History
Throwback Thursday: Nunavut up and running
On April 1, 1999, Canada’s youngest population took control of its largest territory. Here’s how Canadian Geographic covered the story.
- 2880 words
- 12 minutes
People & Culture
ᓄᓇᕗᒐ : ᐳᔾᔫᑦ ᑯᓱᒐᖅ
ᐃᓪᓗᕋᓛᖅ ᖃᓂᒋᔭᖓᓃᑦᑐᖅ ᑲᖏᕐᖠᓂᖅ, ᓄᓇᕗᑦ, ᓄᓇᐅᔪᖅ ᓴᐃᓕᓂᕐᒧᑦ — ᐊᒻᒪ ᐃᓚᒌᓄᑦ ᑲᑎᓐᓂᐅᔪᓄᑦ
Advertisement
Advertisement
ᐃᓪᓗᕋᓛᕋ ᑕᓕᖅᐱᐊᓃᑦᑐᖅ ᐃᒪᐅᑉ ᑭᓪᓕᖓᓂ, ᐃᓗᐊᓂ ᑲᖏᖅᑐᒥ ᐊᑭᓪᓗᐊᓂ ᓄᓇᓕᖓᓄ ᑲᖏᕐᖠᓂᖅ. ᓄᓇᕗᑦ, ᓇᒦᓐᓂᓪᓚᕆᖓ ᑕᐃᔭᐅᔪᖅ ᐃᑉᖢᖅᑑᖅ, ᑐᑭᖃᖅᑐᖅ ᓄᓇᖓ ᐃᓘᕋᖅ” ᐊᑯᓂᐅᓂᖃᐸᓗᑦᑐᖅ 25 ᒥᓂᑦ ᐅᒥᐊᒃᑯᑦ ᐊᐅᔭᒃᑯᑦ ᐅᕝᕙᓘᓐᓃᑦ 90 ᒥᓂᑦ ᐱᓲᑎᒃᑯᑦ ᐊᓄᕆᓗᐊᖅᑎᓪᓗᒍ ᐊᐅᓪᓚᕐᕕᒋᓗᒍ ᐃᒫᒍᑦ. ᐅᐱᕐᖓᓵᒃᑯᑦ, ᖃᒧᑕᐅᔭᒃᑰᓕᕋᐃᒐᑦᑕ, ᐃᒻᒪᖃ 45 ᒥᓂᑦ.
ᑎᐱᖓ ᓄᓇᒦᖔᖅᑐᖅ ᐱᐅᔫᖏᓐᓇᖃᑦᑕᖅᑐᖅ, ᐆᒻᒪᑎᒃᑲᓐᓂᕈᑎᐅᔪᖅ ᑎᐱᖓ — ᑎᒻᒥᐊᓕᒫᑦ ᐅᑎᖅᐸᓪᓕᐊᓕᖅᑐᑎᑦ, ᐃᒪᖓ ᑰᓐᓂᖃᖅᑐᓂ. ᐊᒻᒪ ᐊᐅᔭᒃᑯᑦ ᓇᐃᔪᓐᓇᖃᑦᑕᖅᑕᐃᑦ ᑕᕆᐅᑉ ᐃᒪᖓ. ᑐᓐᖓᓂᖃᖅᑐᖅ ᐅᓕᓐᓂᖏᓐᓄᑦ ᑎᓂᓐᓂᖏᓐᓄᑦ, ᑯᑭᐅᔭᖅᑕᕆᐊᕈᓐᓇᖅᑐᒍᑦ ᐅᕝᕙᓘᓐᓃᑦ ᐃᖃᓗᒐᓱᐊᕈᑎᓂᑦ ᓄᓗᔾᔨᕐᓗᑕ ᐃᓪᓗᕋᓛᑦᑕ ᓯᕗᓂᒥᑦᑎᐊᖏᓐᓂ. ᐃᓛᓐᓂᒃᑯᑦ ᓇᑦᑏᑦ ᐳᐃᖃᑦᑕᖅᑐᑦ ᐃᓪᓗᕋᓛᑦᑕ ᓯᔪᓂᐊᒍᑦ, ᑕᐃᒪᐃᓐᓂᖓᓄᑦ ᓇᑦᑎᕋᓱᐊᕈᓐᓇᖅᑕᕗᑦ. ᒪᓐᓂᑦᑕᕆᐊᖃᑦᑕᕐᒥᔪᒍᑦ, ᑲᖑᕐᓂᑦ, ᓂᕐᓕᓂᑦ, ᓇᐅᔭᕐᓂᓪᓗ. ᐊᒻᒪᓗᑦᑕᐅᖅ ᒥᑎᕐᓄᑦ ᒪᓐᓂᑦᑕᖃᕐᒥᔪᖅ.
ᐃᖃᓗᒐᓱᐊᖃᑦᑕᖅᑐᑦ ᐊᐅᔭᑐᖃᐅᓕᕋᐃᒻᒪ ᐊᒻᒪ ᐅᑭᐊᔅᓵᕋᒥᑦ. ᑕᒪᑐᒪᓂᐅᑎᓪᓗᒍ ᐃᖃᓗᐃᑦ ᑰᒃᑯᑦ ᒪᔪᖃᑦᑕᓕᖅᑎᓪᓗᒋᑦ, ᐃᒫᒎᖃᑦᑕᖅᑐᑦ ᓄᓇᐅᑉ ᑭᓪᓕᖓᒍᑦ.
ᓄᓇᒦᑦᑐᓂ ᕿᑲᑦᑎᐊᓇᖅᑐᖅ. ᐃᖃᓗᒐᓱᐊᖅᑐᒍᑦ, ᒪᓐᓂᑕᖅᑐᒍᑦ ᐅᕝᕙᓘᓐᓃᑦ ᓄᓂᕙᑦᑐᒍᑦ. ᐅᕝᕙᓘᓐᓃᑦ ᑲᖑᕋᓱᐊᖅᑐᑕ ᐅᕝᕙᓘᓐᓃᑦ ᑐᑦᑐᒐᓱᐊᖅᑐᑕ. ᑖᒃᑯᐊᓕᒫᑦ ᐃᖅᑲᓇᐃᔭᕐᓂᓪᓚᕆᐅᖏᑦᑐᑦ. ᐅᕙᒍᑦ ᓄᖅᑲᖓᕕᒋᔭᑦᑎᓐᓂ; ᐃᓱᒪᐃᓐᓇᖅᑭᕕᕗᑦ. ᐅᐃᕐᖓᔅᓵᑐᖃᐅᓕᖅᑎᓪᓗᒍ, ᑐᑦᑐᓂᑦ ᓂᒃᑯᔅᓰᕕᐅᔪᖅ. ᓂᕿᓄᑦ ᓂᒃᑯᔅᓰᕕᖃᖅᑐᒍᑦ ᐃᓪᓗᕋᓛᒥᑦ ᐊᑖᑕᑦᑎᐊᒪ ᓴᓇᓚᐅᖅᓯᒪᔭᖓ ᐃᒪᖃ 30 ᐊᕐᕌᒎᓕᖅᑐᑦ, ᐊᒻᒪ ᓱᓕ ᒪᑭᑕᔪᖅ.
ᐊᑖᑕᒪ ᓴᓇᓚᐅᖅᑕᖓ ᐃᓪᓗᕋᓛᖅ ᖃᓂᒋᔭᖓᓂ 37 ᐊᕐᕌᒎᓕᖅᑐᑦ, ᐊᒻᒪ ᓯᕗᓪᓕᖅᐹᖑᓚᐅᖅᑐᒍᑦ ᐃᓪᓗᕋᓛᒥᑦ ᓇᓐᓂᖓᓂ ᐅᕙᒍᑦ ᐃᓚᒋᖑᓪᓗᑕ — ᐊᖏᔪᖅᑳᒃᑲ, ᐅᕙᖓ ᐊᒻᒪ ᐱᖓᓱᑦ ᓇᔭᒃᑲ. ᑭᖑᓂᐊᒍᑦ ᐊᑖᑕᑦᑎᐊᑯᒃᑲ ᐃᓪᓗᕋᓛᓕᐅᖅᑕᐅᖅᑐᑦ, ᐊᒻᒪ ᐊᑦᑕᒐ ᐊᒻᒪ ᐊᒃᑲᒐ, ᐊᒻᒪᓗᒃᑲᓐᓂ, ᐊᑦᑕᒐ ᐊᒻᒪ ᐊᒃᑲᒐ. ᐊᒻᒪ ᐅᕙᖓ ᐃᓪᓗᕋᓛᓕᐅᖅᑐᖓ. ᐊᒻᒪ ᐃᓪᓐᓗᕋ ᐊᒻᒪ ᐅᑯᐊᑯᓗᒐ ᐃᓪᓗᕋᓛᓕᐅᓚᐅᖅᑐᑦ. ᒫᓐᓇ, ᑕᓪᓕᒪᓂ ᐃᓪᓗᕋᓛᖃᖅᑐᒍᑦ ᒥᑭᔪᒥ ᓇᒦᓐᓂᖓᓂ. ᐅᔪᕈᒃᑲᑕᐃᕙᑦᑕᖓ ᓄᓇᓕᐅᔪᖅ ᕕᓕᔅ!
ᐅᖃᐅᓯᖅ ᐊᑐᖃᑦᑕᖅᑕᕗᑦ ᐅᖃᐅᓯᕆᓪᓗᒍ ᑖᓐᓇ ᓄᓇᐅᔪᖅ ᑲᔾᔮᕐᓄᖅ. ᐃᓱᒪᒋᔭᕋ ᖃᓂᓛᕆᔭᖓ ᖃᓪᓗᓈᑎᑐᑦ “ᑲᔾᔮᓇᖅᑐᖅ.” ᓴᐃᓕᓇᖅᑐᖅ, ᐱᐅᔫᓪᓗᓂ. ᑲᔾᔮᕐᓄᖅ ᐊᒥᓱᓂᑦ ᑐᑭᖃᖅᑐᖅ ᑲᑎᑦᑎᒍᓐᓇᖅᑕᑎᑦ ᖃᓪᓗᓈᑎᑐᑦ, ᑭᓯᐊᓂ ᐃᓄᒃᑎᑐᑦ ᐊᑕᐅᓯᑐᐃᓐᓇᖅ ᐅᖃᐅᓯᖅ ᑖᒃᑯᓄᖓ ᐃᑉᐱᓐᓂᐊᓕᒫᖑᔪᓄᑦ.
ᐱᒋᐊᖅᑐᓂ ᐃᐳᕈ ᓄᓐᖑᖏᓐᓂ, ᐱᓇᓱᐊᕈᓯᐅᑉ ᓄᓐᖑᐊᓂ ᓯᓚᑦᑎᐊᕙᐅᒍᓂ, ᖃᐅᔨᒪᔪᒍᑦ ᑭᒃᑯᓕᒫᑦ ᑕᐃᑯᓐᖓᓂᐊᕐᒥᔪᑦ. ᐱᒋᐊᖃᑦᑕᖅᑐᒍᑦ ᐅᓪᓗᐃᓈᓂᕐᒧᑦ ᐊᐅᓪᓚᓂᕐᒧᑦ, ᐊᒻᒪ ᑕᐃᒪ, ᐱᓇᓱᐊᕈᓯᒐᓚᐃᑦ ᐊᓂᒍᖅᑎᓪᓗᒋᑦ, ᐅᖅᑰᓂᖅᓴᐅᓕᖅᑎᓪᓗᒍ, ᓯᓂᒍᓐᓇᖃᑦᑕᖅᑐᒍᑦ ᐃᓪᓗᕋᓛᑦᑎᓐᓂ. ᐊᑐᖃᑦᑕᖏᑕᕗᑦ ᐃᓪᓗᕋᓛᑦ ᓂᓪᓕᓇᓗᐊᓕᖃᑦᑕᕐᖓᑕ, ᑭᓯᐊᓂ ᖃᒧᑕᐅᔭᒃᑯᑦ ᖃᐅᔨᒋᐊᖃᑦᑕᖅᑕᕗᑦ ᐃᓪᓗᕋᓛᑦ ᖃᓄᐃᖏᒃᑲᓗᐊᕐᒪᖔᑕ ᐊᒻᒪ ᐊᐳᑎᖃᖏᓪᓗᑎ ᐃᓗᖏᓐᓂ. ᐃᖏᕋᖃᑦᑕᕈᓐᓇᖅᑐᒍᑦ ᑐᑦᑐᑕᖃᕐᒪᖔᖅ ᖃᓂᒋᔭᖓᓂ ᑐᑦᑐᒐᓱᐊᓂᐊᕐᓗᑕ.
ᐅᖃᐅᓯᖃᖅᑎᓪᓗᖓ ᐃᓪᓗᕋᓛᒥᑦ ᑕ−>ᕙᓂ ᐅᓂᒃᑳᓂᑦ, ᐅᐸᒍᒪᓕᖅᑐᕋ. ᓯᓚᖓ ᓯᓚᑲᒻᒪᐅᓯᒪᔪᖅ ᓯᓚᓗᑦᑐᓂ ᐊᒻᒪ ᓴᖅᓯᖅᑐᓂ. ᐱᒡᒐᓇᖅᓯᕙᑦᑐᖅ ᓄᓇᓕᒻᒦᑦᑐᓂ ᖃᐅᔨᒪᓪᓗᓂ ᐃᓪᓗᕋᓛᒦᖔᕈᓐᓇᖅᑐᑕ.
ᐱᕈᖅᓴᓚᐅᖅᑐᖓ ᐃᓪᓗᕋᓛᒥᑦ ᐊᒻᒪ ᐊᐅᔭᓕᒫᖅ ᓇᔪᖅᓯᒪᕕᓪᓗᒋᑦ. ᑕᐃᒪᐃᓐᓂᖓᓄᑦ ᐅᕙᓐᓄᑦ ᓴᐃᓕᓇᖅᑐᖅ ᓄᓇᖓ ᐅᕙᓐᓄᑦ. ᐊᒥᓲᓪᓗᑕ ᐃᓚᒌᑦᑎᓐᓂ, ᖁᕕᐊᓇᕆᔭᕗᑦ ᓄᓇᐅᔪᖅ. ᓇᒧᓐᖓᕐᕕᒋᔪᓐᓇᖅᑕᕗᑦ ᖃᓄᐃᓘᕐᓂᖃᑐᐃᓐᓇᕐᓗᑕ ᐃᓚᒌᖑᓪᓗᑕ, ᐃᓕᓐᓂᐊᑎᑦᑎᔪᑎᒋᔪᓐᓇᖅᑕᕗᑦ ᐱᖅᑯᓯᑦᑎᓐᓂ ᓱᕈᓯᑦᑎᓐᓄᑦ. ᐃᑲᔪᖃᑦᑕᖅᑐᖅ ᐅᕙᒍᑦ ᐅᖃᐅᓯᖏᓐᓄᑦ. ᐃᑲᔪᕐᓂᖃᒻᒪᕆᑦᑐᑦ ᓴᓐᖓᑦᑎᒋᐊᖅᑐᒍ ᐊᒻᒪ ᓴᐳᒻᒥᓪᓗᒍ, ᐅᕙᑦᑎᓐᓄᑐᐃᓐᓇᐅᖏᑦᑐᖅ ᑭᓯᐊᓂ ᓱᕈᓯᑦᑎᓐᓄᑦ.
ᓱᕈᓯᒃᑲ ᖁᕕᐊᒋᒻᒥᔭᖓ ᐃᓪᓗᕋᓛᖅ. ᐃᓕᓐᓂᐊᕕᒻᒦᖏᑦᑐᑦ, ᑭᓯᐊᓂ ᑕᑉᐸᐅᖓᖅᐸᑦᑐᒍᑦ ᐱᔪᓐᓇᖅᓯᒐᐃᒐᑦᑕ. ᐃᓪᓗᕋᓛᒥᑦ, ᐃᓕᓐᓂᐊᖅᑎᓚᐅᖅᑕᕗᑦ ᖃᓄᖅ ᐊᑦᑕᓇᐃᖅᓯᒪᒍᓐᓇᓂᕐᒧᑦ ᓄᓇᒦᓪᓗᓂ. ᐱᒻᒪᕆᐅᔪᖅ ᐃᓕᓴᖅᓯᓗᑎ ᖃᓄᖅ ᐊᑦᑕᓇᐃᖅᓯᒪᔪᓐᓇᓂᕐᒧᑦ ᐊᒻᒪᓗᑦᑕᐅᖅ ᑲᒪᒋᔭᕆᐊᖃᖅᑕᑎᓐᓂ ᓄᓇᒦᑦᑎᓪᓗᑕ. ᐱᓕᕆᐊᔅᓴᖅᑕᖃᖅᑐᑦ ᐱᓕᕆᒋᐊᖃᖅᑕᑎᓐᓂ, ᑭᓯᐊᓂ ᑕᐃᒪᐃᑉᐸᑦᑐᒍᑦ ᐃᓚᒌᖑᓪᓗᑕ, ᐊᒻᒪ ᐊᔾᔨᒌᖏᑦᑐᓂᑦ ᑲᒪᒋᔭᖃᕆᐊᖃᖅᑐᑎᑦ. ᐱᒻᒪᕆᔭᐅᔪᑦ ᑐᓂᔭᐅᖃᑦᑕᖅᑐᑦ. ᑭᓯᐊᓂ, ᐅᖃᖅᑲᐅᒐᒪ, ᐱᓪᓚᐱᒋᔭᐅᔪᖅ ᖁᕕᐊᓴᖅᑑᓪᓗᓂ ᓄᓇᐅᔪᖅ ᐅᕙᑦᑎᓐᓄᑦ, ᐃᓕᓐᓂᐊᑎᑦᑐᑎᒍᓗ ᐃᓚᕗᑦ ᐱᒻᒪᕆᒋᔭᐅᔪᓂᑦ ᐊᒻᒪ ᐅᖃᐅᓯᑦᑎᓐᓂ ᐊᒻᒪ ᐱᖅᑯᓯᑦᑎᓐᓂ. ᐃᓪᓗᕋᓛᖅ ᐅᕙᑦᑎᓐᓄᑦ ᐃᓚᒌᖑᓪᓗᑕ ᐱᓕᕆᓂᓪᓗᐊᑕᕆᔭᕗᑦ. ᒪᒥᓴᕐᕕᐅᔪᖅ ᓄᓇᖓ. ᐱᐅᔪᒻᒪᕆᒃ ᐅᕙᒍᑦ ᖃᓄᐃᖏᑎᐊᕐᓂᖏᓐᓄᑦ.
ᐃᐳᕈᕉᓕᕋᐃᒻᒪᑦ, ᑭᓯᐊᓂ ᓇᒧᓐᖓᕈᓐᓇᐃᓪᓕᒐᐃᒐᑦᑕ, ᐃᓅᕕᒋᖃᑦᑕᖅᑕᕗᑦ ᐱᓇᓱᐊᕈᓯᐅᑉ ᓄᓐᖑᖏᑦ. ᐊᐱᕆᒍᕕᑦ ᑭᓇᑐᐃᓐᓇᕐᒥᑦ ᐅᕙᓂᒥᐅᑕᒥᑦ, ᐃᓪᓗᕋᓛᖃᕈᕕᑦ ᐅᕝᕙᓘᓐᓃᑦ ᑐᐱᖅᕕᒻᒥ, ᑭᓱᓕᐊᒃᓴᖃᕈᓐᓃᕋᐃᒐᕕᑦ ᑕᐃᑲᓃᖏᓐᓇᕈᒪᑐᐃᓐᓇᖅᑐᑎᑦ.
ᐊᒥᓲᓗᐊᖏᑦᑐᑦ ᐃᓄᐃᑦ ᖃᐅᔨᒪᔪᑦ, ᑭᓯᐊᓂ ᑭᓯᐊᓂ ᐊᑖᑕᒐ ᐃᓗᕕᖅᑕᐅᓯᒪᔪᖅ ᐃᓪᓗᕋᓛᖃᕐᕕᑎᓐᓂᑦ. ᐃᓅᔪᓐᓃᓚᐅᖅᑐᖅ ᔮᓐᓄᐊᕆ 2011. ᐊᒻᒪ ᐸᕐᓇᓯᒪᓚᐅᖅᑐᖅ ᓄᓇᒋᓗᓕᐅᒃ ᓄᖅᑲᕕᒍᓐᓇᕐᓂᕈᓂ. ᓯᓐᓇᑦᑐᐊᕆᓯᒪᔭᖓ ᕿᑐᓐᖓᓕᒫᖏᑦ ᐊᒻᒪ ᐃᕐᖑᑕᓕᒫᖏᑦ ᑕᐃᑲᓃᖏᓐᓇᖁᔭᖏᑦ. ᓯᓇᑦᑐᐊᖓ ᑐᓂᓇᓱᐊᖅᑕᕗᑦ ᐅᕙᒍᑦ ᕿᑐᓐᖓᖏᓐᓄᑦ. ᓇᓪᓕᒋᓗᒍ ᑕᐃᑲᓂ, ᐃᑉᐱᒋᑦᑎᐊᕐᓗᒍ, ᑭᓯᐊᓂ ᖁᕕᐊᒋᓗᒍᑦᑕᐅᖅ ᐊᒻᒪ ᑲᑐᑎᔭᐅᓗᓂ.
ᐱᖃᓐᓇᒃᑲ ᐊᒻᒪ ᐃᖅᑲᓇᐃᔭᖃᑎᒃᑲ ᐅᕙᖓ ᐃᓪᓗᕋᓛᖓᓅᕈᑎᓯᒪᔭᒃᑲ, ᐊᒻᒪ ᑕᐃᑯᖓᕋᐃᒻᒪᑕ, ᐅᖃᐃᓐᓇᖃᑦᑕᖅᑐᑦ, “ᐄ, ᒫᓐᓇ, ᑐᑭᓯᕗᖓ ᓱᒻᒪᑦ ᑖᓐᓇ ᐅᖃᐅᓯᕇᓐᓇᖃᑦᑕᕐᒪᖔᖅᐱᐅᒃ ᐊᒻᒪ ᐱᓕᕆᐊᒃᓴᖃᕈᓐᓃᕋᐃᒐᕕᑦ ᑕᕝᕙᓃᖏᓐᓇᖃᑦᑕᖅᑐᑎᑦ ᐃᕝᕕᑦ ᐃᓪᓗᕋᓛᖓᓂ.”
ᐳᔾᔫᑦ ᑯᓱᒐᖅ ᐱᑕᖃᖅᑎᑦᑎᓚᐅᖅᑐᖅ ᐃᓄᒃᑎᑐᑦ ᐅᖃᐅᓯᕐᒥ ᐊᒥᐊᓖᑦ ᑕᑯᔅᓴᐅᑎᑕᐅᔪᑦ ᐊᒻᒪ ᖃᐅᔨᓴᖅᑕᐅᓂᖏᑦ ᕙᓯᑭᕝᕚ 2024 ᐱᐅᕆᔅ ᐊᐅᔭᒃᑯᑦ ᐱᓐᖑᐊᕕᒃᔪᐊᑎᓪᓗᒋᑦ. ᐳᔾᔫᑦ ᐅᖃᖅᑎᐅᓚᐅᖅᑐᖅ ᕼᐊᑭᖅᑐᓂᑦ 2010 ᕚᓐᑰᕗ ᐅᑭᐅᒃᑯᑦ ᐱᓐᖑᐊᕕᒃᔪᐊᑎᓪᓗᒋᑦ, 2022 ᐸᐃᔨᖕ ᐅᑭᐅᒃᑯᑦ ᐱᓐᖑᐊᕕᒃᔪᐊᑎᓪᓗᒋᑦ ᐊᒻᒪ 2023 ᐅᑭᐅᑕᖅᑐᒥ ᐅᑭᐅᒃᑯᑦ ᐱᓐᖑᐊᕕᕐᔪᐊᑎᓪᓗᒋᑦ ᐅᐊᓐᓇᖓᓂ ᐃᐅᐴᑕ.
Advertisement
Related Content
People & Culture
ᕼᐃᐊᑦ ᕼᐃᐊᑦ ᕙᓯᑭᕚ, ᐃᓄᒃᑎᑐᑦ ᐱᓐᖑᐊᕈᓯᖓ
ᑎᐊᒃ ᑎᐊᒃ ᑕᑯᔅᓴᐅᑎᑕᐅᖏᑦᑐᓂᑦ ᐳᔾᔫᑦ ᑯᓱᒐᖅ, ᐃᓄᑦᑎᑑᖅᑐᓂ ᐊᒥᐊᓕᓐᓂᑦ ᐅᖃᖅᑎᐅᓚᐅᖅᑐᖅ ᐊᒥᓱᒐᓚᓐᓄᑦ ᕚᓯᑭᕚᒥ ᐱᓐᖑᐊᖅᑐᓂᑦ 2024 ᐱᐅᕆᔅ ᐊᐅᔭᒃᑯᑦ ᐱᓐᖑᐊᕕᒃᔪᐊᑎᓪᓗᒋᑦ
- 505 words
- 3 minutes
People & Culture
Nunavut at 25: The circle of change
Journalist and storyteller Whit Fraser reflects on Nunavut’s past, present and future
- 1812 words
- 8 minutes
Places
Nunavut 25 : Le cercle du changement
Le journaliste et conteur Whit Fraser réfléchit au passé, au présent et à l’avenir du Nunavut
- 2123 words
- 9 minutes
Advertisement
Advertisement