People & Culture

ᕿᒧᒃᓯᖅ (Qimuksiq)

ᕿᒧᒃᓯᕐᓂᖅ ᖁᑦᑎᒃᑐᒥ ᐅᖓᓯᖕᓂᖃᖅᑐᒥᒃ 500-ᑭᓛᒥᑐᓂᒃ ᑕᓱᐃᕙᓪᓕᐊᓂᖏᑦ ᐊᑐᖅᑕᐅᔪᓐᓃᓕᓚᐅᖅᑐᒥᒃ ᐃᓄᐃᑦ ᐃᓕᖅᑯᓯᒃᓴᔭᓪᓚᑦᑖᖓᓂᒃ

  • Mar 27, 2023
  • 1,194 words
  • 5 minutes
[ Available in English ]
ᕿᒧᒃᓯᖅᑎ ᑎᐅᕆ ᐅᔭᕋᒃ ᑎᑭᓕᖅᐳᖅ ᐅᓪᓘᑉ ᐊᐃᑉᐸᖓᓂ ᓄᓇᕗᒥ ᐸᖓᒡᒍᔾᔨᓂᖅ 2022 ᕿᒧᒃᓯᕐᔪᐊᕐᓂᖃᖅᑎᓪᓗᒋᑦ.
Expand Image
Advertisement

ᐃᒃᑮᕌᓘᓚᐅᖅᑐᖅ, ᐊᕐᕌᒎᔪᒥ ᐃᔾᔨᓂᖅᓴᐅᖕᒪᑦ ᑕᐃᒪᓐᓇᑎᒋᐊᓗᒃ ᓂᒡᓚᓱᒃᑎᒋᕙᖏᒃᑲᓗᐊᕐᒪᑦ ᐊᕐᕌᒍ ᑕᐃᒪᐃᑎᓪᓗᒍ. ᐃᒃᐱᐊᕐᔫᑉ ᑲᓇᖕᓇᖅᐸᓯᖓᓂ ᐅᖓᓯᖕᓂᖃᐸᓗᒃᑐᖅ 45 ᑭᓛᒥᑐᓂᒃ ᒥᑦᑕᕐᕕᖓᓂ ᓯᓚᓐᓂᐊᕈᑎᖓ ᑎᑎᖅᓯᓯᒪᕗᖅ ᓂᒡᓚᓱᖕᓂᖓ 31.8 C ᐃᒃᑮᕐᓇᕐᓂᖅᐹᖑᓪᓗᓂ ᐊᐃᕐᕆᓕ 18-ᖑᑎᓪᓗᒍ ᐊᕐᕌᒍᑦ ᐊᕙᑎᑦ (20) ᐃᓗᐊᓂ. ᑭᓯᐊᓂ ᓯᕿᓐᓂᖅᑐᖅ, ᓇᓗᓇᐃᒃᑯᑕᐅᓪᓗᓂ ᑖᖅᓯᖃᑦᑕᕈᓃᕐᒪᑦ ᓂᒡᓚᐅᓗᐊᖃᑦᑕᔾᔮᔪᓐᓃᕐᓂᖓᓂᓗ ᐅᐱᕐᖓᖅᐸᓪᓕᐊᓕᖅᑎᓪᓗᒍ.

ᒫᓂ, ᐃᖃᓗᓕᐅᑉ ᑰᖓᓂ ᕿᑭᖅᑖᓗᑉ ᖁᑦᑎᒃᑐᖓᑕ ᑎᕆᖅᑯᐊᓂ, ᑕᖕᒫᖅᐸᓪᓕᐊᔪᑦ. ᑐᐲᑦ ᓇᑉᐸᖅᑕᐅᕙᓪᓕᐊᔪᑦ ᐃᓚᖏᑦ ᐊᑐᓕᓂᐅᓪᓗᑎᒃ ᑐᐱᒃᓴᔭᖏᑦ ᑕᖅᓴᖃᖃᑎᖃᑲᓴᒃᑐᑦ ᓯᑯᒥᒃ, ᐊᓯᖏᓪᓗ ᑐᐱᑦ ᑕᖅᓴᐅᓪᓗᑎᒃ ᐊᐅᐸᔮᖓᔪᑦ ᖁᖅᓱᖅᑕᓪᓗ.

ᑐᑉᐸᒃᓴᖅᐸᓪᓕᐊᑎᓪᓗᒋᑦ, ᕿᒧᒃᓯᐅᔾᔪᐊᕐᓂᕐᒥᒃ ᑲᒪᔪᑦ ᑐᐊᕕᕋᐅᔭᖅᐳᑦ. ᓵᓗᕿᑦ, ᕿᐲᑦ, ᐊᓪᓕᓃᑦ ᓱᐴᔪᓪᓗ ᐅᖅᑰᓴᐅᑎᑦ ᐅᓯᖏᐊᖅᑕᐅᓪᓗᑎᒃ ᖃᒧᑎᖕᓂᑦ ᐃᓯᐅᖅᑲᖅᑕᐅᕗᑦ ᑐᐱᖏᓐᓄᑦ. ᐅᖓᕙᖅᑐᖃᖅᐳᕐᓗ ᐃᒻᒥᐅᑎᒃᓴᒥ ᕿᓂᖅᑐᑦ ᑭᓪᓘᓯᔭᖅᑐᖅ ᑑᕐᒥᒡᓗ ᐊᓂᐅᓯᐅᖅᑐᑦ ᓂᓚᖕᒥᓪᓘᓐᓃᑦ ᐃᒻᒥᐅᕈᑎᒋᔭᒃᒥᓂᒃ. ᐊᓯᖏᓪᓗ, ᑕᐃᒫᒃᑕᐅᖅ ᐃᒋᕐᕈᓯᔭᖅᑐᑦ, ᕿᒥᖅᑯᑎᒃᓴᓂᒃ ᐊᒡᒍᐃᔪᑦ ᐃᖃᓗᖕᓂᒃ ᓇᑦᑎᕐᒥᒡᓗ, ᐊᒡᒍᖅᑕᐅᑦᑎᐊᖅᖢᑎᒃ ᕿᒻᒥᓄᑦ ᓂᖃᐅᓂᐊᕐᒪᑕ. ᓄᑕᕋᑯᓗᐃᓪᓕᑦᑕᐅᖅ ᑖᒃᑯᐊ ᐊᖅᓴᖅᐳᑦ ᑐᑭᖅᓯᖃᑦᑕᖅᖢᑎᒃ ᐊᐳᒻᒥ.

ᐃᒡᓚᕐᕙᓘᑉ ᐊᓯᖏᑦ, ᑐᑉᐸᒃᓴᖅᓯᒪᑦᑎᐊᓕᕋᒥᒃ ᐅᓂᒃᑳᓴᓗᒃᑐᑦ ᖁᕕᐊᓱᒃᐸᓚᑦᑎᓪᓗᑎᒃ, ᐊᐅᓚᐅᑎᕐᕙᓗᒡᓗ, ᑕᖕᒫᖅᓯᒪᕝᕕ ᑲᔾᔮᕐᓇᖅᖢᓂ ᓂᖃᑑᓪᓗᓂᓗ. ᐃᒃᐱᖕᓇᕐᓂᖃᕐᒪᑦ ᖁᒻᒧᑦ ᑕᑯᓂᐊᔭᓐᓇᖅᑐᒥᒃ ᐅᐊᖕᓇᒧᓪᓗ ᕿᕕᐊᕈᒥᓇᖅᑐᒥᒃ, ᑕᐅᕗᖓ ᑕᑯᔪᓐᓇᕐᕕᓕᒫᑦᑎᓐᓄᑦ ᑕᑯᓇᓱᖕᓇᖅᑐᒥᒃ ᐅᑎᒧᓪᓗ ᑎᑭᕝᕕᒋᖅᑲᐅᔭᒥᓄᑦ.

ᐅᐊᑦᑎᐊᖏᓐᓇᖅ, ᐃᓱᒪᒋᔭᒥᒃ ᓴᒃᑯᑦᑎᓇᖅᓯᒋᕗᖅ, ᐊᒡᒋᖅᑐᓂᒃ ᓯᑭᑑᓂ ᑕᑯᒃᓴᐅᔪᖃᓕᕐᒪᑦ ᒪᕐᕉᖕᓂᒃ ᑐᖑᔪᖅᑖᖕᓂ ᓴᐃᒻᒪᑎᑕᓕᖕᒥ ᑭᖑᓕᕇᖑᓪᓗᑎᒃ ᕿᑭᖅᑕᓂᒃᑯᑦ ᓴᐃᒻᒪᑎᖁᑎᖏᓐᓂᒃ. ᐅᖓᑖᓂ, ᐅᓪᓗᕆᐊᖅᑕᖃᕆᓪᓗᓂ ᐅᖓᓯᒃᑐᒥᐅᒍᓗᐊᖅ, ᑕᖅᓵᖅᑐᑯᓘᓪᓗᓂ ᐅᔭᐅᒪᔪᖅ.

ᑕᖕᒫᖅᑐᑦ ᑕᐅᑐᒃᐳᑦ, ᖃᔅᓯᒐᓚᖕᓂᒃ. ᐅᖓᓯᒧᑦ ᒥᑭᑦᑑᑎᑦ, ᓱᖅᑯᐃᓇᖅᓯᕙᓪᓕᐊᓪᓗᓂ ᕿᒧᒃᓯᖅ ᐊᒡᒋᓕᖅᑐᖅ 12-ᓂᒃ ᕿᒻᒥᓕᒃ, ᖃᑯᖅᑕᒥ ᐊᑐᖅᑐᖅ ᓈᓴᐅᑎᓕᖕᒥᒃ, ᓈᓴᐅᑎᖓᓗ ᑐᖑᔪᕐᒪᑦ ᑕᖅᓴᐅᑦᑎᐊᖅᖢᓂ. ᑕᐃᕕᑎ ᐆᔪᑯᓘᓪᓗᓂ ᐃᒃᐱᐊᕐᔪᖕᒥᐅᑕᖅ, ᓯᕗᓪᓕᖅᐹᖑᓪᓗᓂ ᑎᑭᓕᖅᑐᖅ. ᐊᕐᕕᓂᓖᕋᕐᓗᑎᒃ ᐅᑯᐊ ᑕᖕᒫᖃᑦᑕᕐᓂᐊᖅᑐᑦ, ᓯᕗᓪᓕᕐᐹᖓᓐᓂᒃ ᑕᖕᒫᕐᕕᒋᓂᐊᖅᑕᒥᓅᓕᖅᑐᖅ 2022ᒥ ᓄᓇᕗᒥ ᐸᖓᒡᒍᔾᔨᓂᖃᖅᑎᓪᓗᒍ, ᓄᓇᕗᒥ ᕿᒧᒃᓯᐅᔾᔪᐊᕐᓂᖅ ᐱᐅᓂᖅᐹᖑᖃᑕᐅᔪᖅ.

ᓯᕿᓂᖅ ᓂᐱᓕᖅᑐᖅ ᕿᒧᒃᓯᖅᑎ ᐱᔭᕇᕐᕕᖕᒧᑦ ᑎᑭᓕᖅᑎᓪᓗᒍ ᐅᓪᓘᑉ ᐊᐃᑉᐸᖓᓂ.
Expand Image
ᓄᓇᖑᐊᖅ: ᑯᕆᔅ ᐳᕋᒃᓕ. ᓇᑭᖔᖅᓯᒪᓂᖏᑦ: ᓄᓇᐃᑦ ᐊᑎᖏᑦ: ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᑐᖅᑏᑦ; ᓄᓇᖑᐊᖓ: ᖃᖓᑦᑕᖅᑎᑕᐅᓯᒪᔪᖅᑎᒍᑦ LANDSAT8 MOSAIC – ᐊᐃᕐᕆᓕᐅᑉ ᑕᖅᑭᖓᓂ 2000 – 2018, NASA
Expand Image

ᓯᕿᓂᖅ ᓂᐱᑎᓪᓗᒍ ᓂᒡᓚᕐᒪᑦ ᑕᑯᒥᓇᑦᑎᐊᓕᓚᐅᕐᒪᑦ ᓯᓚ ᑐᖑᖅᑐᐊᖓᔪᓂᒃ, ᑐᖑᔪᖅᑕᓂᓪᓗ ᑕᖅᓴᖃᐅᓕᖅᖢᓂ, 13 ᕿᒧᒃᓯᐅᔾᔪᐊᖃᑕᐅᔪᑦ ᐊᑕᖏᖅᖢᑎᒃ ᑎᑭᓯᒪᓕᖅᑎᓪᓗᒋᑦ. ᑎᐅᕆ ᐅᔭᕋᒃ, ᐱᖓᔪᒋᔭᐅᓪᓗᓂ ᑎᑭᖅᑲᐅᓪᓗᓂ, ᖁᕕᐊᒋᓚᐅᖅᐸᐅᒃ ᓯᕿᕐᖑᔭᒃᑰᕈᑎᓂ (ᐅᐊᔅᓯᒃᑯᑦ) ᐊᒻᒪᓗ ᐅᓪᓗᕐᒥ ᓯᕗᓪᓕᖅᐹᖓᓐᓂ ᐊᓂᒎᔾᔨᔪᐊᓐᓅᖕᒪᑦ, ᐊᑯᓂ ᕿᒧᒃᓯᐅᔾᔪᐊᓚᐅᖏᒻᒪᑕ ᓄᕙᒡᔪᐊᕐᓇᖅ ᐱᓪᓗᒍ, ᐅᑭᐅᓄᑦ ᐱᖓᓱᓄᑦ.

ᑖᓐᓇ, ᐃᒡᓗᓕᖕᒥ ᐃᓅᓂᑰᒐᓗᐊᕋᒥ ᐱᕈᖅᓴᓪᓗᓂᓗ, ᐃᑭᒪᖃᑦᑕᕐᓂᑰᓪᓗᓂᓗ ᕿᒧᒃᓯᓂ ᐊᑖᑕᖓ ᕿᒧᒃᓯᓕᕌᖓᑦ, ᓇᖕᒥᓂᖅ ᕿᒻᒥᖃᓚᐅᖏᓚᖅ ᕿᒧᒃᓯᐅᑎᒃᓴᒥᓂ ᑭᓯᐊᓂ ᒫᓐᓇᕋᑖᐸᓗᒃ ᐅᑭᐅᖅᑲᐃ ᐊᕐᕕᓂᓖᑦ (ᐱᖓᓲᔪᖅᑐᑦ) ᕿᒧᒃᓯᐅᑎᒃᓴᖃᓕᕐᓂᑰᖕᒪᑦ, ᐱᖃᑎᖓᑦᑕ ᐃᓚᖓ ᕼᐊᑭᖃᑎᒋᓲᖓ ᕿᒻᒥᖅᑖᕈᒪᔪᒥᒃ ᐊᕐᕕᓂᓕᖕᓂᒃ ᕿᓂᓕᕐᒪᑦ ᐱᓚᐅᖅᓯᒪᒐᒥᒋᑦ.

ᕿᒧᒃᓯᖃᓕᖅᑎᓪᓗᒍ ᐊᔪᕐᓇᕐᓂᖅᐹᖑᖃᑕᐅᓚᐅᖅᑐᖅ ᕿᒧᒃᑎᓐᓇᓱᒋᐊᖏᑦ ᓱᑲᓴᕆᐅᖅᓴᓂᕐᓗ ᐃᖏᕐᕋᓯᖁᓪᓗᒋᑦ.  “ᐅᕙᓐᓄᐃᓐᓈᓗᒃ, ᐅᓇᓪᓗᑎᒃ, ᐱᖃᑦᑕᓚᐅᕐᒪᑕ ᕿᒧᒃᑎᓐᓇᓱᒃᑲᓗᐊᖅᖢᒋᑦ, ᐃᖏᕐᕋᔪᒪᓇᑎᒃ,” ᐃᖅᑲᐅᒪᕗᖅ ᑎᐅᕆ ᐅᔭᕋᒃ ᑕᐃᒪᓐᓇ, ᐃᒡᓚᖅᖢᓂ.  “ᖁᕕᐊᓱᑐᐃᓐᓇᑦᑎᐊᓚᐅᕐᒪᑕ; ᖃᓄᐃᓕᐅᕆᐊᖃᕐᒪᖔᕐᒥ ᖃᐅᔨᒪᓇᑎᒃ.”

ᐱᔭᕆᐊᑐᓚᐅᖅᑐᖅ, ᓱᓕᓗ ᐱᔭᕆᐊᑐᓪᓗᓂ, ᐅᖃᖅᐳᖅ ᑎᐅᕆ ᐅᔭᕋᒃ, ᓂᕈᐊᒐᒃᓴᕈᖅᑎᑕᐅᖃᓯᐅᑎᓯᒪᔪᖅ ᓂᔾᔭᐅᓯᔭᖅᑎᐅᓂᖓᓄᑦ ᔫᓄᓄᑦ. ᐅᓪᓗᖅ ᐊᐃᑉᐱᕌᖓᑦ ᕿᒥᕆᔭᖅᑐᖅᐸᒃᑕᖏᑦ ᕿᒧᒃᓯᑲᑕᖏᑦᑕᕌᖓᑦ ᐊᒻᒪᓗ ᖃᐅᑕᒫᑦ ᕿᒥᕆᔭᕆᐊᖃᖅᐸᒃᖢᓂᒋᑦ ᕿᒧᒃᓯᑲᑕᒃᑖᖓᒥ. ᕿᒻᒥᖏᑦᑕ ᓂᕿᖏᑦ ᓇᖕᒥᓂᖅ ᐊᖑᓇᓱᒃᐸᒃᑕᖏᑦ, ᐊᒻᒪ ᐊᖑᔭᖏᑦ, ᓇᑦᑎᐅᒃᐸᑦ, ᐊᐃᕕᖅ ᑭᓱᑐᐃᓐᓇᕐᓘᓐᓃᑦ ᐱᔭᖓ ᐊᕐᕌᒍᑉ ᐃᓗᐊᓂ. ᐊᐅᔭᒃᑯᑦ ᕿᒧᒃᓯᐅᑎᒋᕙᖏᑕᖏᑦ, ᐊᐱᑐᐊᕐᒪᑦ ᑭᓯᐊᓂ, ᑕᒫᓂᖃᐃ ᓄᕕᐱᕆᐅᑉ ᑕᖅᑭᖓᓂ ᕿᒧᒃᓯᖃᑦᑕᓕᓲᖅ ᑕᐅᕗᖓ ᔫᓂᒧᑦ ᔪᓚᐃᒧᓘᓐᓃᑦ ᑎᑭᑦᖢᒍ. ᓂᒪᔭᒃᑎᓐᓇᓱᐃᓐᓇᖅᐸᒃᖢᓂᒋᑦ, ᐸᖓᓕᒃᑎᑦᑕᖅᑐᖅᐸᒃᖢᒋᑦ 10 ᑭᓛᒥᑐᓪᓗᐊᓂᒃ ᐅᓪᓗᑦ ᐱᖓᑦᑎᕌᖓᑦ, ᖃᐅᔨᒪᔾᔪᑎᒋᕙᒃᖢᒍᓗ ᐅᓪᓚᒃᑐᓄᑦ, ᐱᓱᕋᔪᓄᑦ, ᓯᐊᕐᕆᔭᐅᑎᑯᑖᒃᑯᓘᓐᓃᑦ ᖃᐅᔨᒪᒋᐊᕈᑕᐅᓲᑦ ᖃᓄᖅ ᐅᖓᓯᒃᑎᒋᔪᒨᖅᓯᒪᓕᕐᒪᖔᑕ ᐅᖄᓚᐅᑎᕋᓛᒃᑯᑦ.

ᐃᓕᑦᑐᕐᓗᒎᔭᕆᐊᖃᖅᓯᒪᖕᒥᖕᒪᑦ, ᐅᖃᐅᔾᔭᐅᕙᒃᖢᓂᓗ ᐃᓐᓇᕐᓄᑦ ᓄᓇᖅᑲᑎᒥᓄᑦ ᐊᑖᑕᒥᓄᓪᓗ – ᐱᓇᓱᐃᓐᓇᕐᓗᒍᑦᑕᐅᖅ ᑭᓯᐊᓂ ᐊᔪᕈᓐᓃᖅᓴᖃᑦᑕᕐᓗᓂ. ᐊᑯᓂᕈᓗᒃ, ᐃᒻᒥᓂᒃ ᕿᒧᒃᓯᖅᑎᐅᒋᐊᒃᓴᒥᓂᒃ ᑕᐃᔪᓐᓇᖏᓚᐅᑲᓚᐅᖅᑐᖅ, ᑭᓯᐊᓂ ᕿᒧᒃᓯᖅᑎᐅᓂᕋᖅᑕᐅᔪᓐᓇᖅᓯᒐᒥ ᓄᓇᖅᑲᑎᖏᑦᑕ ᐃᓐᓇᖏᓐᓄᑦ ᐃᒻᒥᓂᒃ ᑕᐃᒪᓐᓇ ᐃᓱᒪᒋᔪᓐᓇᖅᓯᓂᑰᓪᓗᓂ.

ᑕᐃᒪᖓᓂᓪᓕ, ᕿᒻᒥᖁᑎᖏᑦ 15-ᖑᓕᖅᑐᑦ ᒪᕐᕉᒡᓗ ᕿᒻᒥᐊᕐᔪᖁᑎᖏᒃ, ᕿᒻᒥᐊᕐᔪᕈᓘᑎᓪᓗᒋᑦ ᐊᑦᑎᖅᐸᒃᖢᒋᑦ ᑕᐅᑦᑐᖏᑦᑕᐅᖅ ᐃᓕᖅᑯᓯᖏᓪᓗ ᒪᓕᒃᖢᒋᑦ. ᐊᑕᕕᒋᓇᖅᑐᑦ, ᑕᐃᒪᓐᓇᑦᑕᐅᖅ, ᕿᒧᒃᓯᐅᑕᐅᖏᑦᑑᒐᓗᐊᓂᒃ ᕿᒻᒥᖃᓲᑦ ᐱᕙᖕᒪᑕ, ᕿᒻᒥᑎᒃ ᐃᓚᓕᐅᑎᓪᓗᒋᑦ ᐊᖏᕐᕋᒥᓄᑦ ᐃᓅᓯᕐᒥᓄᓪᓗ ᐱᓐᓇᕆᓪᓗᒋᑦᑕᐅᖅ ᐱᓇᖅᑐᑦ. “ᓯᓚᒥᐅᑕᕆᓲᕗᑦ ᑭᓯᐊᓂ.”

ᑕᐃᒃᑯᐊᓕ ᐃᒡᓗᒥᐅᑕᕆᔭᐅᓲᑦ ᐃᒡᓗᖔᖓᒍᑦ, ᕿᒻᒦᑦ ᐃᓄᐃᑦ ᕿᒻᒥᖁᑎᖏᑦ ᕿᒧᒃᑎᐅᒐᒥᒃ ᐃᖅᑲᓇᐃᔮᒃᓴᖃᕐᒪᑕ, ᓯᓚᒥᐅᑕᐅᓪᓗᑎᒡᓗ ᑕᐃᒪᓐᓇ ᐃᓕᖅᑯᓯᖃᕐᕕᐅᓲᑦ. “ᓱᖏᐅᖓᑎᑦᑕᐃᓕᓲᕗᑦ ᓯᓚᒥᐅᑕᐅᑎᓐᓇᓱᒃᖢᒋᑦ,” ᑎᐅᕆ ᐅᖃᖅᐳᖅ.

ᑲᓇᑕᒥ ᐃᓄᐃᑦ ᕿᒻᒥᖏᑦ (ᑕᐃᒫᒃ ᐊᑎᖃᖅᑎᑕᑦ ᖃᓪᓗᓈᑎᑐᑦ) Canadian Inuit Dog ᐊᓯᔾᔨᓗᐊᖅᓯᒪᖏᑦᑐᑦ ᐊᕐᕌᒍᑦ 2,000 ᐃᓗᐊᓂ. ᓄᓇᖃᖅᑳᖅᓯᒪᔪᑦ ᑕᒫᖓᔭᓪᓚᕆᐅᓪᓗᑎᒡᓗ ᐃᓄᐃᑦ ᓴᓂᐊᓂ, ᑕᐃᒪᓐᓇ ᑕᑎᒌᒃᑎᒋᓂᖏᑦ ᓴᖏᔫᓯᒪᔪᖅ ᑭᖑᕚᕇᖕᓄᑦ ᑲᔪᓯᑎᑕᐅᓯᒪᓪᓗᓂ ᐊᕙᖓᑐᖄᓗᖕᓂᑦ.

ᕿᒧᒃᓯᖃᑕᐅᔪᖅ ᔮᔅᓱᐊ ᕼᐊᐅᓕ ᑎᑭᓕᖅᐳᖅ ᑕᖕᒫᕐᕕᒃ 1ᒧᑦ.
Expand Image

ᑕᒫᓂᕈᔪᖃᐃ 1966, ᐱᖓᓱᑦ ᕿᒻᒦᑦ ᐊᖁᐱᕗᑦ ᓯᑯᒥ ᕿᑲᖅᑐᑦ ᐃᒃᐱᐊᕐᔫᑉ ᖃᓂᒋᔭᖓᓂ.  ᑕᐃᔅᓱᒪᓂ ᒨᓯᓯ ᐆᔪᑯᓗᒃ 16-ᓂᒃ ᐅᑭᐅᖃᖅᑎᓪᓗᒍ ᕿᒻᒥᕆᓚᐅᖅᑕᖏᑦ ᕿᒻᒥᑦᑎᐊᕙᓪᓚᕆᐅᓪᓗᑎᒃ ᐃᓱᒪᕋᖅᑐᔪᑦᑎᐊᕙᐅᓪᓗᑎᒡᓗ. ᒨᓯᓯ ᐆᔪᑯᓗᒃ ᐅᖃᐅᔾᔭᐅᓯᒪᔪᖅ, ᕿᒻᒥᓂᐊᖅᑎᐅᒡᒎᖅ ᖁᑭᓚᐅᖅᓯᒪᔭᖏᑦ ᐃᐲᖔᕐᒪᑕ (ᓄᓇᓕᕈᖅᐸᓪᓕᐊᓕᖅᑎᓪᓗᒍ ᐃᒃᐱᐊᕐᔪᒃ, ᐃᓄᒋᐊᖕᓂᖅᓴᐅᓂᖓᓄᓪᓕ ᕿᒻᒦᑦ ᑕᒫᓂᕐᕆᔭᕆᐊᖃᖏᒻᒪᑕ, ᐃᐲᖔᕆᐊᖃᕋᑎᒡᓗ). ᐃᓱᕋᖅᑐᔪᖃᕈᓐᓃᕋᒥ ᕿᒧᒃᓯᕐᓂᕐᒥᒃ ᕿᒻᒥᖃᕐᓂᕐᒥᒡᓗ ᖁᔭᓈᖅᓯᓕᓚᐅᖅᓯᒪᕗᖅ.

ᒨᓯᓯ ᐆᔪᑯᓘᑉ ᐊᑐᖅᑕᖓ ᑕᐃᔅᓱᒪᓂ ᑖᓐᓇᑐᐊᖑᓚᐅᖏᓚᖅ. ᐊᕐᕌᒍᑦ 25 ᐃᓗᐊᓂ ᐊᓂᒍᖅᑎᓪᓗᒋᓪᓗ ᓄᓇᕐᔪᐊᕐᒥ ᐅᓇᑕᕕᒡᔪᐊᕐᓂᖅᑕᖃᓚᐅᖅᑎᓪᓗᒍ, ᐃᓄᐃᑦ ᓄᓇᖓᓐᓂ ᕿᒻᒦᔭᖅᑕᐅᖃᑦᑕᓕᓚᐅᖅᐳᑦ ᐃᓄᐃᑦ ᐃᓕᖅᑯᓯᖓ ᓱᑕᐃᖅᑕᐅᓪᓗᓂ ᓱᕖᕈᑦᑕᐅᓪᓗᓂᓗ.

ᐊᕐᕌᒍᑦ ᐊᕙᑎᑦ ᐊᓂᒍᖅᓯᒪᓕᖅᑐᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ, ᒪᑭᕝᕕᒃᑯᐊᓪᓗ ᐊᔭᐅᖅᑐᐃᓕᓚᐅᕐᒪᑕ ᑲᓇᑕᐅᑉ ᒐᕙᒪᒃᑯᖏᓐᓂ ᖃᐅᔨᒋᐊᕐᓂᖃᖁᔨᓪᓗᑎᒃ ᓱᖅᑯᐃᖅᓯᒋᐊᖁᔨᒧᑦ ᓲᖅ ᐃᓄᐃᑦ ᕿᒻᒥᖁᑎᖏᑦ ᕿᒧᒃᓯᐅᑎᖏᓪᓗ ᑐᖁᕋᖅᑕᐅᓐᓂᑰᖕᒪᖔᑕ ᐅᑭᐅᑦ 1950 ᐊᒻᒪᓗ 1975 ᐊᑯᓐᓂᖓᓐᓂ.

ᐊᕐᕌᒍᖓᓂ 2005, ᐊᑯᓂ ᑐᒃᓯᕋᐅᑕᐅᓪᓗᓂ, ᑲᓇᑕᐅᑉ ᒐᕙᒪᖓ ᑎᓕᓯᓕᓚᐅᖅᐳᖅ ᐳᓖᓯᖁᑎᒥᖕᓂᒃ Royal Canadian Mounted Police ᖃᐅᔨᓴᖁᓪᓗᒋᑦ. ᐊᕐᕌᒍᒻᒪᑦ, ᐳᓖᓯᒃᑯᑦ ᓇᓗᓇᐃᕆᕗᑦ ᕿᒻᒦᔭᕐᔪᐊᕐᓂᖃᓚᐅᖏᓐᓂᖓᓂᑭᓯᐊᓂᓕ ᕿᒻᒦᑦ ᐃᐲᖔᖅᑐᑦ ᑐᖁᕋᖅᑕᐅᖃᑦᑕᖅᖢᑎᒃ ᐃᓄᐃᑦ ᓄᓇᓕᖕᓃᑦᑐᑦ ᐊᑦᑕᕐᓇᖅᑐᒦᖁᔭᐅᒐᑎᒃ ᐅᓗᕆᐊᓇᖅᑐᒦᖃᑦᑕᖁᓇᒋᓪᓗ. ᐊᐃᑦᑖᕈᓱᒧᑦ ᐅᒃᐱᕈᓱᑦᑎᐊᒐᑎᒡᓗ, ᕿᑭᖅᑕᓂ ᓱᓕᔪᓂᒃ ᑭᒡᓕᓯᓂᐊᖅᑏᑦ, ᓄᐃᑕᐅᓕᓚᐅᖅᐳᑦ ᑕᒪᒃᑯᐊᖅ ᐃᓄᐃᑦ ᐊᑐᖅᓯᒪᔭᖏᑦ ᓱᓕᓂᒃᑯᑦ ᖃᐅᔨᒪᔭᐅᓕᖁᓪᓗᒋᑦ ᑐᓴᐅᒪᔭᐅᑦᑎᐊᕐᓂᐊᕐᒪᑕᓗ.

ᐊᕐᕌᒍᓄᑦ 7-ᓄᑦ ᐊᓱᐃᓛᒃ, ᐃᓄᖕᓄᑦ ᓯᕗᓕᖅᑕᐅᓪᓗᓂ ᑮᓇᐅᔭᖃᖅᑎᑕᐅᓪᓗᓂᓗ ᐃᓄᐃᑦ ᑎᒥᖁᑎᖏᓐᓄᑦ ᑲᑎᖅᓱᐃᓕᓚᐅᖅᐳᑦ ᑎᑎᖅᑲᖁᑎᕕᓂᕐᓂᒃ ᓂᐱᓕᐅᖅᓯᒪᔪᒃᑯᓪᓗ ᐊᐱᖅᓱᖃᑦᑕᖅᖢᑎᒃ 345 ᐅᖓᑖᓃᑦᑐᓂᒃ ᑕᑯᖃᑦᑕᖅᓯᒪᔪᓂᒃ ᐊᖅᑯᓵᖅᓯᓂᑯᓂᒡᓗ – ᐆᔪᑯᓗᒃ ᐱᖃᑕᐅᓪᓗᓂ – ᑎᑎᖅᑲᑎᒎᖓᓕᖁᓪᓗᒋᑦ ᐊᑐᖅᑕᐅᓚᐅᖅᑐᑦ ᐃᓕᖅᑯᓰᖅᓯᓇᓱᖕᓂᐅᓚᐅᕐᒪᑦ ᐅᑭᐅᖅᑕᖅᑐᒥᐅᓂᒃ, ᕿᒻᒥᖃᕈᓐᓃᖅᑎᑕᐅᓇᓱᖕᓂᖅ ᐃᓚᒋᓪᓗᒍ ᓄᓇᓕᖕᓄᑦ ᓅᓐᓂᐊᕐᒪᑕ ᐊᐅᓪᓚᐅᑎᒃᓴᖃᕈᓐᓃᕈᑎᒃ, ᕿᑐᕐᖓᖏᓪᓗ ᐃᓕᓐᓂᐊᕆᐊᖃᑦᑕᓕᕐᓗᑎᒃ ᐃᓕᓐᓂᐊᕐᕕᓕᐊᕆᔭᐅᓯᒪᔪᓂ, ᓄᓇᓕᖕᒥᐅᑕᐅᓕᕐᓗᑎᒡᓗ.

Advertisement

“ᐃᓅᓯᕆᕙᓚᐅᖅᑕᖏᓐᓄᑦ, ᑕᐃᒪᓐᓇᓪᓚᑦᑖᑯᓘᕐᓂᐊᖏᒃᑲᓗᐊᖅᑐᒍᑦ, ᐊᒃᓱᓪᓖ ᑐᑭᓯᐅᒪᓕᕐᓂᐊᕋᑦᑕ ᓇᑭᙶᖅᓯᒪᖕᒪᖔᑕ.”

ᐃᓱᕋᖅᑐᔪᐃᖅᑕᐅᓚᐅᖅᑎᓪᓗᒋᑦ ᕿᒻᒥᖏᓐᓂᒃ, ᐆᔪᑯᓗᒃ ᐃᒡᓗᓕᐅᖅᑎᐅᖃᑕᐅᓕᓚᐅᖅᓯᒪᔪᖅ ᐃᒃᐱᐊᕐᔪᖕᒥ ᓄᒃᑎᕐᕕᒋᓯᒪᕋᒥᔾᔪᒃ ᓄᓇᓕᐅᔪᖅ. ᐅᖃᖅᓯᒪᓪᓗᓂ ᓄᓇᓕᖕᓄᑦ ᓄᒃᑎᕐᓗᑎᒃ ᑭᓯᐊᓂᐅᖂᔨᓯᒪᖕᒪᑦ ᐊᓯᐊᒎᕐᕕᖃᕋᓂᓗ. “ᖃᐅᔨᒃᑲᖅᑕᐅᓪᓗᑕ ᐃᖅᑲᓇᐃᔮᖃᕈᓐᓇᔾᔮᖏᓐᓇᑦᑕ ᐃᓕᓐᓂᐊᖏᒃᑯᑦᑕ,” ᑐᓵᔨᑎᒍᑦ ᑕᐃᒪᐃᓕᕗᖅ ᕿᑭᖅᑕᓂ ᓱᓕᔪᓂᒃ ᑭᒡᓕᓯᓂᐊᖅᑎᒃᑯᓐᓄᑦ ᐅᓂᒃᑳᖅᑕᒥᓂᒃ ᐊᕐᕌᒍᖅ 2008-ᖑᑎᓪᓗᒍ. “ᐃᓅᓯᕗᑦ ᑲᑕᖓᓕᕐᓂᑰᕗᖅ ᑕᐃᔅᓱᒪᓂ ᐊᑐᕈᓐᓃᖅᐸᓪᓕᐊᓕᖅᖢᑎᒍᓪᓗ.”

ᐊᕐᕌᒍᑦ 30 ᐃᓗᐊᓂ, ᐆᔪᑯᓗᒃ ᓇᖕᒥᓂᖅ ᐱᓕᕆᕕᖕᒥᓂ ᓴᖅᑭᑦᑎᓕᓚᐅᖅᐳᖅ ᐱᕙᓪᓕᐊᓕᖅᖢᒍ, ᕿᒻᒥᖁᑎᓂᓗ ᐱᕙᓪᓕᐊᓪᓗᓂᒋᑦ, ᐊᒻᒪᓗ 1999 ᐅᑭᐅᖓᓐᓂ, ᓄᓇᖅᑲᑎᓂ ᑎᓴᒪᑦ ᕿᒧᒃᓯᐅᔾᔪᐊᖃᑎᒋᓕᓚᐅᖅᐸᖏᑦ ᖁᕕᐊᓲᑎᒋᓯᓐᓇᖅᖢᒍ ᓄᓇᕗᖃᓕᕐᓂᖅ. ᕿᑭᖅᑖᓘᑉ ᐅᐊᖕᓇᖓᓂ, North Baffin Quest, ᕿᒧᒃᓯᐅᔾᔪᐊᕐᓂᖅ ᑕᐃᒪᓐᓇ ᑕᐃᔭᐅᓂᖃᓚᐅᕐᒪᑦ, ᑕᒪᒃᑯᓄᖓ ᐃᓄᐃᑦ ᕿᒻᒥᖁᑎᒃᓴᔭᓪᓚᑦᑖᖏᓐᓂᑐᐊᖅ ᐊᑐᕐᓗᑎᒃ ᕿᒧᒃᓯᐅᔾᔪᐊᕐᓂᐅᓪᓗᓂ, ᒪᓕᒃᖢᒍ ᓄᓇᕗᒥ ᕿᒻᒥᖓ ᓇᓗᓇᐃᒃᑯᑕᐅᔪᖅ ᒐᕙᒪᖃᕐᕕᐅᓂᐊᓕᖅᑐᒥ.

ᒪᓕᒐᖏᑦ ᐱᔭᕆᐊᑐᒐᑎᒃ ᒪᓕᒐᕐᓂᖅᑑᓇᓱᓚᐅᖅᑐᑦ: ᐊᑎᓕᐅᕐᓂᕐᒧᑦ ᐊᑭᖃᕋᓂ, ᑭᓇᑐᐃᓐᓇᖅ ᕿᒧᒃᓯᐅᔾᔪᐊᖃᑕᐅᔪᒪᔪᖅ ᐱᖃᑕᐅᔪᓐᓇᕐᓗᓂ, ᖃᒧᑎᖏᑦ ᐊᒃᑎᒋᓗᑎᒃ 12 ᐊᒻᒪᓗ 14 ᐃᓯᒐᑦ ᑕᑭᓂᖃᕐᓗᑎᒃ, ᕿᒻᒥᖏᓪᓗ ᕿᒧᒃᓯᐅᑎᒋᓂᐊᖅᑕᑎᒃ ᖁᓕᑦ (10) ᑐᖔᓃᖏᓪᓗᑎᒃ ᐊᒻᒪᓗ ᐅᖓᑖᓃᖏᓪᓗᑎᒃ 12 ᕿᒻᒥᖏᑦ, ᐊᒻᒪᓗ ᐃᓄᐃᑦ ᐊᓄᒋᓲᑐᖃᖏᑎᑐᑦ ᐊᓄᖏᑦ ᑕᑭᓕᕇᖑᓗᑎᒃ ᕿᒧᒍᑎᖃᕐᓗᑎᒃ ᖃᒧᑎᒥᓄᑦ.

ᕿᒧᒃᓯᐅᔾᔪᐊᕐᓂᖅ, ᐊᑕᐅᓯᐊᑐᐃᓐᓇᐅᒋᐊᓚᐅᖅᑑᒍᓗᐊᖅ, ᖁᕕᐊᒋᔭᐅᓗᐊᒧᑦ ᕿᒧᒃᓯᖃᑕᐅᓇᓱᒃᑐᓄᑦ ᐃᓱᒪᓕᐅᕆᕗᑦ ᐸᕐᓇᐃᓯᒪᔪᓂᒃ ᐊᕐᕌᒍᑕᒫᑦ ᕿᒧᒃᓯᐅᔾᔪᐊᕐᓂᐅᖃᑦᑕᖁᔪᒥᒋᓪᓗᒍ ᓄᓇᓖᑦ ᐊᐅᓪᓚᕐᕕᐅᔪᑦ ᑎᑭᕝᕕᐅᓂᐊᖅᑐᓪᓗ ᓂᑭᑦᑖᖃᑦᑕᕐᓗᑎᒃ. ᓄᓇᕗᒥ ᐸᖓᒡᒍᔾᔨᓂᖅ ᖃᓪᓗᓈᑐᑦ ᑕᐃᔭᐅᓪᓗᓂ Nunavut Quest ᐊᓱᐃᓛᒃ ᐱᒋᐊᓯᕗᖅ.

ᓄᑕᖅᑲᑦ ᐱᙳᐊᖅᐳᑦ ᑕᖕᒫᖅᓯᒪᑎᓪᓗᒋᑦ ᑕᖕᒫᕐᕕᐅᔪᖅ 2-ᒥ.
Expand Image

ᐊᖅᑯᑎᒋᓂᐊᖅᑕᖓ ᐅᓪᓗᖅ ᐱᖓᔪᖓᓐᓂ ᐊᓄᕆᕗᖅ ᖃᓐᓂᖅᖢᓂᓗ. ᖃᑯᖅᑐᐊᓘᓕᖅᖢᓂᓗ ᐃᑉᐸᒃᓴᖓᓂ ᐅᖓᓕᐊᓂᓗ ᓯᕿᓐᓂᖅᑐᑯᓘᖏᓐᓇᓚᐅᖅᖢᓂ. ᕿᒧᒃᓯᕐᓂᕆᓂᐊᖅᑲᐅᔭᖓ ᖃᐅᒃᐸᒧᑦ ᓄᒃᑎᖅᑕᐅᓕᖅᐳᖅ.

ᐴᖅᑲᐃᔭᕆᐊᖃᕈᓐᓃᑲᓪᓚᒃᑲᒥᒃ ᑐᑉᐸᒃᓴᕆᐊᖃᕋᑎᒡᓗ, ᑕᖕᒫᖅᓯᒪᕝᕕᒋᔭᖓ ᓱᒃᑲᐃᒡᓕᑳᓪᓚᒃᐳᖅ ᕿᑲᖅᓯᓪᓗᑎᒡᓗ. ᒪᒃᑯᒃᑐᓂᒃ ᐊᓄᕆᓯᐅᑎᓂᒃ ᕿᖏᕐᕋᖅᑐᖃᖅᐳᖅ ᖃᖓᑦᑕᖅᑎᒐᕐᓂᒃ, ᐱᔪᓐᓇᕋᓗᐊᕐᒪᖔᕐᒥ ᐆᒃᑐᖅᖢᑎᒃ ᑭᓯᐊᓂ ᑲᑕᑐᐃᓐᓇᖃᑦᑕᖅᐳᖅ ᑎᖏᕐᕋᕋᓱᒃᑕᖓ. ᐃᓚᖏᓪᓗ ᐊᐅᓚᐅᑎᓂᒃ ᐊᐅᓚᔾᔭᐃᕗᑦ ᓄᒃᑭᒃᓴᐃᓂᐊᖃᒥᒃ ᐅᖄᓚᐅᑎᕋᓛᒥᓂᒃ. ᑖᑯᓄᖓ, ᑕᕝᕙ ᕿᒧᒃᓯᐅᔾᔪᐊᕐᓂᐅᑉ ᐊᓕᐊᓇᐃᔾᔪᑎᖓ ᑕᑯᐃᓐᓇᖏᑕᓂ ᑲᑎᙵᐃᓐᓇᖏᑕᖏᓐᓂᓗ ᑲᑎᙵᑦᑎᒋᐊᒃᓴᖅ ᐃᓚᒥᓂᒃ ᐱᖃᓐᓇᕆᔭᒥᓂᓗ. ᑕᐃᒪᐃᒃᑭᕗᖅ ᓇᔫᑎᑲᐃᓐᓇᓚᐅᑲᒍᓐᓇᕐᓂᖅ ᐊᐅᓪᓚᓚᐅᖏᓐᓂᕐᒥᓂ ᑕᖃᐃᖅᓯᕐᕕᖃᖅᑎᓪᓗᒋᓪᓗ, ᓄᓇᓕᖕᓂ ᖃᓂᒋᔭᖏᓐᓂᒥᐅᑕᐅᔫᒍᓗᐊᑦ ᐃᒻᒪᖃ ᖃᖓᑕᓲᒃᑯᑦ ᐃᑲᕐᕋᐅᖏᑦᑐᕐᓘᓐᓃᖑᔪᒃᑕᐅᒐᓗᐊᖅ, ᑭᓯᐊᓂ ᖃᖓᑕᓲᑦ ᐃᖏᕐᕋᓂᖏᑦ ᓈᒻᒪᓈᖅᑕᕆᐊᖃᕐᓂᖏᓐᓄᑦ, ᐃᖃᓗᒃᑎᒍᓪᓗ ᐃᓛᓐᓂᒃᑯᑦ ᓯᓂᒃᑕᓚᐅᕐᓗᓂ ᐊᖅᑯᓵᓚᐅᕐᓗᓂᐅᑎᑕᐅᕙᖕᒪᑦ ᖃᖓᑦᑕᐅᑎᕋᓱᒡᓗᓂ ᑕᒫᓃ ᐅᖓᑖᓃᑦᑐᓐᓇᖅᐳᕐᓗ $3,000.

ᑐᐲᑦ ᐊᑯᓐᓂᖏᓐᓂ, ᕿᒧᒃᓯᖅᑎᑦ ᐃᑲᔪᖅᑎᖏᓪᓗ ᓯᑭᑑᒥ ᓴᓇᔭᐅᔪᒥ ᑲᑎᙵᐅᖅᐳᑦ ᓂᒡᓚᖅᑕᐅᑎᖓᓂ ᕿᕐᓛᕈᔾᔨᓯᒪᔪᒥ ᓴᓇᔪᓂ; ᑎᐅᕆ ᐅᔭᕋᒃ ᑕᒫᓃᖃᑕᐅᓪᓗᓂ ᑕᐅᑐᒃᑐᖅ ᐸᐸᒥ ᐃᓪᓕᕆᔭᐅᑎᓪᓗᒍ, ᕿᕐᓛᕐᓂᖓ ᒥᑭᑦᑐᑯᓘᖕᒪᑦ ᑯᑐᒍᑕᐅᔪᖅ ᐸᐸᓕᖅᑕᐅᓪᓗᓂ, ᑯᑐᒍᓐᓃᕐᓂᐊᕐᒪᑦ. ᕿᒧᒃᓯᐅᔾᔪᐊᖅᑎᓪᓗᒋᑦ, ᑕᐃᒫᒃ ᕿᒧᒃᓯᐅᔾᔪᐊᖅᑐᑦ ᐱᕙᖕᒪᑕ, ᓵᓚᖃᕋᓱᑐᐃᓐᓇᖃᑦᑕᖏᒻᒪᑕ.

“ᐱᖃᑕᐅᒋᐊᖅ ᐊᖏᓂᖅᓴᐅᕙᖕᒪᑦ ᑐᓵᑲᑕᒃᖢᒋᑦ ᐅᓂᒃᑳᑲᑕᒃᑐᑦ ᐃᑲᔪᖅᑕᐅᓐᓇᖅᐸᒃᖢᓂᓗ ᖃᓄᑐᐃᓐᓇᑦᑎᐊᖅ ᐃᓄᑐᖃᐃᑦ ᐅᖃᓪᓚᒃᑎᓪᓗᒋᑦ ᐅᓂᒃᑳᖅᑎᓪᓗᒋᓪᓗ ᑐᓴᕐᓂᖅᑐᐊᓘᕙᖕᒪᑕ ᖃᓄᕐᓕ ᕿᒧᒃᓯᖅᐸᓚᐅᕐᒪᖔᑕ ᐃᓅᓯᕆᕙᓚᐅᖅᑕᖏᓐᓂᓗ,” ᑕᐃᒪᓐᓇ ᐅᖃᖅᐳᖅ.

“ᐃᓅᓯᕆᕙᓚᐅᖅᑕᖏᓐᓄᑦ, ᑕᐃᒪᓐᓇᓪᓚᑦᑖᑯᓘᕐᓂᐊᖏᒃᑲᓗᐊᖅᑐᒍᑦ, ᐊᒃᓱᓪᓖ ᑐᑭᓯᐅᒪᓕᕐᓂᐊᕋᑦᑕ ᓇᑭᙶᖅᓯᒪᖕᒪᖔᑕ.”

ᕿᒧᒃᓯᖃᑕᐅᒍᓗᐊᕈᓂ ᕿᒧᑐᐃᓐᓇᕈᓂᓘᓐᓃᑦ, ᐅᔭᕋᒃ ᐅᖃᖅᐳᖅ ᐃᓱᒪᒋᕙᖕᒪᒍ ᑕᐃᒃᑯᐊ 1950-ᖏᓐᓂ, ’60, ᐊᒻᒪ ’70 ᐊᕐᕌᒍᖏᓐᓂ ᐊᑐᖅᑕᐅᓚᐅᖅᑐᑦ ᐃᖅᑲᕐᔫᒥᕙᖕᒪᒋᑦ. “ᐃᒻᒥᓂᒃ ᐅᖃᐅᑎᕙᒃᑐᖓ ᖄᖏᖅᓯᒪᓂᖏᓐᓂᒃ ᐊᑐᕐᓂᑰᓂᖏᓐᓂᓗ,” ᐅᖃᖅᖢᓂ.

ᐊᒡᒌᓯ 19, 2019-ᖑᑎᓪᓗᒍ, ᑭᐅᕈᓕᓐ ᐱᓂᐊᑦ, ᑲᓇᑕᒥ ᒥᓂᔅᑕᐅᑎᓪᓗᒍ ᓄᓇᖃᖅᑳᖅᓯᒪᔪᓕᕆᓂᕐᒧᑦ ᐅᑭᐅᖅᑕᖅᑐᓕᕆᓂᕐᒧᓪᓗ, ᓄᑯᕕᓚᐅᕐᒪᑦ ᐃᖃᓗᖕᓂ ᑐᔪᕐᒥᕕᐊᓗᖕᒥ ᒪᒥᐊᔾᔪᑎᖃᖅᖢᓂ ᕿᑭᖅᑕᓂᒥᐅᑦ ᐃᓄᖏᓐᓄᑦ ᐊᕙᑎᑦ ᐅᑭᐅᑦ ᐅᖓᑖᓂ ᐃᓕᖅᑯᓰᖅᓯᓇᓱᖕᓂᐅᕙᓚᐅᖅᓯᒪᔪᓄᑦ ᐊᑐᐊᒐᖃᕈᑕᐅᓂᕕᕐᓄᑦ ᐃᓕᖅᑯᓯᖃᕐᕕᐅᓯᒪᓂᖏᓐᓄᓗ ᑕᐃᒪᓐᓇ ᐃᓄᐃᑦ, ᒐᕙᒪᐅᔪᒧᑦ ᐃᓄᐃᑦ ᐃᓅᓯᖏᓐᓂ ᐊᓯᔾᔨᕈᑎᕐᔪᐊᖑᓯᒪᔪᓄᑦ. ᑖᒃᑯᐊ ᐅᓂᒃᑳᖃᑦᑕᖅᓯᒪᔪᑦ ᓲᕐᓗ ᒨᓯᓯ ᐆᔪᑯᓗᒃᑎᑐᑦ, ᐊᓯᐊᓗᖏᓪᓗ ᕿᑭᖅᑕᓂ ᓱᓕᔪᓂᒃ ᑭᒡᓕᓯᓂᐊᖅᑎᒃᑯᓐᓄᑦ, ᓴᖑᑎᑦᑎᓕᕐᓂᑰᕗᑦ ᒪᒥᐊᑦᑐᓐᓇᖅᓯᓚᕿᓪᓗᑎᒃ ᒐᕙᒪᑐᖃᒃᑯᑦ 2019 ᐊᕐᕌᒍᖓᓂ ᒪᒥᐊᓐᓂᐅᔪᒧᑦ ᑕᕝᕗᖓ ᐅᓪᓗᕐᒧᑦ ᐱᓯᒪᔪᑦ.

ᒪᒥᐊᔾᔪᑎᒥᓄᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ ᑐᓂᔭᐅᕗᖅ $20 ᒥᓕᐊᓐᓂᒃ, ᕿᒻᒥᖃᖅᑐᓄᑦ ᕿᒧᒃᓯᕐᓂᕐᒧᓪᓗ ᓴᓂᕐᕙᒃᑕᐅᓪᓗᓂ $3 ᒥᓕᐊᓐᑲᓴᑦ, ᐃᓗᐊᓃᒃᑭᓪᓗᓂ ᐊᕐᕌᒍᑕᒫᑦ $100,000 ᐊᕐᕌᒍᓄᑦ ᐊᕐᕕᓂᓕᖕᓄᑦ, ᑐᕌᕐᓂᐊᕐᓗᓂ ᕿᒧᒃᓯᐅᔾᔪᐊᖅᑎᑦᑎᖃᑦᑕᕐᓂᕐᒧᑦ ᐸᖓᒡᒍᔾᔨᓂᕐᒥᒃ Nunavut Quest.

ᑕᐃᒫᒃᑕᐅᖅ ᒐᕙᒪᑖᕆᔭᐅᓂᑯ ᐱᒋᐊᕈᑕᐅᓚᐅᖅᑐᑐᑦ, ᕿᒧᒃᓯᐅᔾᔪᐊᕐᓂᖅ ᐊᓯᔾᔨᖅᐸᓪᓕᐊᓯᒪᒋᕗᖅ ᐊᕐᕌᒍᑦ 22 ᐃᓗᐊᓂ. ᑎᓴᒪᐃᓐᓇᐅᓚᐅᖅᓯᒪᔪᑦ ᒪᓕᒋᐊᓖᑦ ᐱᖁᔭᖏᑦ, ᐅᓪᓗᒥ 23-ᖑᓕᖅᖢᑎᒃ, ᕿᒧᒃᓯᐅᔾᔪᐊᕐᓂᖅ ᖁᕕᐊᓲᑕᐅᓯᓐᓇᖅᖢᓂ ᑕᓱᐃᓇᓱᖕᓂᕈᖅᓯᒪᒋᕗᖅ.

[ᐊᔾᔨᙳᐊᖅ] ᕿᒻᒦᑦ ᕿᒧᒃᓯᐅᔾᔪᐊᕈᑕᐅᔪᑦ ᓄᓇᕗᒻᒥ ᐸᖓᒡᒍᔾᔨᓂᕐᒥᒃ ᐊᓯᕈᓗᐊᖅᓯᒪᖏᓚᑦ ᑕᐅᓴᑎᓄᑦ ᐊᕐᕌᒍᓄᑦ, ᑕᐃᒫᒃᑕᐅᖅ ᐃᓄᖕᒥᓂᒃ ᐊᑕᕕᖃᕐᓂᖓ ᑕᐃᒪᐃᑦᓴᐃᓐᓇᖅᓯᒪᒋᕗᖅ.
Expand Image
ᖁᓕᓄᑦ ᐅᓪᓗᓄᑦ ᕿᒧᒃᓯᐅᔾᔪᐊᖃᑕᐅᓚᐅᖅᖢᓂ, ᑎᐅᕆ ᐅᔭᕋᒃ ᐸᓂᖕᒥᓂ ᐃᕿᑦᑎᕗᖅ, ᓯᓚ ᖃᓐᓂᖅᑎᓪᓗᒍ. ᐅᐱᕐᖓᒃᓵᒃᑯᑦ ᕿᑐᕐᖓᓂ ᕿᒧᒃᓯᖃᑎᒋᓲᖏᑦ, ᓯᓚ ᓂᒡᓚᐅᓗᐊᖅᑎᓐᓇᒍ ᑭᓯᐊᓂ, ᖃᐅᔨᒪᓂᐊᕐᒪᑕᑦᑕᐅᖅ ᕿᒧᒃᓯᕐᓂᐅᑉ ᒥᒃᓵᓄᑦ.
Expand Image
ᑎᐅᕆ ᐅᔭᕋᒃ ᖁᒻᒧᐊᒃᑕᐅᕗᖅ ᖃᒧᑎᒥᓃᑎᓪᓗᒍ ᐱᔭᕇᕐᕕᒃ ᑎᑭᓐᓇᒥᐅᒃ.
Expand Image

ᐊᐱᓯᒪᔪᐊᓘᖕᒪᑦ ᒪᐅᔭᕈᖅᖢᓂᓗ ᐅᓪᓗᖅ 10-ᖓᓐᓂ ᐃᖏᕐᕋᑦᑎᐊᕐᓇᖏᓚᖅ ᐅᔭᕋᖕᒧᑦ ᑕᑯᒃᓴᐅᑦᑎᐊᕐᓇᖏᖢᓂᓗ ᐊᖅᑯᑎᒋᓂᐊᖅᑕᖓᓂᒃ ᐅᔭᐅᒪᔪᒥ. ᐅᖓᓯᒃᓯᕙᓪᓕᐊᓪᓗᓂ ᓂᑦᑕᕿᒃᓯᕙᓪᓕᐊᓪᓗᓂᓗ, ᐊᐅᐸᖅᑐᖅ, ᖃᐅᓪᓗᖅᑐᖅ, ᖁᖅᓱᖅᑐᖅ, ᑐᖑᔪᖅᑐᕐᓗ ᓴᐃᒻᒪᑎ ᑕᑯᒃᓴᕈᖅᐸᓪᓕᐊᕗᖅ, ᑕᐃᖕᓇᓗ ᑲᓇᑕᐅᑉ ᓴᐃᒻᒪᑎᖓ ᐊᑭᖔᖓᓃᑦᑐᖅ ᑕᑯᒃᓴᐅᓕᖅᖢᓂ. ᑎᑭᓕᖅᑐᖅ, ᑎᑭᕝᕕᒋᓇᓱᒃᑕᖓᓄᑦ, ᐃᒡᓗᓕᖕᒧᑦ, ᐊᖏᕐᕋᓯᔪᖅ.

ᑕᕝᕙᓂ, ᐅᔭᕋᒃ ᐃᒃᐱᖕᓇᐃᕈᓘᔭᓕᖅᐳᖅ. ᑕᐃᑲᓂ, ᓴᐃᒻᒪᑎ ᐅᖓᑖᓂ, ᐃᓚᖏᑦ, ᐃᓪᓗᖏᑦ, ᐊᖓᖏᑦ, ᐊᔭᖏᑦ, ᐊᒃᑲᖏᑦ, ᐊᑦᑕᖏᓪᓗ, ᓄᓗᐊᖓᓗ, ᕿᑐᕐᖓᖏᑦ, ᐊᑖᑕᖓᓗ ᑕᐅᕙᓃᑦᑐᑦ. ᐊᓈᓇᓂᓗ ᐃᖅᑲᐅᒪᓪᓗᓂᐅᒃ ᑕᐃᑲᓃᖃᑕᐅᔪᒥᓇᕆᒐᓗᐊᖅᖢᒍ, ᐊᕐᕌᓂ ᓇᐅᖑᖓᒪᐅᕐᒪᑦ, ᑕᐃᒪᐅᒃᐸᑦ ᑕᐅᕙᓃᖃᑕᐅᓇᔭᖅᑐᒃᓴᐅᒍᓗᐊᖅᐳᖅ. “ᐊᓕᐊᓇᐃᒍᓱᑦᑎᐊᕋᔭᕐᒪᑦ ᑎᑭᓕᖅᑐᖓ ᑕᐅᑐᒡᓗᓂ,” ᐅᖃᖅᐳᖅ.

ᑎᑭᑎᓪᓗᒍ, ᓄᑕᖅᑲᑦ ᐅᐸᒍᑎᕗᑦ, ᑕᐃᒪᐃᖅᑲᐅᖕᒥᖕᒪᑕ ᕿᒧᒃᓯᖅᑎᓄᑦ ᑎᑭᑦᑐᓄᑦ. ᑐᙵᓴᐃᔪᓪᓗ ᑕᖅᓵᖅᑑᑉ ᐅᖓᑖᓂ ᐃᓄᐃᑦ, ᐱᖓᑎᖏᑦ, ᐃᓚᖏᑦ, ᐃᒡᓗᓕᖕᒥᐅᓪᓗ ᑐᙵᓵᕆᔪᑦ ᐊᓕᐊᓇᐃᒍᓱᒃᑐᓪᓗ. ᑕᐃᒪᐃᑉᐸᒃᑲᒥᒃ, ᖃᒧᑏᖕᓂ ᐃᑭᒪᑎᓪᓗᒍ ᖁᒻᒧᐊᒃᑕᐅᕗᖅ ᐃᓄᖕᓄᑦ ᐊᓕᐊᓇᐃᒍᓲᑕᐅᓪᓗᓂ ᑎᑭᓐᓂᖓᓄᑦ ᐱᔭᕇᖅᓯᓂᖓᓄᓪᓗ. ᑕᐃᒪᓐᓇ ᐊᓕᐊᓇᐃᒍᓱᖕᓂᖏᑦ ᕿᓚᒻᒥᐅᕙᒃᐳᖅ ᐅᕙᒻᒧᒌᖅᐸᒃᖢᑎᒡᓗ ᑖᓐᓇ ᑎᑭᓕᓵᖅᑐᖅ ᐃᓚᒥᓃᓚᐅᑲᖕᓂᐊᕐᒪᑦ, ᓱᐴᖅᑐᓚᐅᐱᓪᓚᒡᓗᓂᓗ ᓲᖃᐃᒻᒪ ᐱᔭᒃᓴᖃᕐᒥᖕᒪᑦ ᕿᒻᒥᓕᕆᓗᓂ ᐱᑐᒃᑐᕐᓗᒋᓪᓗ ᐱᔭᕆᐊᖃᕋᒥ ᐃᓂᓪᓚᒃᑎᑦᑎᐊᕐᓗᒋᑦ ᕿᒻᒥᖏᑦ.

ᐅᓪᓗᕐᒥ ᓱᓕ ᐅᑕᖅᑭᔭᕆᐊᖃᖅᐳᑦ ᓯᕿᕐᖑᔭᒃᑰᕐᓂᖏᑦᑕ ᑐᓴᒐᒃᓴᕈᖅᑎᑕᐅᓇᓱᖕᓂᖏᑦ, ᐱᕕᖃᕈᑎᒋᓕᖅᖢᒍ ᕿᒧᒃᓯᖃᑕᐅᔪᑦ ᐅᓂᒃᑳᑲᑕᒍᓐᓇᕐᕕᒋᓪᓗᓂᔾᔪᒃ ᐱᓇᓱᐊᕈᓯᐅᖅᑲᐅᔪᒥ ᐊᑐᖅᓯᒪᔭᖏᓐᓂᒃ. ᐅᓂᒃᑳᕆᔭᐅᑲᑕᒃᑑᑉ ᐃᓚᒋᓪᓗᓂᐅᒃ ᐅᓪᓗᓄᑦ ᑎᓴᒪᓄᑦ ᓯᓚ ᐱᔾᔪᑎᒋᓪᓗᒍ ᕿᑲᕆᐊᖃᓚᐅᕐᓂᖏᑦ ᐊᒻᒪᓗ ᑭᖑᕙᕆᐊᒐᓛᒍᑎᒋᓚᐅᖅᑕᖓ ᑕᐃᒪᐃᓐᓂᖓᓄᓪᓗ ᕿᒻᒥᑎᒃ ᐅᓯᓕᖅᓱᖅᖢᒋᑦ ᐊᓯᐊᓄᑦ ᓯᑭᑑᒃᑯᑦ ᑕᖕᒫᕆᐊᖃᓚᐅᖅᑐᑦ ᑭᖑᕙᓯᓕᕐᓂᑎᒃ ᐱᓪᓗᒍ.

ᖃᐅᒃᐸᕈᕐᒪᑦ ᐅᓐᓄᒃᑯᑦ 6 p.m. ᐱᙳᐊᕐᕕᐅᑉ ᓯᕗᕌ ᓯᑭᑑᓄᑦ ᑕᑕᑉᐳᖅ, ᕿᒧᒃᓯᖃᑕᐅᓚᐅᖅᑐᓪᓗ ᐃᑲᔪᖅᑎᒋᔭᖏᓪᓗ ᐃᓄᐃᓪᓗ ᑕᑯᔭᖅᑐᖅᓯᒪᔪᑦ ᐃᓄᒋᐊᒃᐳᑦ ᐱᙳᐊᕐᕕᖕᒥ, ᐃᓚᖏᓪᓗᑦᑕᐅᖅ ᐱᖃᑕᐅᓪᓗᑎᒃ ᐊᒻᒪᓗ ᑲᒪᔨᐅᒧᑦ ᕿᒧᒃᓯᐅᔾᔪᐊᕐᓂᕐᒥ, ᐃᒡᓗᓕᖕᒥᐅᑕᓕᒫᑲᓴᐃᓪᓗ. ᑖᓐᓇ ᐅᓐᓄᒃ ᐊᑐᖅᑕᐅᔪᖅ ᑕᒪᒃᑯᓂᖓ ᐊᑐᕐᓂᖃᖅᐳᖅ ᐅᖃᓪᓚᒃᑐᖃᖃᑦᑕᖅᖢᓂ, ᐸᐃᑉᐹᓂᒃ ᑐᓂᔭᐅᓪᓗᑎᒃ ᐊᒻᒪᓗ ᓲᖃᐃᒻᒪ ᓯᕿᕐᖑᔭᒃᑯᑦ ᖃᓄᑎᒋᐅᓚᐅᕐᒪᖔᑕ ᕿᒧᒃᓯᕐᓂᕆᔭᖏᑦ, ᑭᖑᓪᓕᖅᐹᖓᓐᓂᒃ ᓯᕗᓪᓕᖅᐹᖓᓐᓄᑦ. ᐊᑕᐅᓯᐅᓈᖅᑎᑕᐅᓪᓗᑎᒃ, ᕿᒧᒃᓯᖃᑕᐅᓚᐅᖅᑐᑦ ᐊᑎᖏᑦ ᑕᐃᒍᖅᑕᐅᕗᑦ, ᐱᒋᐊᕈᑕᐅᓪᓗᓂ ᐃᑲᕐᕋᓄᑦ 45-ᓄᑦ ᐊᒻᒪᓗ 28 ᒥᓂᑦ 20 ᓴᑲᓐᓯᓄᑦ, ᕿᓚᒻᒥᐅᓂᖅᐹᖓᓐᓄᑦ ᓵᓚᒃᓴᖅᑐᒧᓪᓗ ᑎᑭᖢᒍ.

ᐅᔭᕋᒃ ᐃᖏᕐᕋᓪᓗᓂ 500 ᑭᓗᒦᑕᓂᒃ ᐃᑲᕐᕋᑦ 30, 23 ᒥᓂᑦ, ᐊᒻᒪᓗ 20 ᓴᑲᓐᓯᓂᒃ, ᑎᓴᒪᒋᔭᐅᓪᓗᓂ ᕿᒧᒃᓯᐅᔾᔪᐊᖅᑐᓂ, ᓯᕗᓪᓕᕐᒥ ᑕᓪᓕᒪᒋᔭᐅᓚᐅᖅᓯᒪᓪᓗᓂ ᐊᒃᓱᓪᓕ ᖁᕝᕙᖅᐹᓪᓕᕐᒪᑦ ᐊᓕᐊᓇᐃᒍᓱᑦᑎᐊᖅᐳᖅ. ᓯᕗᓪᓕᐅᕌᕐᔪᒃᖢᑎᒃ ᓖ ᐃᓄᐊᕋᖅ ᒥᑦᑎᒪᑕᓕᖕᒥᐅᑕᖅ ᐊᒻᒪᓗ ᑕᐃᕙᑦ ᐆᔪᑯᓗᒃ, ᓯᕗᓪᓕᖅᐸᐅᓚᐅᕐᒪᑎᒃ ᐅᓪᓗᖓᑦᑕ ᓯᕗᓪᓕᖅᐹᖓᓐᓂᒃ. ᓵᓚᒃᓴᖃᑦᑕᖅᓯᒪᔪᕐᓗ ᔫᓇ ᖃᐅᓐᓇᖅ ᐱᖓᔪᒋᓕᖅᑕᖓᓐᓂ ᓵᓚᒃᓴᒃᑲᓐᓂᖅᖢᓂ ᐃᑲᕐᕋᖏᑦ ᐃᒪᓐᓇᐅᓪᓗᑎᒃ 28, 43 ᒥᓂᑦ ᐊᒻᒪᓗ 55 ᓴᑲᓐᓯᑦ.

ᐊᓂᐅᕋᓚᐅᖅᑎᓐᓇᒋᑦ, ᓇᑎᖓᓗ ᓴᓗᒻᒪᖅᑕᐅᓚᐅᖅᑎᓐᓇᒍ ᐅᓐᓅᔪᖅ ᒧᒥᖅᑐᐊᓘᖅᑲᐅᕗᑦ, ᒧᒥᓚᐅᖅᑎᓐᓇᒋᓪᓗ ᑐᓴᖅᑎᑕᐅᓪᓗᑎᒃ ᐊᕐᕋᒎᓛᖅᑐᖅ 2023ᒥ ᕿᒧᒃᓯᐅᔾᔪᐊᕐᓂᖅ ᐃᒡᓗᓕᖕᒥ ᐱᒋᐊᓛᕐᓂᖓᓂᒃ ᐃᒃᐱᐊᕐᔪᖕᒧᑦ. ᐅᔭᕋᒃ ᐅᖃᖅᖢᓂ ᖃᓄᐃᖏᒃᑯᓂ ᕿᒻᒥᖏᓪᓗ ᖃᓄᐃᖏᑉᐸᑕ, ᐱᖃᑕᐅᒃᑲᓐᓂᓛᕐᓂᖓᓂᒃ. ᐊᒻᒪᓗ, ᕿᒻᒥᖅᑖᕋᑖᒥᓂᒃ ᐃᓚᓯᒪᓕᕋᔭᖅᖢᓂ, ᕿᒧᒃᓯᖃᑕᐅᔭᕇᕋᒥ ᑐᓐᓂᖅᑯᓯᐊᕆᔭᒥᓂᒃ ᒨᓯᓯ ᐆᔪᑯᓗᖕᒥᑦ, ᑎᐅᕆ ᐅᔭᕋᐅᑉ ᐊᓈᓇᖓᓂᒃ ᖃᐅᔨᒪᓚᐅᕐᒪᑦ ᖃᓪᓗᓈᓂᓗ ᐋᓐᓂᐊᕕᖕᒦᖃᑎᒋᓂᑯᒋᓪᓗᓂᐅᒃ ᑎᐅᕆᐅᑉ ᐊᓈᓇᖓ. ᕿᒧᒃᓯᐅᔾᔪᐊᕆᐊᖅᑐᖃᑕᐅᓗᓂ ᓄᓇᓕᐅᑉ ᐊᓯᐊᓅᕆᐊᖃᓛᖏᑦᑐᖅ ᓄᓇᒋᔭᖓᓂ ᐱᒋᐊᓛᕐᒪᑕ ᐊᕐᕌᒍ.

ᐅᔭᕋᒃ ᑕᐃᒪᓐᓇ ᓱᓕ ᓯᕗᓪᓕᖅᐹᑦ ᑕᓪᓕᒪᑦ ᐃᓗᐊᓃᑦᑐᒪᓇᔭᖅᑐᒎᖅ, ᑭᓯᐊᓂ ᐱᒻᒪᕆᐅᒋᓂᖅᓴᕆᓪᓗᒍ, ᖃᒧᑏᖕᓃᑦᑐᓐᓇᕐᓂᓂ ᕿᒻᒥᖏᑦ ᕿᒧᒃᓯᐅᑎᒋᑎᓪᓗᓂᒋᑦ.

“ᕿᒻᒥᖃᕈᒪᓚᐅᕋᒪ ᐃᓕᖅᑯᓯᑐᖃᕗᑦ ᐊᑐᕈᒪᓪᓗᒍ ᐊᑐᖅᑕᐅᖏᓗᐊᕐᓂᖓᓄᑦ ᐳᐃᒍᕈᔪᒃᑕᐅᓯᒪᓕᕐᒪᑦ,” ᓇᓗᓇᐃᖅᖢᓂᐅᒃ ᖃᓄᐃᒻᒪᑦ ᕿᒻᒥᕐᖓᐅᑎᒋᓚᐅᖅᑕᓂ ᐊᕐᕕᓂᓖᑦ ᐱᒋᐊᕈᑎᒋᔪᒪᓕᓚᐅᕐᒪᖔᕐᒥᓂ. “ᐃᓕᑕᕋ ᕿᑐᕐᖓᓐᓄᑦ ᑐᓂᔪᒪᓪᓗᒍ, ᐱᖃᑎᒋᔭᓐᓄᓘᓐᓃᑦ.”

ᕿᑐᕐᖓᖏᑦ ᐊᕐᕌᒍᑭᓗᐊᕌᕐᔪᖕᒪᑕ ᓱᓕ ᐅᐱᕐᖓᒃᓵᒃᑯᑦ ᐊᓃᑦᑎᐊᕐᕕᒃᓴᐅᓕᕌᖓᑦ ᑭᓯᐊᓂ ᕿᒧᒃᓯᖃᑎᒋᔪᓐᓇᓲᕆᖕᒪᒋᑦ, ᓄᖅᑲᖓᔾᔪᑎᒋᓯᒪᖏᑕᖓ ᕿᒪᐃᕕᒋᑦᑎᐊᕈᒪᓪᓗᒋᑦ ᕿᖑᕚᕆᓂᐊᖅᑕᖏᑦ.

ᐅᑭᐅᖃᓕᖅᖢᓂ 36-ᓂᒃ, ᓄᓇᕗᒥᐅᑦ ᐃᓄᒋᐊᖕᓂᖏᑦ ᒪᒃᑯᒃᑑᑕᐅᖕᒪᑕ ᐊᕐᕌᒍᑦ ᖁᓕᑦ ᐅᖓᑖᓃᓕᖅᑐᖅ ᐊᖓᔪᒃᖠᐅᕌᕐᔪᒡᕕᒋᓪᓗᒋᑦ, ᑲᓇᑕᒥ ᒪᒃᑯᖕᓂᖅᐹᖑᖕᒪᑕ ᐊᒻᒪᓗ ᐊᒃᓱᕈᐊᕆᔭᖏᑦ ᑕᑯᒃᓴᐅᑦᑎᐊᖅᖢᑎᒃ. “ᐃᑲᔪᖅᓱᕐᓂᑦᑎᓐᓂᒃ ᑕᑯᒃᓴᐅᑎᑦᑏᓐᓇᕈᑦᑕ, ᐊᖏᒡᓕᒃᑲᓐᓂᕈᓐᓇᖅᑰᕐᒪᑦ ᒫᓂ,” ᐅᖃᖅᐳᖅ ᐅᔭᕋᒃ. ᒪᒃᑯᒃᑐᑦ ᑕᑯᓗᒋᑦ ᕿᒧᒃᓯᖃᕋᓱᓕᖅᐸᓪᓕᐊᔪᑦ, ᐊᐱᖅᓱᑲᑕᖃᑦᑕᖅᖢᑎᒃ ᕿᒧᒃᓯᓕᒪᔪᓂᒃ “ᐃᖅᑲᐃᓯᔾᔪᑎᒋᓲᕋ ᐱᒋᐊᓕᕋᑖᖅᖢᖓ ᑕᐃᒪᐃᓚᐅᕋᒪ,” ᐅᖃᖅᖢᓂ.

ᑭᓯᐊᓂ ᑕᐃᒪᐃᓚᐅᕐᒪᑐᑦ, ᕿᒧᒃᓯᖃᕋᓱᓕᖅᖢᓂ ᐃᓕᑦᑕᕆᐊᓕᑦ ᐱᔭᕆᐅᕈᑎᒋᔭᕆᐊᓕᓪᓗ ᐊᖏᔪᑲᓪᓚᐅᖕᒪᑦ ᖁᓅᒻᒥᕐᓇᖅᑕᖅᐸᒃᖢᓂᓗ – ᑖᓐᓇ ᕿᒧᒃᓯᖃᑦᑕᕆᐅᓕᓵᖅᑐᖅ ᑕᐃᒪᐃᓚᐅᕐᒪᑦᑕᐅᖅ ᐅᓐᓄᒃᑯᑦ ᓯᕗᓪᓕᖅᐹᖓᓐᓂ 2022 ᕿᒧᒃᓯᐅᔾᔪᐊᖅᑎᓪᓗᒋᑦ ᐃᐲᖔᖅᑐᒥᒃ ᕿᒻᒥᖅᑕᖃᕐᓂᕐᒪᑦ, ᑖᔅᓱᒪ ᕿᒻᒥᖏᑦᑕ ᐊᓄᖏᓐᓂᒃ ᑕᒧᐊᓐᓂᖅᖢᓂ, ᑕᒪᓂᕐᕆᔪᐊᓘᓕᖅᖢᑎᒃ ᕿᒻᒥᖏᑦ ᐊᓄᖏᓪᓗ ᓯᑯᒥ. ᑕᐃᒪᐃᓐᓂᖓᓄᑦ ᕿᒧᒃᓯᐅᕐᔪᐊᖃᑕᐅᓂᕐᒥᓂ ᓄᖅᑲᕆᐊᖃᓕᓚᐅᖅᑐᖅ.

ᓯᕿᕐᖑᔭᖅ ᐅᐊᔅᓯ ᐱᓪᓚᕆᒋᔭᐅᑎᓪᓗᒍ, ᐅᔭᕋᒃ ᑐᑭᓯᓯᒪᔭᒥᓂᒃ ᐅᖃᐅᔾᔨᓚᐅᖅᐳᖅ ᑖᔅᓱᒧᖓ ᓄᑲᕆᔭᒥᓄᑦ: “ᐱᕕᖃᕐᓂᐊᖅᑐᑎᑦ ᓱᓕ.”

Advertisement

Are you passionate about Canadian geography?

You can support Canadian Geographic in 3 ways:

This story is from the January/February 2023 Issue

Related Content

Women in Nunavut running across a snow-covered field towards the camera

History

Throwback Thursday: Nunavut up and running

On April 1, 1999, Canada’s youngest population took control of its largest territory. Here’s how Canadian Geographic covered the story. 

  • 2880 words
  • 12 minutes

People & Culture

With old traditions and new tech, young Inuit chart their changing landscape

For generations, hunting, and the deep connection to the land it creates, has been a mainstay of Inuit culture. As the coastline changes rapidly—reshaping the marine landscape and jeopardizing the hunt—Inuit youth are charting ways to preserve the hunt, and their identity. 

  • 5346 words
  • 22 minutes

People & Culture

The Nunavut Quest dogsled race is revitalizing a once-threatened tradition

Inside the 500-kilometre dogsled race across the High Arctic with the qimuksiqtiit who are sharing their knowledge with the next generation

  • 2681 words
  • 11 minutes

People & Culture

Kahkiihtwaam ee-pee-kiiweehtataahk: Bringing it back home again

The story of how a critically endangered Indigenous language can be saved

  • 6310 words
  • 26 minutes