ᒪᒃᑯᑦᑐᑦ ᐃᑦᑕᕐᓂᓴᓕᕆᔨᓄᑦ ᐃᑲᔪᖅᑎ ᖃᐅᔨᔪᒪᓂᖃᓚᐅᖅᑐᖅ ᐃᓄᖃᕈᓐᓃᖅᑐᒥᑦ ᐸᓖᓯᖃᕐᕕᒥᓂᖅ ᐊᑭᖓᓂ Nares Strait ᐊᑯᑭᑦᑐᓂᑦ. ᐊᐅᓚᓂᖃᕈᓐᓃᖅᑎᑕᐅᓯᒪᔪᖅ 10 ᐊᕐᕌᒍᑐᐃᓐᓇᐃᑦ ᓴᓇᔭᐅᓚᐅᖅᑎᓪᓗᒍ, ᐸᓖᓯᒃᑯᑦ, ᐱᖓᓲᔪᖅᑑᔪᑦ ᐃᓗᐃᑦ, ᐅᓪᓗᒥ ᐃᓕᓴᕆᔭᐅᔪᖅ ᒐᕙᒪᑐᖃᒃᑯᓐᓄᑦ ᐱᖅᑯᓯᑐᖃᕐᓄᑦ ᐃᓪᓘᓪᓗᓂ. ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐃᓚᒋᑕᖓ ᐸᓖᓯᒃᑯᒥᓃᑦ ᐱᖅᑯᓯᑐᖃᖓᓄ ᐃᓄᓐᓄᑦ ᐸᓖᓯᓄᑦ ᑎᑎᕋᖅᑕᐅᓯᒪᔪᑦ ᑕᐃᑲᓃᑦᑐᑎᑦ ᑕᐃᔅᓱᒪᓂ ᓇᓗᓇᖅᑑᑎᓪᓗᒍ, ᐱᖃᓯᐅᑎᓪᓗᑎ, ᒪᓕᑦᑐᒋᑦ ᒐᕙᒪᑐᖃᒃᑯᑦ ᑎᑎᕋᖅᓯᒪᔭᖏᓐᓂ, “ᐊᐃᕙᓚᕼᐊ ᐱᔾᔭᓂᒥᓂᖅ, ᕿᓕᒃᑎ, ᐸᓂᑉᐸᑯᑦᑐᒃ, ᐋᕆᐊᒃ ᐊᒻᒪ ᐃᓚᖏᑦ,” ᐊᒻᒪᓗᑦᑕᐅᖅ ᐅᑭᐅᑕᖅᑐᒥ ᕿᓂᖅᑎ ᐸᓖᓯᕈᖅᓯᒪᔪᖅ ᕼᐃᐊᓄᕆ ᓛᓴᓐ.

ᓇᒻᒥᓂᖅ ᑕᑯᓚᐅᖅᑎᓐᓇᓂᐅᒃ, ᑭᒍᑦᑕᖅ ᐃᓄᓐᓂᑦ ᑐᓴᖅᓯᒪᔪᖅ ᐅᖃᐅᓯᖃᖅᑐᑎᑦ ᐅᖓᓯᑦᑐᒥ ᐸᓖᓯᒃᑯᒥᓂᕐᓂᑦ ᓴᓇᓐᖑᐊᕐᕕᒻᒥ. “ᑐᓴᓚᖑᖅᓯᒪᔭᕋ ᐊᖏᔪᖅᑳᒃᑲ ᓱᓕ ᐃᓅᑎᓪᓗᒋᑦ. ᐃᓄᐃᑦ ᑕᑉᐹᓃᔅᓯᒪᔪᑦ ᐅᓂᒃᑳᖅᐸᔪᔪᑦ ᐳᓛᕆᐊᕋᐃᒻᒪᑕ ᐅᕙᖓ ᐊᖏᔪᖅᑳᖏᓐᓄᑦ, ᐊᒻᒪ ᓈᓚᑉᐸᔪᔭᒃᑲ, “ᐅᖃᖅᑐᖅ ᑭᒍᑦᑕᖅ.

ᓴᓇᖑᐊᕕᒻᒥ ᐸᓖᓯᒃᑯᑦ ᐃᓚᒋᓚᐅᖅᑕᖓ ᑎᓴᒪᓂᑦ ᖁᑦᑎᑦᑐᒥ ᐅᑭᐅᑕᖅᑐᒥ ᐸᓖᓯᒃᑯᑦ — ᓴᓇᓐᖑᐊᕐᕕᒃ, Dundas Harbour, Bache Peninsula ᐊᒻᒪ Craig Harbour — ᖃᐅᔨᒪᔭᐅᓚᐅᖅᑐᑦ “ᐃᒥᖕᒪᐃᑦ ᐅᐊᑦᑎᖃᑦᑕᖅᑐᑦ.”

ᓇᐃᑦᑐᒥ ᐱᖅᑯᓯᑐᖃᕐᓂᑦ ᐃᓕᑦᑕᐅᓯᒪᔪᓂᑦ ᑕᕝᕙᓂ ᐱᑕᖃᖅᑐᖅ. ᐊᐅᓱᐃᑦᑐᖅ, ᑭᒍᑦᑕᐅᑉ ᓄᓇᒋᔭᖓ, ᐅᐊᓐᓇᖓᓃᓛᖑᔪᖅ ᓄᓇᓕᐅᔪᖅ ᑲᓇᑕᒥ (ᐱᖃᓯᐅᑎᖏᒃᑯᕕᒋᑦ ᐅᓇᓕᒃᑯᑦ ᐱᑕᖃᕐᓂᖏᑦ ᐊᓅᕐᑦᒥ, ᓄᓇᕗᑦ, ᑲᓇᑕᒥ ᐅᓇᓕᒃᑯᑦ ᐊᐅᓚᑦᑎᔪᑦ ᓈᓚᐅᑎᒃᑰᕈᑎᓂᑦ). ᐃᓄᓐᓄᑦ ᓄᓇᒋᔭᐅᓪᓚᕆᖏᑦᑐᖅ, ᑭᓯᐊᓂ ᐃᓄᖃᓕᓚᐅᖅᑐᖅ 1950−ᖏᓐᓂ ᒐᕙᒪᑐᖃᒃᑯᑦ ᐊᐅᓪᓛᑎᑦᑎᒻᒪᑕ ᑎᓴᒪᐅᔪᖅᑐᓂᑦ ᐃᓚᒌᓂᑦ ᐃᓄᒃᔪᐊᕐᒥᑦ, ᐊᒻᒪ ᒥᑦᑎᒪᑕᓕᒻᒥ, ᓄᓇᕗᑦ, ᐊᐅᓱᐃᑦᑐᒧᑦ ᐊᒻᒪ ᖃᐅᓱᐃᑦᑐᒧᑦ Cornwallis Island−ᒥ ᑭᖑᓂᐊᒍᑦ ᖃᐅᖁᔨᒪᔭᐅᓕᓚᐅᖅᑐᖅ ᖁᑦᑎᑐᒧ ᐅᑭᐅᑕᖅᑐᒧᑦ ᓅᑦᑎᖅᑕᐅᔪᑦ. ᑖᒃᑯᐊ ᐅᖓᓯᑦᑐᒦᑦᑐᑦ ᓄᓇᓖᑦ ᑲᓇᑕᒧ ᓇᓗᓇᐃᖅᓯᒍᑎᒋᓚᐅᖅᑕᖏᑦ ᑲᓇᑕᒧ ᐱᒋᔭᐅᓪᓗᓂ ᐅᑭᐅᑕᖅᑐᖅ ᕿᑭᖅᑕᒐᓚᖏᑦ. 

ᕚᓐᑐ ᓵᕝ ᐃᖅᑲᓇᐃᔭᖅᑐᖅ ᖃᐅᓱᐃᑦᑐᒥ, ᐅᖃᓕᒫᖅᑎᐅᖃᑦᑕᖅᓯᒪᔪᖅ ᐸᓖᓯᒃᑯᑦ ᐱᖅᑯᓯᒥᑐᖃᖏᓐᓂ. ᐃᖅᑲᐅᒪᔪᖅ ᐅᖃᓕᒫᖅᑐᓂ “ᐊᐅᐸᖅᑐᖅ ᐊᓐᓄᕌᖅ ᐊᒻᒪ ᓇᓄᕋᔭᐃᑦ ᖃᓪᓖᑦ,” ᐃᓅᓯᖓᓂ ᑎᑎᕋᖅᑕᐅᓯᒪᔪᑦ ᐸᓖᓯ ᕼᐃᐅᕆ ᓯᑖᕗᑎ ᓇᓗᓇᐃᔭᐃᓂᖃᖅᑐᖅ ᐊᑐᖃᑦᑕᖅᓯᒪᔭᖏᓐᓂ 1930−ᖏᓐᓂ ᐅᕙᓂ Bache Peninsula ᐸᓖᓯᒃᑯᑦ ᐅᐊᓐᓇᖓᓂ ᓴᓇᓐᖑᐊᕐᕕᒃ, ᑕᐃᒪᐃᓐᓂᖓᓄ ᓇᒦᓐᓂᖓ ᑕᑯᔪᒪᓚᐅᖅᑕᖓ. “ᐊᐅᓪᓚᕐᓂᐅᔪᖅ ᐱᐅᔪᒻᒪᕆᐅᓚᐅᖅᑐᖅ, ᑕᑯᒍᓐᓇᑲᓴᑦᑐᒍ, ᓴᓗᒪᑦᑎᐊᖅᑐᖅ. ᓯᑯᖃᓚᐅᖅᑐᖅ ᐊᐅᒌᖅᓯᒪᖏᑦᑐᓂᑦ, ᑕᑯᒍᓐᓇᑲᓴᑦᑐᒍ ᕿᑎᖓ. ᐱᐱᐅᔪᒻᒪᕿᐅᓛᖅᑐᖅ, “ᐅᖃᖅᑐᖅ ᕚᓐᑐ ᓵᕝ. “ᖃᖓᑕᓲᖅ ᓴᖑᑎᓪᓗᒍ ᐊᒻᒪ ᑕᑯᒍᓐᓇᑲᓴᑦᑐᒍ ᐃᒪᐅᑉ ᑭᓪᓕᖓ, ᐱᕈᖅᑐᑕᖃᖅᑐᖅ ᐊᒻᒪ ᑐᖑᔪᕈᔪᑦᑎᐊᖅᑐᓂ.”

ᐅᑭᐅᑕᖅᑐᖅ ᓯᓚᖓ, ᐊᒻᒪ ᓇᓄᐃᑦ, ᐃᓚᖏᓐᓂ ᓄᖑᑎᕆᓯᒪᓕᖅᑐᑦ ᐊᑐᖅᑕᐅᖃᑦᑕᖅᓯᒪᔪᓂᑦ, ᑐᓴᖅᑎᑦᑎᓚᐅᖅᑑᒐᓗᐊᖅ ᐸᓖᓯᖃᕐᕕᒥᓂᖅ ᓱᓕ ᐊᔾᔨᒋᔭᖓ ᖃᓄᐃᑑᓂᕆᓚᐅᖅᑕᖓᓂ 1950−ᖏᓐᓂ. “ᓱᕋᖅᓯᒪᔪᖅ ᐸᓖᓯᖃᕐᕕᒥᓂᓪᓗᐊᑕᖅ −− ᓇᓄᕐᓄᑦ ᐃᓯᖅᑕᐅᖃᑦᑕᖅᑐᓂ ᐃᓛᓐᓂᒃᑯᑦ. ᖃᐅᔨᒍᓐᓇᖅᑕᑎᑦ ᓇᓄᐃᑦ ᓇᐅᒃᑯᑦ ᐹᓐᖑᕋᓱᓚᐅᕐᓂᖏᓐᓄᑦ ᖁᓛᒍᑦ ᐊᒻᒪ ᑭᓪᓕᖓᒍᑦ ᒪᔪᖅᑐᑎ.”