅᓪᓚᓚᐅᖏᓐᓂᕐᒥᖕᓂ ᐅᖃᓪᓚᖃᑎᒌᒃᖢᑎᒃ ᓇᐅᒃᑰᕐᓂᐊᕐᒪᖔᕐᒥᒃ ᓇᓂᓗ ᐅᓗᕆᐊᓇᖅᑐᖃᑐᐃᓐᓇᕆᐊᖃᕐᓂᖓᓄᑦ. “ᓇᑭᑐᐃᓐᓇᖅ ᐊᕙᑎᖏᓐᓂ ᓇᓄᖅᑕᖃᖃᑦᑕᕐᓂᐊᕐᓂᖓᓄᓪᓗ ᐊᖅᑯᑎᒋᓂᐊᖅᑕᖏᓐᓂ,” ᐅᖃᓚᐅᖅᐳᖅ ᑎᒡᕙᕆᐊᒃ. “ᓲᑉᓗ ᐊᕝᕙᓂᔅᑖᓐᑎᑐᑦ ᐃᖏᖓᕐᒪᑦ”, ᑕᐃᒪᓐᓇ ᒥᑖᖅᖢᑎᒃ ᐅᖃᖅᑐᖃᖅᖢᓂ, ᐃᒡᓚᖅᑎᑎᓪᓗᓂᓗ ᐊᓯᒥᓂᒃ. ᑭᓯᐊᓂᓗ ᑕᒪᕐᒥᒃ ᐅᓗᕆᐊᓇᖅᑐᖃᕋᔭᕐᓂᖓᓄᑦ ᖃᐅᔨᒪᑦᓯᐊᖅᐳᑦ. ᐅᓪᓘᓚᐅᖅᑑᑉ ᓯᕗᓂᐊᓂ, ᖁᑭᐅᑎᖏᑦ ᐴᖅᓯᒪᓚᐅᖅᖢᑎᒃ ᑐᖅᑯᖅᓯᒪᕕᖏᓐᓄᑦ, ᐊᑕᐅᓯᕐᓘᓐᓃᑦ ᒪᕐᕉᒡᓘᓐᓃᑦ ᖁᑭᐅᑎᑦ ᐊᑐᐃᓐᓇᐅᓕᖅᑎᑕᐅᓪᓗᑎᒃ ᐊᐅᓪᓚᕆᐊᓕᖅᑎᓪᓗᒋᑦ, ᑕᐃᒪᐃᖏᓐᓇᕐᓂᐊᖅᖢᑎᒡᓗ ᐃᖏᕐᕋᓗᑎᒃ ᑕᓯᐅᔭᕐᔪᐊᑉ ᐱᖓᓐᓇᖓᓄᖓᐅᓕᖅᖢᑎᒃ.
ᑕᐃᒪᓐᓇᑎᑐᑦ ᐃᖏᕐᕋᔭᒃᓯᒪᔪᑎᑐᑦ ᑕᐃᑦᓱᒪᓂ, ᐅᖓᓯᖕᓂᖃᖅᑐᖅ 5,200-ᑭᓚᒥᑕᓂᒃ ᑲᓇᑕᒥᒃ ᓄᓇᖃᕐᓂᖅ ᖃᐅᔨᓴᓐᓇᕈᑕᐅᕗᖅ ᐅᑭᐅᖅᑕᖅᑐᖅ ᓴᖅᑭᔮᖅᑕᐅᓪᓗᓂ ᐊᑐᖅᑕᐅᓪᓗᓂᓗ. ᑕᐃᑦᓱᒪᓂᑐᖃᖅ, ᐅᓇᑕᖅᑐᒃᓴᖃᓕᕐᓂᖅ ᐅᑭᐅᖅᑕᖅᑐᒥ ᐊᖅᑯᑎᒋᔭᐅᕗᖅ ᐊᑐᖅᖢᑎᒃ ᐊᓯᔾᔨᖅᐸᓪᓕᐊᔪᒥᒃ ᓄᓇᒥᒃ ᐃᓄᖏᓐᓂᒡᓗ ᑕᒫᓂᒥᐅᑕᐅᔪᓂᒃ, ᐋᓐᓂᕐᓇᖅᑐᖅ ᑕᐃᒪᖓᓂᑦ ᓅᑕᐅᓚᐅᖅᓯᒪᑎᓪᓗᒋᑦ ᐃᓄᐃᑦ ᐃᓚᒌᑦ ᓇᖕᒥᓂᖃᕈᒪᓪᓗᑎᒃ ᑲᓇᑕᒥᐅᑦ ᒐᕙᒪᒃᑯᖏᑦ, ᐃᓕᓐᓂᐊᕆᐊᖅᑎᑎᕙᓚᐅᖅᓗᑎᒡᓗ ᐅᖓᓯᒃᑐᒧᑦ ᕿᒪᐃᑎᑎᓪᓗᑎᒃ ᓄᑕᖃᓂᒃ ᐃᓚᖏᓐᓂᑦ, ᐃᓄᐃᑦ ᕿᒻᒥᖏᓪᓗ ᑐᖁᕋᖅᑕᐅᓚᐅᖅᓯᒪᑎᓪᓗᒋᑦ ᐊᒻᒪ, ᐅᕙᑦᓯᐊᕈᖑᖅᑎᓪᓗᒍ, ᓱᕈᖅᑎᑕᐅᓯᒪᓪᓗᓂ ᓄᓇᖓᑦ ᓱᕈᕐᓗᖕᓄᑦ, ᐊᒥᓱᑦ ᓱᕈᖅᑕᐅᓯᒪᔪᑦ ᓴᓗᒻᒪᖅᓴᖅᑕᐅᒋᐊᖃᖃᑦᑕᖅᖢᑎᒃ ᓱᓕ.
ᑭᓯᐊᓂ ᓚᑭᓐᐸᐅᕙ ᐃᒃᐱᒍᓱᒃᐳᖅ, ᐅᓪᓗᒥᐅᓕᖅᑐᖅ, ᐊᓯᔾᔨᖅᓯᒪᔪᖃᓕᕐᒪᑦ: “ᐊᔾᔨᐅᖏᑦᑐᒦᓕᖅᐳᒍᑦ ᐅᐱᒋᒋᐊᖃᓕᖅᐸᕗᑦ ᐅᑭᐅᖅᑕᖅᑑᑉ ᐱᔪᓐᓇᕐᓂᕆᔭᖏᓐᓂᒃ ᑎᒍᒥᐊᖅᑐᓂᒃ,” ᑕᐃᒪᓐᓇ ᐅᖃᖅᖢᓂ. “ᐅᓪᓗᒥ ᐅᖃᐅᓯᕐᓂᖅ ᐊᑐᖅᐳᒍᑦ ᐅᖃᐅᓯᖃᖅᖢᑎᒃ ᐱᓕᕆᖃᑎᒌᑦᓯᐊᕈᒪᓂᕐᒧᑦ ᐱᔾᔪᑎᖃᖅᑐᓂᒃ.”
ᑭᓯᐊᓂ ᑕᐃᒪᓐᓇ ᐊᔾᔨᐅᖏᑦᑐᒥᒃ ᓂᓪᓕᐊᓕᕋᓗᐊᖅᑎᓪᓗᒋᑦ, ᖃᐅᔨᓴᕐᓂᖅ ᐱᕙᓪᓕᐊᑎᑕᐅᓂᖓ ᐅᑭᐅᖅᑕᖅᑐᒥ ᐊᐱᖁᑎᒋᔭᐅᔪᓐᓇᖅᐳᖅ ᐃᓱᒫᓗᒍᑕᐅᓗᓂᓗ, ᓲᕐᓗ ᖃᓄᖅ ᐅᓇᑕᖅᑐᒃᓴᐃᑦ ᑎᑭᑉᐸᓪᓕᐊᑎᑕᐅᒐᓗᐊᖅᑎᓪᓗᒋᑦ ᐅᑭᐅᖅᑕᖅᑐᒧᑦ ᑕᒪᒃᑯᐊ ᐅᑭᐅᖅᑕᖅᑐᒥᐅᑦ ᐃᑲᔪᖅᑕᐅᒋᐊᖃᕐᒪᑕ ᐊᑕᐅᑦᓯᒃᑯᑦ. ᐃᓚᖏᑦ ᐱᓕᕆᐊᑦ ᓴᓇᔭᐅᓯᒪᔪᑦ, ᑕᐃᒪᓐᓇᑎᑐᑦ ᐅᑭᐅᖅᑕᖅᑐᒥ ᖃᐅᔨᓴᕈᑎᑦ ᑎᖕᒥᓲᓂᒃ ᑎᑭᑐᐃᓐᓇᕆᐊᖃᖅᑐᓂᒡᓗ ᓯᓚᒃᑯᑦ, ᓴᐳᒻᒥᔪᑕᐅᑐᐃᓐᓇᕐᒪᑕ, ᐊᒻᒪ ᐊᓯᖏᑦ, ᓲᕐᓗ ᐃᒪᒃᑯᑦ ᖃᐅᒻᒪᖁᑎᓕᐅᕈᑎᒃᓴᐃᑦ ᑕᐃᒪᓐᓇᑎᑐᑦ ᐃᖃᓗᖕᓂ ᓴᓇᔭᐅᓯᒪᔪᑎᑐᑦ, ᐃᓄᖕᒧᑦ ᓴᓇᔭᐅᓯᒪᖕᒪᑕ, ᐊᓯᖏᑦ ᐊᒥᓲᓂᖅᓴᐃᓪᓕ ᑕᒪᐃᓐᓂᒃ ᐱᓕᕆᒍᑕᐅᓪᓗᑎᒃ, ᓲᕐᓗ ᑕᒪᒃᑯᐊ ᐋᖅᑭᒃᓱᖅᑕᐅᒍᑎᑦ ᒥᕝᕕᖕᓄᑦ ᐅᒥᐊᕐᔪᐊᓄᑦ ᐅᓯᓕᖅᑐᐃᕕᑦ ᓂᐅᕋᐃᕝᕕᓪᓗ ᐊᖅᑯᑎᑯᑖᓪᓗ.
ᑕᒪᒃᑯᐊ ᓴᓇᔭᐅᔪᑦ ᐊᑯᓂ ᐊᑐᖅᑕᐅᔪᓐᓇᖅᖢᑎᒃ, ᐊᒥᓱᑦ ᐅᑭᐅᖅᑕᖅᑐᒥ ᓄᓇᓕᖕᓂᒥᐅᑦ ᐱᒻᒪᕆᐅᓂᖅᓴᓂᒃ ᐊᑲᐅᖏᓕᐅᕈᑎᖃᖅᐳᑦ ᐱᔾᔪᑎᖃᖅᑐᓂᒃ ᖃᓄᖅ ᐱᔪᓐᓇᐅᑎᖃᕈᓐᓇᖅᑎᑕᐅᓂᖏᓐᓂᒃ ᐃᓄᐃᑦ, ᐃᒡᓗᖃᖅᑎᑕᐅᓂᖅ ᐊᒻᒪ ᐃᒪᖃᑦᓯᐊᖅᑎᑕᐅᓂᖅ, ᐊᒻᒪ ᐅᖅᓱᐊᓗᒃᑰᖅᑐᓂᒃ ᐆᒻᒪᖁᑎᖃᕐᓂᖅ ᐱᑕᖃᖏᓗᐊᖅᖢᑎᒡᓗ ᖃᕆᑕᐅᔭᒃᑯᑦ ᐱᑐᒃᓯᒪᒍᑕᐅᔪᓐᓇᐅᑎᑦ.
ᔭᓐᓄᐊᕆ ᕿᑎᐊᓂ, ᓱᓪᓗᓕᒃ ᐃᒪᖃᐅᑎᖏᓐᓂᒃ ᓱᓪᓗᓕᖓ ᑕᓯᕐᒥᑦ ᐅᖅᓱᖅᑑᑉ ᐃᒪᕐᒥᒃ ᓴᓗᒻᒪᖅᓴᕐᕕᖓᓄᑦ ᓱᕋᓚᐅᖅᐳᖅ, ᐃᒪᖃᖅᑎᑕᐅᖏᓕᖅᖢᑎᒡᓗ ᐅᖅᓱᖅᑑᒥᐅᑦ, ᐊᒻᒪ ᖃᓛᖅᑎᑎᖃᑦᑕᕐᓗᑎᒃ ᑭᓯᐊᓂ ᐃᒪᕐᒥᒃ ᐊᑐᖅᑕᐅᕆᐊᖃᓕᖅᖢᑎᒃ ᑕᐃᒪᓐᓇᐃᖏᓐᓇᓚᐅᖅᖢᑎᒃ ᓱᓕ ᐱᕙᓪᓕᐊᔪᓕᕆᓕᖅᑎᓪᓗᑕ ᑖᒃᑯᖓ. ᐱᓇᓱᐊᕈᓯᕋᓴᐃᑦ ᐊᓂᒍᖅᓯᒪᓕᖅᑎᓪᓗᒋᑦ ᐊᐅᓪᓚᖅᓯᒪᓕᖅᑎᓪᓗᒋᑦ ᐅᓇᑕᖅᑐᓴᖑᐊᑦ, ᑐᐊᕕᕐᓇᖅᑐᖃᓕᓚᐅᕆᓪᓗᓂ ᑕᐃᑲᓂ ᓱᓕ, ᓄᓇᓕᖕᓂ ᐅᓇᑕᖅᑐᒃᓴᖑᐊᑦ ᐱᓕᕆᑎᑕᐅᒋᐊᓕᓚᐅᕆᓪᓗᑎᒃ ᐅᓪᓗᓄᑦ ᐱᖓᓱᓄᑦ ᖃᒥᖔᓕᓚᐅᕐᒪᑕ ᓄᓇᓕᖕᓂᒥᐅᑦ. ᐊᒻᒪ ᐊᕐᕌᓂ, ᑕᕆᐅᖅᑕᖃᓕᕆᓪᓗᓂ ᑰᕌᕐᕈᑉ ᐃᒪᖓᑕ ᓴᓗᒻᓴᖅᓴᐃᕕᖓᑦ, ᐊᑐᖅᑕᐅᒋᐊᖃᖏᓕᖅᖢᓂᓗ ᐃᒪᖓᑦ, ᑐᐊᕕᕐᓇᖅᑐᖃᓕᖅᖢᑎᒃ ᐃᒥᖁᔭᐅᖏᑦᖢᑎᒃ ᑎᓕᔭᐅᓯᒪᓕᓚᐅᖅᐳᑦ, ᑕᒪᒃᑯᓂᖓ ᑭᓯᐊᓂ ᐃᒪᖃᐅᑎᓂᒃ ᐃᒥᑲᐅᑎᒋᔭᐅᔪᓐᓇᖅᑐᓂᒃ ᐊᑐᕆᐊᖃᓕᖅᖢᑎᒃ ᑕᖅᑭᓗᒃᑖᑲᓴᒃ. ᑕᒪᓐᓇᐃᑦᑐᖃᖅᑎᓪᓗᒍ ᖃᐅᔨᒪᒋᐊᖃᖅᐳᒍᑦ ᐊᒥᓱᑦ ᑲᓇᑕᒥᐅᑕᐃᑦ ᐱᖃᕐᓂᖅᓴᐅᓂᖏᓐᓄᑦ ᐅᓪᓗᑕᒫᖅᓯᐅᑎᒋᕙᒃᑕᒥᖕᓂᒃ ᑕᐃᒪᓐᓇᐃᖏᑎᓪᓗᒋᓪᓕ ᐅᑭᐅᖅᑕᖅᑐᒥᐅᑦ.
ᑲᓇᑕᒥ, ᑕᒪᒃᑯᐊ ᐅᑭᐅᑕᖅᑐᒥ ᐊᑐᖅᑕᐅᓪᓚᕆᖃᑦᑕᖅᑐᑦ ᑕᐃᒪᓐᓇᑎᑐᑦ ᑲᓇᑕᒥᐅᑕᑎᑐᑦ ᑲᒪᒋᔭᐅᒋᐊᖃᕋᓗᐊᖅᐳᑦ ᐅᓪᓗᑕᒫᖅᓯᐅᑎᒋᕙᒃᑕᖏᓐᓂᒃ ᑲᒪᒋᔭᐅᑦᓯᐊᕐᓗᑎᒃ.
“ᖃᐅᔨᒪᒋᐊᖃᖅᐳᒍᑦ ᐃᓕᑕᖅᓯᓯᒪᑦᓯᐊᕐᓗᑕᓗ ᑕᐃᒪᓐᓇ ᓴᐳᒻᒥᔭᐅᒋᐊᖃᕈᑎᖃᕐᓂᖏᓐᓄᑦ …. (ᑭᓯᐊᓂ) ᑕᐃᒪᓐᓇ ᐃᑲᔪᖅᑕᐅᓯᒪᒋᐊᖃᖅᐳᑦ ᐃᑲᔪᖅᑕᐅᓯᒪᑦᓯᐊᕐᓗᑎᒃ ᑕᐃᒪᓐᓇ ᐱᑕᖃᖏᒻᒪᑦ ᒫᓐᓇ ᐊᒥᒐᕐᓂᖃᕐᒪᑕ … ᐊᑯᓂᐊᓗᒡᓗ ᑐᒃᓯᕋᐅᑕᐅᓯᒪᒐᓗᐊᖅᖢᑎᒃ ᐅᑭᐅᖅᑕᖅᑐᒥᐅᓄᑦ ᑕᒪᒃᑯᐊ ᓯᕗᓕᖅᑎᖏᓐᓄᑦ, ᑲᒪᒋᔭᐅᑦᓯᐊᕆᐊᖃᕐᒪᑕ,” ᐅᖃᓚᐅᖅᐳᖅ ᓚᑭᓐᐸᐅᕗ. “ᐋᖅᑭᒍᓐᓇᖏᓐᓇᑦᑎᒍ ᐊᑕᐅᓯᐅᓗᑕ ᐊᓯᖏᑦᑎᒍᓪᓗ.”
ᑕᐃᒪᓐᓇ ᑕᒡᕙ, ᐅᓇᑕᖅᑐᒃᓴᖑᐊᑦ ᖃᓄᖅ ᐱᓕᕆᔪᓐᓇᕐᓂᖏᓐᓄᑦ ᐃᑲᔪᕈᑎᑎᒍᑦ ᑕᐅᑐᒃᑕᐅᒋᐊᖃᖅᐳᑦ ᐊᐅᓪᓛᖅᖢᑎᒃ ᖃᐅᔨᓴᖃᑦᑕᕐᓂᕐᒧᓪᓗ ᐱᓕᕆᐊᖃᖃᑦᑕᕐᓂᖏᓐᓄᑦ ᕿᓂᖃᑕᕐᓂᖏᓐᓄᓪᓗ ᐸᖅᓴᐃᔨᐅᓂᖏᓐᓄᓪᓗ ᐊᒻᒪᓗ ᓯᕗᒻᒧᑦ ᐊᔾᔨᒌᖏᑦᑐᓂᒃ ᐱᓕᕆᐊᖃᕈᓐᓇᕐᓂᖏᓐᓄᑦ ᖃᓄᑐᐃᓐᓇᖅ ᐃᓱᒪᒋᓗᒋᑦ ᑕᐃᑦᓱᒪᓂᐅᓚᐅᖅᑐᖅ ᐱᓕᕆᐊᕆᔭᐅᖃᑦᑕᖅᓯᒪᔪᑦ ᐃᓱᒪᒋᓗᒋᑦ.
“ᐅᓇᑕᖅᑐᒃᓴᖑᐊᑦ ᓇᓗᓇᐃᒃᑯᑕᕆᔭᐅᔪᓐᓇᖅᐳᑦ ᖃᓄᐃᓕᐅᕈᓐᓇᕐᓂᖏᓐᓄᑦ ᐃᑲᔪᕐᓗᑎᒃ ᑭᒃᑯᑐᐃᓐᓇᕐᓂᒃ,” ᐅᖃᓚᐅᖅᐳᖅ ᓚᐃᑭᐸᐅᕗ. “ᓴᐳᒻᒥᔨᐅᖕᒪᑕ, ᖃᐅᔨᓴᖅᑎᐅᓪᓗᑎᒡᓗ ᓄᓇᓕᒥᖕᓂ, ᕼᐃᓖ? ᓴᖅᑭᔮᖅᑎᑎᔨᐅᓪᓗᑎᒃ ᐃᓕᖁᓯᑐᖃᒥᖕᓂᒃ, ᐅᖃᐅᓯᒥᖕᓂᒡᓗ ᐊᑐᖁᔨᓪᓗᑎᒃ, ᖃᓄᐃᓕᐅᕈᓐᓇᑦᓯᐊᖅᖢᑎᒡᓗ ᓄᓇᒥ. ᑕᒪᐃᓐᓂᒃ ᐊᔪᖏᓐᓂᐅᒋᐊᖃᖅᑐᓂᒃ ᖃᐅᔨᒪᓪᓗᑎᒃ ᐃᓕᓐᓂᐊᖅᑎᑎᒍᓐᓇᖅᖢᑎᒡᓗ ᐊᓯᒥᖕᓂᒃ ᖃᐅᔨᒪᖏᑦᑐᓂᒃ − ᐱᔪᓐᓇᖅᑎᑎᓪᓗᑎᒡᓗ ᐃᓄᖕᓂᒃ ᐱᔨᑦᓯᕋᕆᐊᖃᕐᓂᕐᒧᑦ ᓄᓇᒥᖕᓂ ᐊᖏᕐᕋᒥᖕᓂ.”
ᐃᒻᒪᖄ 150 ᑭᓛᒥᑕᓂᒃ ᐅᖓᓯᖕᓂᖃᖅᖢᑎᒃ ᑲᓇᖕᓇᖓᓂ ᑰᕌᕈᑉ, ᐊᓄᕆᑐᓂᖓᓂ ᐊᑯᓪᓕᐅᑉ, ᑖᒃᑯᐊ ᐅᖓᓯᒃᑐᒧᖓᐅᔪᑦ ᐅᓇᑕᖅᑐᒃᓴᖑᐊᑦ ᑕᒡᕙᐅᕗᑏᓕᖅᐳᑦ ᑰᕌᕐᕈᖕᒥ ᖃᐅᔨᒪᑎᒥᖕᓂᒃ ᐊᐅᓪᓚᕆᐊᒃᑲᓐᓂᓕᕆᓪᓗᑎᒃ, ᑕᐃᒪᓐᓇ ᐊᐅᓪᓚᖅᐸᓪᓕᐊᓪᓗᑎᒃ ᑯᒪᑯᓘᔮᒻᒪᕆᓕᖅᐳᑦ ᒥᑭᒡᓕᕙᓪᓕᐊᓪᓗᑎᒃ ᐅᖓᓯᒃᓯᕙᓪᓕᐊᓪᓗᑎᒃ ᑕᑯᒃᓴᐅᖏᓕᖅᖢᑎᒡᓗ ᐱᖅᑐᒥ. ᑎᒡᕙᕆᐊᒃ, ᑕᐃᒪᓐᓇ ᓇᐅᒃᑰᖅᑐᒃᓴᐅᓂᖏᓐᓄᑦ ᐅᖃᐅᔾᔪᐃᓚᐅᖅᖢᓂ ᐅᖓᓯᒃᑐᒧᐊᕐᓂᐊᖅᑐᓂᒃ ᑲᓇᑕᐅᑉ ᓴᐃᒻᒪᐅᑎᖓᓂᒃ ᐊᐅᓚᖁᑎᖓᓂᒃ ᑕᑯᒃᓴᐅᑎᑦᑎᓪᓗᓂ ᓯᑭᑑᒥᓂ ᑕᒪᓐᓇ ᐊᔾᔨᐅᖏᑉᐳᖅ ᓴᕆᒪᓇᖅᖢᓂᓗ.
“ᖁᕕᐊᓇᑦᓯᐊᖅᐳᖅ ᐃᓗᒃᑯᑦ,” ᑕᐃᒪᓐᓇ ᐅᖃᖅᖢᓂ, ᐅᖃᒃᑲᓐᓂᖅᖢᓂᓗ ᐊᒥᓲᓂᖅᓴᐃᑦ ᐃᓄᐃᑦ, ᐱᓗᐊᖅᑐᒥᒃ ᑕᒪᒃᑯᐊ ᒪᒃᑯᒃᑐᑦ ᓄᓇᒧᑦ ᐊᐅᓪᓛᖅᐸᒃᑐᑦ, ᑕᐃᒪᓐᓇᐃᓕᐅᖃᑕᐅᒋᐊᖃᖅᐳᑦ, ᐅᓇᑕᖅᑐᒃᓴᖑᐊᓄᑦ ᐃᓚᓕᐅᑎᓗᑎᒃ ᑕᐃᒪᓐᓇ ᐅᕙᖓᑎᑐᑦ 18−ᓂᒃ ᐅᑭᐅᖃᓕᖅᖢᖓ ᐊᑐᖅᓯᒪᔭᒻᓂᒃ ᐊᑐᕐᓗᑎᒃ.
ᓯᕿᓂᖅ ᓂᐱᓕᖅᑎᓪᓗᒍ, ᑰᕌᕐᕈᑉ ᐅᓇᑕᖅᑐᒃᓴᖑᐊᖏᑦ ᓯᓂᒃᑕᕐᓂᐊᖅᐳᑦ ᐃᒡᓗᐊᓛᒥ ᓯᒡᔭᒦᑦᑐᓂ ᐅᑎᕆᐊᓚᐅᖏᓐᓂᕐᒥᖕᓂ ᓄᓇᒥᖕᓄᑦ ᐅᓪᓛᒃᑯᑦ ᐅᑎᕆᐊᕐᓂᐊᖅᖢᑎᒃ. ᑕᐃᒪᓐᓇᐃᓕᐅᖃᑦᑕᖅᓯᒪᓪᓗᑎᒃ, ᓂᐅᕋᐃᓕᖅᐳᑦ ᐅᓯᔭᒥᖕᓂᒃ, ᖁᓪᓕᕐᒥᖕᓂᒡᓗ ᑎᒍᒥᐊᖅᖢᑎᒃ, ᓂᕿᓂᒡᓗ, ᐱᖁᑎᒥᖕᓂᒡᓗ, ᕿᐱᒋᓂᐊᖅᑕᒥᖕᓂᒡᓗ ᐃᑎᖅᐳᑦ ᓯᓂᒃᑕᕐᓂᐊᓕᖅᖢᑎᒃ.
ᐃᓛᓐᓂᒃᑯᑦ ᑕᑯᒋᐊᖅᐸᒃᖢᑎᒃ ᓱᓇᑕᖃᑐᐃᓐᓇᕆᐊᖃᕐᓂᖓᓄᑦ, ᑕᑯᒋᐊᖅᖢᑎᒃ ᓄᓇᒧᑦ ᐊᕙᑎᒥᖕᓄᑦ. ᑕᐃᒪᓐᓇᐃᓕᐅᖅᑎᓪᓗᒋᑦ ᑕᒪᐃᓐᓄᑦ ᑕᑯᔭᐅᒐᔪᖏᑉᐳᑦ, ᑭᓯᐊᓂ ᓚᑭᓐᐸᐅᕗ, ᖃᐅᔨᒪᑦᓯᐊᖅᐳᖅ ᓱᕙᓕᑭᐊᖑᔮᕋᓗᐊᖅᑎᓪᓗᒋᑦ ᑕᐃᒪᓐᓇᐃᓕᐅᕐᓂᖏᑦ ᑭᓯᐊᓂ ᐊᖏᔪᒥᒃ ᑐᑭᖃᖅᐳᑦ ᑲᓇᑕᒥᐅᓄᑦ.
“ᑕᐃᒪᓐᓇ ᐃᑲᔪᕐᓂᖃᖅᐳᖅ ᐅᕙᑦᑎᓐᓄᑦ ᑕᐃᒪᓐᓇ ᐃᔨᒋᔭᐅᖕᒪᑕ, ᓯᐅᑎᒋᔭᐅᓪᓗᑎᒡᓗ ᓂᐱᒋᔭᐅᓪᓗᑎᒡᓗ ᐅᑭᐅᖅᑕᖅᑐᒥ,” ᐅᖃᓚᐅᖅᐳᖅ. “ᐃᑲᔪᖅᐸᒃᖢᑎᒃ ᑭᒃᑐᐃᓐᓇᕐᓂᒃ … ᐊᒻᒪ ᖃᐅᔨᒪᑦᓯᐊᕐᒪᑕ ᐊᔪᖏᑦᓯᐊᕐᒪᑕ ᖃᐅᔨᒪᕗᖓ ᑲᓇᑕ ᓴᐳᒻᒥᔭᐅᖏᓐᓇᕐᓂᐊᕐᒪᑦ ᓇᓗᓇᖏᑦᑐᖅ ᒥᐊᓂᕆᔭᐅᑦᓯᐊᕋᑦᑕ.”
This story is from the July/August 2026 Issue
People & Culture
With more eyes on the Arctic, the Canadian Rangers embark on their longest patrol in recent history — a path forward for Canada’s defence and its deepening relationship with the North
People & Culture
As the climate heats up, so do talks over land ownership in the Arctic. What does Canadian Arctic Sovereignty look like as the ice melts?
History
Veteran journalist and governor-general spouse Whit Fraser recalls diplomatic row with U.S. over 1980s naval excursion into Canada’s High Arctic in excerpt from latest book
People & Culture
For generations, hunting, and the deep connection to the land it creates, has been a mainstay of Inuit culture. As the coastline changes rapidly—reshaping the marine landscape and jeopardizing the hunt—Inuit youth are charting ways to preserve the hunt, and their identity.