ᖄᑐᕆᓐ ᑕᒃᐹᓂ

ᖄᑐᕆᓐ ᑕᒃᐹᓂ ᓄᓇᓕᒻᒥ ᐃᓄᒃ ᐃᓚᖏᑦ ᓂᐊᖁᓐᖒᒥᐅᑕᓪᓚᕇᑦ, ᖃᓂᒋᔭᖓᓂ ᐃᖃᓗᐃᑦ. ᑭᓯᐊᓂᓕ, ᐃᓅᓚᐅᖅᓯᒪᔪᖅ ᒫᓐᑐᕆᐅᒥ. ᑕᒃᐸᓂ ᐃᒻᒥᓂᒃ ᐃᓕᓐᓂᐊᑎᔅᓯᒪᔪᖅ, ᐊᔾᔨᓕᐅᕆᔨᐅᓪᓗᓂ ᓴᖅᑭᑎᑦᑎᔪᒪᔪᖅ ᓇᓗᓇᕈᑎᑕᖃᕐᓂᖏᓐᓄᑦ ᐊᒻᒪ ᐸᕕᓇᕐᓂᖏᓐᓄᑦ ᓄᓇᓕᒻᒥᐅᑕᐃᑦ ᐃᓄᐃᑦ ᐃᓅᓯᖓᓂ. ᑕᑯᓪᓇᖅᑕᖓᑎᒍᑦ ᐅᖃᓂᕐᒧᑦ ᓴᖅᑭᖅᓯᒪᔪᑦ ᐃᓅᓯᖓᓂ ᑕᑯᔅᓴᐅᑎᑦᑎᔪᓂᑦ ᐱᖃᓯᐅᑎᓪᓗᑎ ᓄᓇᓂᑦ ᓄᓇᓕᒻᒥ ᑕᑯᔅᓴᐅᓂᖃᖅᑐᓂᑦ. ᑕᒃᐹᓂ ᐊᔾᔨᓕᐅᕆᔪᓐᓇᕐᒥᔪᖅ ᑕᑯᕋᓐᓈᑎᑦᑎᔪᓂᑦ ᐊᓪ, ᓂᕈᐊᖅᑕᐅᖃᑦᑕᖅᑐᓂᑦ ᖃᓄᐃᓕᖓᓕᓂᖏᓐᓄᑦ ᐅᔾᔨᕈᓱᑎᑎᓪᓗᓂ ᐊᒻᒪ ᓴᖅᑭᑎᑦᑎᓪᓗᓂ ᐱᒻᒪᕆᐅᔪᓂᑦ ᐅᖃᖃᑎᒌᑦᑐᓂᑦ.

ᐅᓂᒃᑳᑦ ᐊᔾᔨᓐᖑᐊᓂᑦ

ᐅᓇ ᐊᔾᔨᓐᖑᐊᖅ ᐃᓚᒋᔭᖓ ᐊᔾᔨᖑᐊᒡᒍᑎᓂᑦ ᖄᑐᕆᓐ ᑕᒃᐹᓂ ᐃᕐᒃᖏᓐᓈᕈᑎᖃᕐᕕᖓᓂ, ᐊᑖᓂ ᓄᓇᖑᐊᓂᑦ ᐃᖃᓗᐃᑦ | ᐃᖃᓗᐃᑦ, ᑖᓐᓇ ᐊᔾᔨᓐᖑᐊᖅ (ᐃᖃᓗᐃᑦ #10, 2018) ᐃᓚᒋᔭᖓ 15, ᑲᑎᓐᖓᔪᑦ ᐅᐱᒋᓪᓗᓂᐅᒃ ᐊᓈᓇᖓ (ᐊᓈᓇ). ᐊᔾᔨᓕᐅᖅᑕᐅᓯᒪᔪᖅ ᐊᓈᓇᖓᑕ ᓄᓇᓕᖓᓂ ᐊᒻᒪ ᐃᓚᖃᖅᑐᓂ ᑖᔅᓱᒧᖓ ᑎᑎᕋᖅᓯᓴᒪᔪᓂᑦ, ᐊᔾᔨᓐᖑᐊᑦ ᑕᑯᔅᓴᐅᑎᑦᑎᔪᑦ ᐱᑕᖃᕆᐊᖃᕐᓂᖓᓄ ᑯᓄᒃ ᑕᒃᐹᓂ ᐊᒻᒪ ᖃᓄᖅ ᑐᑭᖃᒃᕐᓂᖑᓄᑦ ᖄᑐᕆᓐᒧᑦ.

ᐊᓈᓇᒐ | ᐊᓈᓇ 

ᐊᓈᓇᒐ ᓂᓪᓕᓇᖅᑐᖅ ᓯᓚᖓᓂ. 

ᐊᓈᓇᒐ ᓂᐱᖃᖅᑐᖅ ᒍᕋᒃ ᒍᕋᒃ. 

ᐊᓈᓇᒐ ᓂᐱᖃᑦᑎᐊᖅᑐᒥᑦ ᐃᓪᓚᖅᑐᖅ ᐊᒻᒪ ᐃᓄᓐᓅᖃᑦᑕᖅᑐᓂ ᖃᐅᔨᒪᔭᖏᓐᓂ. 

ᐊᓈᓇᒐ ᐆᓇᖅᑐᖅ ᑐᑦᑐᒥᓂᖅ ᐆᔪᖅ. 

ᐊᓈᓇᒐ ᐅᓂᒃᑳᑦ ᑐᓗᒐᕐᓂᑦ. 

ᐊᓈᓇᒐ ᐅᕙᓐᓂᑦ ᑲᒪᒋᔭᖃᑦᒃᑎᐊᖏᓐᓇᖅᑐᖅ 

ᐊᓈᓇᒐ ᑕᕐᕆᔭᐅᔪᖅ ᐊᑐᖅᑐᐊᒐᐃᑦ ᐊᒻᒪ ᐱᓱᑦᑐᓂ ᓄᓇᓕᒻᒥ. 

ᐊᓈᓇᒐ ᐊᖏᕋᕋ.

ᑕᐃᕙᑦ ᕿᓚᕝᕙᖅ

ᑕᐃᕙᑦ ᕿᓚᕝᕙᖅ ᐊᔾᔨᓕᐅᕆᔨ ᐊᒻᒪ ᖃᕋᓴᐅᔭᒃᑰᖅᑐᓂᑦ ᓴᓇᖃᑦᑕᖅᑐᖅ ᐸᓐᓂᖅᑑᒦᑦᑐᖅ (ᐸᓐᓂᖅᑑᖅ). ᐊᑐᖃᑦᑕᖅᑕᖏᑦ ᐊᔾᔨᓕᐅᕈᑎᖏᑦ ᐊᔾᔨᓕᐅᕆᓪᓗᓂ ᖃᓄᐃᓕᖓᓂᖃᖅᑎᓪᓗᒋᑦ ᓄᓇᓕᖓᓂ, ᐊᒻᒪᓗᑦᑕᐅᖅ ᐆᒪᔪᓂᑦ ᐊᒻᒪ ᓄᓇᖏᓐᓂ ᓄᓇᕗᒻᒥ. ᐊᔾᔨᓕᐅᖃᑦᑕᖅᓯᒪᔭᖏᑦ ᑕᑯᔅᓴᐅᑎᑕᐅᓯᒪᔪᑦ ᓄᓇᖃᖅᑳᖅᓯᒪᔪᑦ ᐃᓄᖏᑦ ᓄᓇᖑᐊᖓᓂ ᑲᓇᑕ ᐊᒻᒪ ᐅᖃᓕᒫᒐᕐᓂᑦ ᓲᕐᓗ Canadian Geographic ᐊᒻᒪ National Geographic. 

ᐅᓂᒃᑳᑦ ᐊᔾᔨᓐᖑᐊᓂᑦ

ᐅᓇ ᐊᔾᔨᓐᖑᐊᖅ ᐅᓪᓗᖏᓐᓂ 2011 ᑭᓯᐊᓂ ᑕᐃᕙᑦ ᕿᓚᕝᕙᖅ ᐃᖅᑲᐅᒪᑦᑎᐊᖅᑕᖓ. ᐊᒥᓱᒐᓚᐃᑦ ᐃᑉᐱᒋᒋᔭᐅᑦᑎᐊᖅᑐᑦ ᐃᓐᓇᑐᖃᐃᑦ ᓄᓇᓕᒻᒥ ᕿᓯᓐᓂ ᑐᐱᓕᐅᖅᓯᒪᔪᑦ, ᑕᑯᔅᓴᐅᑎᑦᑎᓗᑎ ᖃᐅᔨᒪᔭᖏᓐᓂ ᐊᑐᖃᑦᑕᓚᐅᖅᑕᖏᓐᓂ ᐃᓄᐃᑦ ᕿᔪᓐᓂᑦ ᐃᓪᓗᒨᖅᑲᓚᐅᖅᑎᓐᓇᒋᑦ. ᐃᓐᓇᑐᖃᐃᑦ ᑕᑯᑎᑦᑎᔪᒪᓚᐅᖅᑐᑦ ᒪᒃᑯᓂᖅᓴᓂᑦ ᐃᓄᓐᓂᑦ ᖃᓄᖅ ᓇᔪᖅᑕᐅᕙᓚᐅᖅᑐᑦ ᓴᓇᔭᐅᓯᒪᒻᒪᖔᑕ ᐊᒻᒪ ᖃᓄᐃᑦᑐᒥᑦ ᑕᐅᑦᑐᖃᕐᓂᖏᓐᓄᑦ. “ᑖᓐᓇ ᐊᔾᔨᐅᖏᑦᑐᖅ ᐊᔾᔨᓐᖑᐊᖅ ᑕᑯᓚᐅᖅᑕᕋ ᐅᐱᒍᓱᓐᓂᕐᒥᑦ ᑮᓇᖏᓐᓂ ᐃᓐᓇᑐᖃᐃᑦ ᐃᓚᒋᔭᐅᓪᓚᑦᑖᓚᐅᖏᑦᑐᑦ ᐃᑲᔪᕆᐊᖅᑐᑎ,” ᐅᖃᖅᑐᖅ ᕿᓚᕝᕙᖅ. “ᐃᓐᓇᑐᖃᐃᑦ ᐃᓚᒋᔭᐅᒋᐊᓐᖓᓚᐅᖏᑦᑐᑦ ᐃᑲᔪᕆᐊᓚᐅᖅᑐᑦ. ᐅᖃᐅᔾᔨᓚᐅᖅᑐᑦ ᖃᓄᑐᐃᑦᑑᓚᐅᕐᓂᖓᓂ ᐃᓅᕕᒋᓪᓗᒋᑦ. ᐊᔾᔨᐅᖏᑦᑑᓚᐅᖅᑐᖅ ᑖᓐᓇ. “ᐅᕙᓂ, ᐃᓅᒍᓐᓃᖅᑐᖅ ᐊᐃᒡᒐ ᐃᑦᑐᐊᖓᑦ ᐃᔅᓯᕚᖃᑎᖃᖅᑐᖅ ᐃᕐᖑᑕᖓᓂ, ᐋᓕ, ᒫᓐᓇ ᓯᓚᑦᑐᓴᕐᕕᒻᓃᒦᓕᖅᑐᖅ.

ᑯᐊᕋ ᑲᕝᔭᒃᑐᖅ

ᑯᐊᕋ ᑲᕝᔭᒃᑐᖅ ᒥᑭᔪᓂᑦ ᐃᓄᓐᓂ ᐊᔾᔨᓕᐅᕆᔨ ᐃᖃᓗᑦᑑᑦᑎᐊᕐᒥᐅᑕᖅ (ᐃᖃᓗᑦᑑᑦᑎᐊᖅ) ᐊᒻᒪ ᒫᓐᓇ ᓄᓇᖃᓕᖅᑐᖅ ᐃᐅᐴᑕᒥ. ᐊᔾᔨᓐᖑᐊᖏᑦ ᐃᓄᓐᓄᑦ ᑲᑭᓐᓃᑦ ᐆᒻᒪᖅᑎᑕᐅᒃᑲᓂᕐᓂᖏᓐᓄᑦ ᐱᓕᕆᐊᖅ ᖁᕕᐊᓱᒍᐳᑎᖃᖅᑐᑦ ᐊᒻᒪ

ᑕᑯᔭᐅᓪᓗᑎ ᐱᖅᑯᓰᑦ ᑲᔪᓯᑎᑕᐅᓂᖏᓐᓄᑦ ᐊᕐᓇᓂ ᐃᓄᓐᓂᑦ ᑲᑭᓐᓂᓕᐅᖅᑐᓂᑦ. ᐊᔾᔨᓐᖑᐊᖅ ᑕᑯᔅᓴᐅᑎᑕᐅᓚᐅᖅᑐᖅ ᐅᕙᓂ Reawakening Our Ancestors’ Lines, ᐅᖃᓕᒫᒐᐃᑦ ᐅᓂᒃᑳᓂᑦ ᐊᒻᒪ ᐊᔾᔨᓐᖑᐊᓂᑦ ᐱᓕᕆᖃᑎᖃᓚᐅᖅᑐᖅ ᑎᑎᕋᖅᑎᒥᑦ ᕼᐅᕙᒃ ᔮᓐᔅᑕᓐ ᑎᑎᕋᖅᑕᐅᓪᓗᑎ ᐊᑐᖅᑕᐅᖃᑦᑕᖅᓯᒪᔪᓂᑦ ᐃᓄᐃᑦ ᐊᕐᓇᐃᑦ ᐅᑎᖅᑎᑦᑎᓂᖏᓐᓄᑦ ᑖᔅᓱᒥᖓ ᐱᖅᑯᓯᒥᑦ ᐊᒻᒪ ᑐᓂᓯᓪᓗᓂ ᖃᐅᔨᒪᓂᐅᔪᓂᑦ ᓯᕗᓂᔅᓴᒥ ᑭᖑᕚᖑᓂᐊᖅᑐᓄᑦ. 

ᐅᓂᒃᑳᑦ ᐊᔾᔨᓐᖑᐊᓂᑦ

ᕼᐅᕙᒃ ᔮᓐᔅᑕᓐ ᐱᒋᐊᖅᑎᒻᒪᒍ ᐃᓄᓐᓄᑦ ᑲᑭᓐᓃᑦ ᐆᒻᒪᖅᑎᑕᐅᒃᑲᓂᕐᓂᖏᓐᓄᑦ ᐱᓕᕆᐊᖅ ᖁᓪᓗᖅᑑᒥ 2016−ᒥᑦ, ᖃᐅᔨᒪᓚᐅᖅᑐᑦ ᐊᒥᓲᖏᑦᑐᑦ ᐊᕐᓇᐃᑦ ᑕᐃᑲᓂ ᐱᖅᑯᓯᓄᑦ ᑲᑭᓐᓂᓕᓐᓂᑦ. ᐳᓚᕋᕆᐊᓐᖓᑎᓪᓗᒋᑦ, ᔮᓐᔅᑕᓐ ᐱᓕᕆᖃᑎᖃᓚᐅᖅᑐᖅ ᒪᕐᕉᓂᒃ ᑲᑭᓐᓂᓕᐅᖃᑦᑕᖅᑐᓂ ᑲᑭᓐᓂᓕᐅᖅᑐᑎ 25 ᐊᕐᓇᓄᑦ, ᑲᕝᔭᒃᑐᖅ ᖃᐅᔨᒪᔭᖏᓐᓂ ᐊᑐᖅᑐᓂ ᐊᔾᔨᓕᐅᕆᔨᐅᓪᓗᓂ ᑎᑎᕋᖅᑕᐅᓪᓗᑎ ᐊᑐᓂ ᐊᕐᓇᐃᑦ ᐱᓕᕆᓂᖏᑦ. ᐱᖓᓱᓂ ᐊᕐᕌᒎᓕᖅᑐᓂᑦ ᑲᕝᔭᒃᑐᖅ ᑎᑎᕋᖅᓯᖃᑦᑕᓚᐅᖅᑐᖅ ᐊᔾᔨᐸᓗᖏᓐᓂ ᑲᑎᓐᓂᐅᔪᓂᑦ ᐃᖃᓗᑦᑑᑦᑎᐊᒥ (ᐃᖃᓗᑦᑑᑦᑎᐊᖅ), ᑲᖏᕐᖠᓂᕐᒥ (ᑲᖏᕐᖠᓂᖅ) ᐊᒻ  ᐅᓗᒃᕼᐊᖅᑑᒥ. ᐱᔪᒪᔭᐅᓂᖓ ᐱᖅᑯᓯᓄᑦ ᑲᑭᓐᓂᓕᐅᕐᓂᖅ ᐊᖏᔪᒥᑦ ᓴᖅᑭᑲᓐᓂᖅᓯᒪᔪᖅ. “ᐱᐅᔪᒻᒪᕆᐅᔪᖅ ᖃᐅᔨᒪᓪᓗᖓ ᐃᓚᒋᔭᐅᓯᒪᒐᒪ ᑕᒪᑐᒥᖓ ᐱᖅᑯᓯᑐᖃᐅᔪᒥᑦ,” ᓇᓗᓇᐃᖅᓯᔪᖅ ᑲᕝᔭᒃᑐᖅ. “ᐱᒻᒪᕆᐊᓘᔪᖅ ᑲᑉᐱᐊᓱᒋᐊᖃᕈᓐᓃᕋᑦᑕ ᑭᓇᐅᓂᑦᑎᓐᓄᑦ. ᐃᖏᕋᑦᑎᐊᕈᓐᓇᖅᑐᒍᑦ ᐱᐅᓂᕆᔭᖓᓂ ᐱᖅᑯᓯᑦᑎᓐᓂ ᐊᒻᒪ ᐅᕙᒍᑦ ᐃᓗᐊᓂ.”

ᑖᓐᓇ ᐊᔾᔨᓐᖑᐊᖅ, ᑕᑯᔅᓴᐅᑎᑦᑎᔪᖅ ᑲᕝᔭᒃᑐᖅ ᐃᓪᓗᑯᓗᐊᓂ, ᒥᐅᕆ ᑕᓕᑦᑐᖅ, ᑎᒍᒥᐊᖅᑐᖅ ᐅᓄᒻᒥᑦ −− ᐱᖅᑯᓯᓄᑦ ᐊᕐᓇᐃᑦ ᓴᕕᖓ ᐊᑐᖅᑕᐅᕙᑦᑐᖅ ᑭᓱᑐᐃᓐᓇᕐᓄᑦ ᐱᒋᐊᖅᑐᓂ ᒥᖅᓱᓂᕐᒧᑦ ᑎᑭᑦᑐᒍ ᐊᒥᕐᓂᑦ ᓴᓗᒻᒪᖅᓴᐃᓂᕐᒧᑦ ᐊᒻᒪ ᐊᒡᒍᐃᔾᔪᑎᐅᓪᓗᑎ ᓂᕿᓄᑦ. “ᐱᐅᒋᔭᕋ ᑖᓐᓇ ᐊᔾᔨᓐᖑᐊᖅ ᐱᔾᔪᑎᒋᓪᓗᒍ ᑕᑯᔅᓴᐅᑎᑦᑎᒻᒪᑦ ᓴᓐᖏᔪᒥᑦ ᐅᕙᒍᑦ ᐱᖅᑯᓯᖏᓐᓂ ᐊᒻᒪ, ᐅᕙᓐᓄᑦ, ᖁᒻᒧᐊᑎᑦᑐᓂᐅᒃ ᐅᓗᒃ ᑕᑯᔅᓴᐅᓂᖃᖅᑎᑦᑎᔪᖅ ᑐᓂᓯᖃᑦᑕᐅᑎᓂᕐᒥᑦ ᓯᓚᕐᔪᐊᒧᑦ ᐅᕙᒍᑦ ᐃᓅᓪᓗᑕ ᓱᓕ ᑕᒫᓃᒃᑲᑦᑕ, ᐊᑐᖃᑦᑕᖅᑐᒋᑦ ᐱᖅᑯᓯᕗᑦ ᐊᒻᒪ ᐅᐱᒍᓱᑦᑐᑕ ᑭᓇᐅᓂᑦᑎᓐᓄᑦ.”

ᑕᐃᕙᑦ ᖃᑯᖅᑎᓂᖅ ᓄᑲᖅᑎᖅ.

ᐃᓅᓯᒪᔪᖅ ᐊᒻᒪ ᐱᕈᖅᓴᓯᒪᓪᓗᓂ ᑲᖏᕐᖠᓂᕐᒥᑦ, ᐊᔾᔨᓕᐅᕆᔨ ᑕᐃᕙᑦ ᖃᑯᖅᑎᓂᖅ ᓄᑲᖅᑎᖅ ᓱᔭᔅᓴᖃᕈᓐᓃᕋᐃᒪᑦ ᓄᓇᒨᖃᑦᑕᖅᑐᖅ, ᐊᔾᔨᐅᓕᕆᖃᑦᑕᖅᑐᓂ ᓇᒦᓐᓂᖓᓄ ᐆᒪᔪᖏᓐᓂ, ᐱᖃᓯᐅᑎᓪᓗᑎ ᐊᕐᕌᒍᑕᒫᑦ ᐅᑎᖅᑕᖃᑦᑕᕐᓂᖏᑦ ᐱᐊᕗᓕ ᐊᒻᒪ ᖃᒪᓂᕐᔪᐊᖅ ᑐᑦᑐᖏᑦ, ᐊᒻᒪᓗᑦᑕᐅᖅ ᐅᒥᖕᒪᓂᑦ, ᓇᑦᑎᕐᓂᑦ ᐊᒻᒪ ᓇᓄᕐᓂᑦ. ᑕᐃᒪᐃᒍᓐᓇᕐᓂᕋᖅᑐᖅ ᐅᓪᓗᒥᐅᔪᒥᑦ ᐱᕈᖅᓴᓂᕐᒧᑦ ᐊᒻᒪ ᐱᖅᑯᓯᑎᑎᒍᑦ ᐱᔾᔪᑎᖃᖅᑎᑦᑎᓗᐊᑕᖅᑐᑎ ᐊᑲᐅᔅᓴᓕᖅᑐᓂ ᓄᓇᓂᑦ ᐊᒻᒪ ᑕᑯᔅᓴᐅᑎᑦᑎᔪᒪᓂᖃᖅᑐᓂ ᐱᐅᓂᖏᓐᓄᑦ ᐆᒪᔪᐃᑦ ᐊᒻᒪ ᓄᓇᐃᑦ ᖃᓂᒋᔭᖓᓂ ᑲᖏᕐᖠᓂᖅ. ᓄᕗᔭᑎᓐᓇᒍ ᐅᓐᓄᒃᑯᑦ, ᕿᓂᕆᐊᖃᑦᑕᖅᑐᖅ ᐊᔾᔨᓕᐅᕆᕕᑦᑎᐊᕙᒻᒥᑦ ᐊᔾᔨᓕᐅᕆᓪᓗᓂ ᐊᖅᓴᕐᓂᓂᑦ ᓯᓚᒦᑦᑐᓂᑦ.  

ᐅᓂᒃᑳᑦ ᐊᔾᔨᓐᖑᐊᓂᑦ

ᐱᓇᓱᐊᕈᓯᒐᓚᓐᓂᑦ ᓄᕗᔭᓚᐅᖅᑎᓪᓗᒍ, ᓯᓚᖓ ᓄᓐᖑᖏᓐᓂ ᓯᑎᐱᕆ 2023 ᐊᒻᒪ ᑕᐃᕙᑦ ᖃᑯᖅᑎᓂᖅ ᓄᑲᖅᑎᖅ ᐊᔾᔨᓕᐅᕆᔪᓐᓇᕐᓂᖓᓂ ᐊᔾᔨᓕᐅᕆᔪᖅ. “ᐅᓐᓄᖓ ᐱᒋᐊᕐᓂᖃᖅᑐᖅ ᓄᕗᔭᖃᕐᓇᓂ ᐊᒻᒪ ᐅᓪᓗᕆᐊᑦ ᑕᑯᔅᓴᐅᑎᐊᖅᑐᑎᑦ ᑐᖑᔪᖅᑐᒥᑦ. ᑕᖅᓯᒌᓕᑐᐊᕐᖓᑦ, ᖃᐅᒪᐃᑦ ᖃᐅᒪᑦᑎᐊᓕᖅᑐᑎ,” ᑎᑎᕋᓚᐅᖅᑐᖅ Instagram−ᒥ ᑕᑯᔅᓴᐅᑎᑦᑎᓪᓗᓂ ᐃᓚᖏᓐᓂ ᐱᐅᒋᓛᖏᓐᓂ ᐊᔾᔨᓐᖑᐊᓂ ᐅᓐᓅᒋᓚᐅᖅᑕᖓᓂ. “ᐱᒋᐊᕐᓂᖃᓚᐅᖅᑐᑦ ᖃᐅᒪᔪᑦ

ᑐᑭᓕᐊᑯᑖᑦᑐᑦ, ᕿᓚᒥᐅᔪᒥᑦ ᖃᐅᒪᓕᓚᐅᖅᑐᑦ ᐊᒻᒪ ᐊᐅᓚᓂᖃᑦᑎᐊᖅᑐᑎ ᖃᐅᒪᐃᑦ.” ᐅᓐᓄᒃᑯᑦ ᓯᓚᖓᓂ ᐊᔾᔨᓐᖑᐊᖅ ᐱᐅᔫᓂᖓ ᓈᒻᒪᒃᑲᔭᖅᑐᖅ, ᑭᓯᐊᓂ ᖃᑯᖅᑎᓂᖅ ᓄᑲᖅᑎᖅ ᐊᔾᔨᓕᐅᕆᓚᐅᖅᑐᖅ ᐃᖅᑲᐅᒪᓇᓂᖅᓴᓂᑦ ᐃᒪᕋᓛᕐᒥᑦ ᑕᑯᒐᒥ ᐊᒻᒪ ᐊᔾᔨᓕᐅᖅᑐᒋᑦ ᐊᖅᓴᕐᓃᑦ ᐃᒪᖓᓂ ᑕᑯᔅᓴᐅᓂᖃᖅᑐᑦ. 

ᐹᑦ ᑲᐃᓐ

ᐹᑦ ᑕᑯᔅᓴᐅᔪᓂᑦ ᐅᓂᒃᑳᖃᑦᑕᖅᑐᖅ ᔨᐊᓗᓇᐃᕝᒥᐅᑕᖅ, ᓄᓇᑦᓯᐊᖅ. ᐃᑲᔪᖅᑕᐅᓪᓗᓂ ᑐᕆᐱᐊᒃ ᐱᓕᕆᔭᐅᔪᖅ (ᑐᓂᓯᖃᑦᑕᖅᑐᑦ ᐱᓕᕆᐊᖅ ᐊᐅᓚᑕᐅᔪᖅ ᕈᐃᔪ ᑲᓇᑕᒥ ᓄᓇᓐᖑᐊᓂ ᑎᒥᖓᑦ ᐃᑲᔪᖅᑐᑎ ᓴᖅᑭᔮᖅᑎᑦᑎᓗᑎ ᕿᒥᕐᕈᐊᖅᑎᓂᑦ, ᖃᐅᔨᓴᖅᑎᓂᑦ, ᐃᓕᓐᓂᐊᑎᑦᑎᔨᓂᑦ ᐊᒻᒪ ᐊᔾᔨᓕᐅᕆᔨᓂᑦ ᐅᓂᒃᑳᖃᑦᑕᖅᑐᑎ), ᐊᐅᓚᖃᑦᑕᖅᓯᒪᑦᑎᐊᖅᑐᖅ ᓄᓇᕗᒻᒧᑦ ᐊᒻᒪ ᓄᓇᑦᓯᐊᒧᑦ ᐊᕐᕌᒎᕋᑖᖅᓯᒪᔪᓂᑦ ᑎᑎᕋᖅᓯᓪᓗᓂ ᓂᕿᓄᑦ ᐊᑦᑕᓇᐃᖅᓯᒪᓂᕐᒧᑦ ᐊᒻᒪ ᐊᔅᓱᕈᕈᑎᖃᓂᕐᒧᑦ ᐱᓇᓱᐊᖅᑐᒋᑦ ᓂᕿᑦᑎᐊᕙᐃᑦ ᓂᖀᑦ ᐅᑭᐅᑕᖅᑐᒥ ᑲᓇᑕᒥ. ᐊᐃᕆᔅᖑᓪᓗᓂ ᑲᓇᑕᒥᐅᑕᖅ ᐊᒻᒪ ᐊᐅᒑᓐᑯᐃ ᐊᓂᔅᓯᓈᐱ ᑭᖑᕚᖏᑦ ᐊᒻᒪ ᐃᓚᒋᒋᔭᐅᓪᓗᓂ ᑎᒥᔅᑲᒥᖕ ᐊᓪᓚᐃᑦ, ᐃᖅᑲᓇᐃᔮᕆᔭᖏᑦ ᓴᖅᑭᖅᑎᑕᐅᓯᒪᔪᑦ ᐅᑯᓇᓂ Canadian Geographic, National Geographic, The New York Times, World Press Photo, The Atlantic, The Globe and Mail, ᐊᓯᖏᓐᓄᑦᑕᐅᖅ.

ᐅᓂᒃᑳᑦ ᐊᔾᔨᓐᖑᐊᓂᑦ

ᐹᑦ ᑲᐃᓐ ᐱᓕᕆᓂᖃᓚᐅᖅᑐᖅ ᐃᖃᓗᓐᓂ 2021−ᒥ, ᓄᓇᓕᕐᔪᐊᖑᔪᖅ ᒪᑐᐃᕋᑖᓚᐅᖅᑎᓪᓗᒍ ᐋᓐᓂᐊᓇᕐᒥᑦ. ᑕᐃᑲᓃᑦᑎᓪᓗᒍ, ᐃᖃᓗᒻᒥᐅᑕᐃᑦ ᓈᒻᒪᓴᖏᓐᓂᖃᓚᐅᖅᑐᑦ ᐃᒥᖓ ᑎᐱᖃᖅᑐᓂᑦ ᐊᒻᒪ ᐃᒥᖅᑐᒍ ᐅᖅᓱᐊᓗᔅᓱᓂᑦᑐᓂ. ᖃᐅᔨᓴᕐᓂᐅᔪᑦ ᓴᖅᑭᑎᑦᑎᓚᐅᖅᑐᑦ ᐅᖅᓱᐊᓗᑦᑕᖃᖅᑐᓂ ᓄᓇᓕᐸᐅᔭᒃᑯᑦ ᐃᒪᖃᕐᕕᖓᓂ. ᐊᔾᔨᓕᐅᕆᖃᑦᑕᖅᑐᓂ ᐊᒻᒪ ᐊᐱᖅᓱᖃᑦᑕᖅᑐᓂ ᐃᓄᓐᓂᑦ ᐅᑕᖅᑭᔪᓂᑦ ᐃᒥᕐᒥᑦ ᖃᓂᒋᔭᖓᓂ ᐃᓕᓐᓂᐊᕕᒃᔪᐊᖅ, ᑲᐃᓐ ᖃᐅᔨᓚᐅᖅᑐᖅ ᐃᓅᓱᑦᑐᓛᑦ ᐹᓯᑭᕚᖅᑐᑎ ᖃᓂᒋᔭᖓᓂ. “ᑖᓐᓇ ᑕᑯᔅᓴᐅᒐᔪᖃᑦᑕᖅᑐᖅ ᐅᑭᐅᑕᖅᑐᒥ, ᐱᓗᐊᖅᑐᒥᑦ ᐊᐅᔭᒃᑯᑦ ᓯᕿᓂᖅ ᓂᐱᖃᑦᑕᑎᓪᓗᒍ ᐅᓐᓄᒃᑯᑦ ᐊᒻᒪ ᓱᕈᓰᑦ ᐊᑯᓂ ᓯᓚᒥ ᐱᓐᖑᐊᖅᑐᑎᑦ,” ᓇᓗᓇᐃᖅᓯᔪᖅ. “ᑕᕝᕙᓂ ᐅᓪᓗᒋᔭᖓᓂ, ᖃᐅᔨᓚᐅᖅᑕᕋ ᐱᐅᒋᓪᓗᒍ ᑕᒪᑐᒪᓂᐅᔪᒥᑦ ᐊᔅᓱᕈᓐᓇᖅᑐᒥ ᐊᒻᒪ ᖁᕕᐊᓱᖏᓇᖅᑐᒥᑦ, ᑲᑎᓐᖓᔪᑦ ᐱᖃᓐᕇᑦ ᑲᑎᒍᓐᓇᖅᑐᑎ ᐅᖅᑯᑎᓪᓗᒍ ᐅᑦᑑᐱᕆᒥ ᐅᓐᓄᒃᑯᑦ ᐊᒻᒪ ᕚᓯᑭᕚᖅᑐᑎ.” ᑕᑯᓂᐊᕈᕕᑦ ᖃᓂᒧᑦ, ᑕᑯᒍᓐᓇᖅᑕᑎᑦ ᐅᑕᑕᖅᑭᔪᑦ ᑐᓄᐊᓃᑦᑐᑦ.