
Science & Tech
ScIQ: ᓄᑖᖅ ᐊᑐᖅᑕᐅᓂᖓ ᐃᓄᓐᓄᑦ ᓈᒻᒪᒋᔭᐅᔪᓄᑦ ᖃᐅᔨᓴᕐᓂᖅ ᐅᑭᐅᑕᖅᑐᒥ
ᐃᓄᐃᑦ ᑕᑯᓐᓇᖅᑕᖏᑦ ᐱᒻᒪᕆᐅᓂᖏᑦ ᖃᓪᓗᓈᓄᑦ ᖃᐅᔨᓴᕐᓂᐅᔪᑦ ᑕᐃᒪᐃᓐᓂᖃᖅᑎᑕᐅᑎᓪᓗᒋᑦ ᐱᓕᕆᖃᑎᖃᖅᑐᑎᑦ ᓄᓇᓕᓐᓂᑦ. ᖃᓄᖅ ᓴᖑᒍᓐᓇᖅᑭᑕ ᒫᓐᓇᐅᔪᒥᑦ ᐊᑐᖅᑕᐅᕙᑦᑐᓂᑦ ᐃᑉᐱᒍᓱᓐᓂᖃᑦᑎᐊᓂᖅᓴᒧᑦ ᐊᑐᖅᑕᐅᔪᓐᓇᖅᑐᒥᑦ?
- 938 words
- 4 minutes
ᐊᑐᓂ ᑲᓇᑕᒥ ᐊᕕᑦᑐᖅᓯᒪᔪᓂᑦ ᐅᑭᐅᑕᖅᑐᒥᓗ ᑲᓇᑕᒥ ᓇᒻᒥᓂᖅ ᑕᑯᔭᒐᖃᕐᕕᖃᖅᑐᑦ, ᐊᑕᐅᓯᖅ ᐱᑕᖃᖏᑦᑐᖅ ᖃᐅᔨᔭᔅᓴᐅᓗᐊᖅᑐᓂ: ᓄᓇᕗᑦ. ᑭᓯᐊᓂᓕ, ᑕᒪᓐᓇ ᐊᓯᔾᔨᕐᓂᐊᓕᖅᑐᖅ ᐱᓇᓱᐊᖅᑕᐅᔪᑦ ᓴᖅᑭᑎᑦᑎᓂᕐᒧᑦ ᓄᓇᕗᒻᒥ ᐃᓄᐃᑦ ᐱᖁᑎᖏᓐᓂ ᓇᐅᔅᓯᑐᖅᑏᑦ ᐃᖏᕋᓯᕙᓪᓕᐊᓂᖃᖅᑎᓪᓗᒋᑦ.
ᓇᑭᓐᖔᕐᕕᒋᓯᒪᔭᖏᑦ ᑐᔅᓯᕌᖑᔪᒧᑦ ᐱᓕᕆᕕᒻᒧᑦ ᖃᐅᔨᔭᐅᔪᓐᓇᖅᑐᑦ ᐃᓚᖓ 33 ᐅᑯᓇᓂ 1993 ᓄᓇᕗᒻᒧ ᓄᓇᑖᕈᒻᒧ ᐊᖏᕈᑎᒥᑦ, ᓇᓗᓇᐃᖅᓯᔪᑦ ᓴᖅᑭᑎᑦᑎᓗᑎ ᐱᖅᑯᓯᓕᕆᕕᓐᓂᑦ ᐊᒻᒪ ᐅᑎᖅᑎᑕᐅᓂᖏᓐᓄᑦ ᓴᓇᔭᐅᓯᒪᔪᑦ, ᐃᑦᑕᕐᓂᓴᐃᑦ ᐊᒻᒪ ᐊᓯᖏᑦ ᓄᐊᑕᐅᓯᒪᔪᑦ ᑐᑯᔭᒐᖃᕐᕕᓐᓄᑦ ᐊᒻᒪ ᑕᑯᔅᓴᐅᑎᑦᑎᕕᐅᔪᓄᑦ ᑲᓇᑕᒥ ᐊᒻᒪ ᐅᖓᑖᓄᑦ.
ᐅᐃᓕᐊ ᐱᐊᕗᕆᔅ, ᑐᑭᒧᐊᖅᑎᑦᑎᔨᖓ ᐃᓄᐃᑦ ᐱᖁᑎᖏᓐᓂ ᓇᐅᔅᓯᑐᖅᑏᑦ, ᐃᖅᑲᓇᐃᔮᕆᒋᐊᓕᓚᐅᖅᑕᖓ ᐱᓕᕆᐊᖅ ᐃᓚᒋᓪᓗᒋᑦ ᓄᓇᕗᑦ ᒐᕙᒪᒃᑯᑦ 2022−ᒥᑦ. ᓯᕗᓪᓕᐹᖏᓐᓂ ᐊᕐᕌᒍᖏᓐᓂ, ᐱᔭᓪᓕᐊᓂᖓ ᐱᓕᕆᕕᒻᒧᑦ ᓱᒃᑲᐃᓪᓕᑎᑕᐅᓚᐅᖅᑐᖅ ᐊᒥᓱᓄᑦ ᐊᑭᑦᑐᕋᐅᑎᔪᓄᑦ
ᐱᔭᐅᔭᕆᐊᖃᖅᑐᓂᑦ ᓄᓇᕗᒻᒧᑦ — ᓄᓇᕗᑦ ᒐᕙᒪᒃᑯᑦ ᓯᕗᓪᓕᐅᔾᔨᔭᕆᐊᖃᓚᐅᖅᑐᑦ ᐃᓪᓗᓄᑦ, ᐱᖁᑎᕐᔪᐊᓄᑦ ᐊᒻᒪ ᐃᓕᓐᓂᐊᕐᕕᓄᑦ. ᐃᓱᐊᓂᓕ, ᒐᕙᒪᒃᑯᑦ ᓴᓂᕐᕙᐃᓚᐅᖅᑐᑦ ᐸᕐᓇᐅᑎᓂᑦ ᑲᔪᖏᖅᑕᐅᓯᒪᔪᒧᑦ ᐃᓪᓗᒧᑦ.
2019−ᒥ, ᐱᐊᕗᕆᔅ ᐊᒻᒪ ᐃᓄᐃᑦ ᐱᖁᑎᖏᓐᓂ ᓇᐅᔅᓯᑐᖅᑏᑦ ᕿᑎᖓᓄᐊᓂᓚᐅᖅᑐᑦ ᐊᒻᒪ ᑐᑭᒧᐊᖅᑎᑦᑎᓗᑎ ᐱᓕᕆᐊᒥᑦ, ᐃᑲᔪᖅᓱᑕᐅᓪᓗᓂ ᐊᕕᑦᑐᖅᓯᒪᔪᒥ ᐃᓄᐃᑦ ᑲᑐᔾᔨᖃᑎᒌᒌᓄᑦ ᐊᒻᒪ ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ (ᓄᓇᕗᑦ ᑐᓐᖓᕕᒃ ᑎᒥᖓ ᐊᐅᓚᑕᖏᑦ ᐊᒻᒪ ᐊᐅᓚᑦᑎᓂᖃᖅᑐᑦ ᐃᓄᐃᑦ ᑲᒪᒋᔭᕆᐊᓕᖏᓐᓂ ᐋᖅᑭᑦᑕᐅᓯᒪᔪᑦ ᓄᓇᕗᒻᒧᑦ ᐊᖏᕈᒻᒥᑦ ᐊᒻᒪ ᓇᓗᓇᐃᖅᓯᓪᓗᑎ ᑖᒃᑯᐊ ᒐᕙᒪᑐᖃᒃᑯᑦ ᐊᒻᒪ ᐅᑭᐅᑕᖅᑐᒥ ᒐᕙᒪᐃᑦ ᑎᑭᑦᑎᓗᑎ ᐱᓕᕆᒋᐊᖃᖅᑕᖏᓐᓂ).
ᐊᔭᐅᖅᑕᑕᐅᓂᖓ ᐃᓪᓗᒧᑦ ᓱᒃᑲᐃᑦᑑᓯᒪᔪᖅ ᑭᓯᐊᓂ ᐱᕙᓪᓕᐊᓂᖃᐃᓐᓇᖅᑐᖅ, ᐃᖏᕋᓯᒋᐊᓐᓂᖃᑦᑎᐊᖅᑐᓂ ᓴᖑᓚᐅᖅᑐᓂᑦ ᔪᓚᐃᒥ 2023 ᑎᐊᓐᒫᒃᒦᑦᑐᑦ ᓴᓇᓯᒪᔪᓕᕆᔩᑦ ᑎᒥᖓ Dorte Mandrup ᓂᕈᐊᖅᑕᐅᓚᐅᖅᑐᑦ ᓴᓇᓯᒪᔪᓕᐅᕐᓗᑎ ᐱᓕᕆᕕᒻᒧᑦ ᓵᓚᒃᓴᓚᐅᖅᑎᓪᓗᒋᑦ ᓯᓚᕐᔪᐊᒥ ᓴᓇᓯᒪᓂᖓᓄ ᐊᑭᑦᑐᕋᐅᑎᓂᕐᒥᑦ. ᔫᓂᒥ 2024, ᐃᖅᑲᓇᐃᔭᖅᑏᑦ ᐃᖃᓗᓐᓅᓚᐅᖅᑐᑦ, ᓂᕈᐊᖅᑐᑎ ᓇᔪᖅᑕᐅᓂᐊᖅᑐᒥᑦ ᓯᕗᓂᔅᓴᒥ ᐱᓕᕆᕕᒻᒧᑦ, ᑐᓂᓯᓗᑎ ᓴᓇᓯᒪᓂᖏᓐᓄᑦ ᐸᕐᓇᐅᑎᓂᑦ, ᐱᓕᕆᐊᕆᓪᓗᒋᑦ ᓄᓇᓕᒻᒧᑦ ᐊᐱᖅᑯᑕᐅᔪᑦ ᐊᒻᒪ ᐃᖅᑲᓇᐃᔭᕐᓂᖃᖅᑐᑎᑦ ᐱᑕᖃᕆᐊᖃᖅᑐᓂ ᓄᓇᒦᓪᓗᑎ ᓯᕗᒧᒋᐊᖅᑎᓪᓗᒍ ᐱᓕᕆᐊᖅ, ᐃᓗᓕᖏᑦ ᓴᓇᔭᐅᖁᔪᒥᓇᖅᑐᑦ ᑕᓪᓕᒪᐅᓂᐊᖅᑐᓂᑦ ᑎᑭᑦᑐᒍ ᑎᓴᒪᐅᔪᓐᖏᒐᖅᑐᓄ ᐊᕐᕌᒍᓂᑦ.
ᐃᖃᓗᓐᓃᑦᑐᖅ ᐱᕙᓪᓕᐊᔪᓕᕆᔨ ᑕᔅᑎ ᐸᑖ ᑲᑎᖃᑎᒋᓚᐅᖅᑕᖓ ᐅᐃᓕᐊ ᐱᐊᕗᕆᔅ ᐊᒻᒪ ᐃᓐᓇᑐᖃᖅᑐᖅ ᓴᑭᐊᓯ ᓴᐅᓪᓗᐊᐱᒃ, ᐃᓄᐃᑦ ᐱᖁᑎᖏᓐᓂ ᓇᐅᔅᓯᑐᖅᑎᑯᓐᓄᑦ ᑲᑎᒪᔨᐅᖃᑕᐅᔪᖅ, ᐅᖃᐅᓯᖃᖅᑐᑎᑦ ᓱᒻᒪᑦ ᑖᓐᓇ ᐱᓕᕆᐊᖅ ᐱᒻᒪᕆᐅᓂᖃᖅᐸᓪᓕᐊᓂᖓᓄᑦ ᐊᒻᒪ ᖃᓄᖅ ᑕᑯᔅᓴᐅᓂᖃᕋᔭᕐᒪᖔᖅ ᐊᒻᒪ ᐃᑉᐱᓐᓂᐊᔭᐅᓂᖓ.
ᐅᖃᐅᓯᐅᕆᔭᐅᓂᖅᓴᐅᓯᒪᓕᖅᑐᖅ ᑖᓐᓇ ᐱᓕᕆᐊᖅ ᒫᓐᓇᕋᑖᖑᓯᒪᔪᓂᑦ. ᐅᖃᐅᑎᒍᓐᓇᕿᓐᖔ ᖁᕕᐊᓱᒍᑕᐅᓂᖓᓄᑦ ᑕᒪᓐᓇ?
ᐅᐃᓕᐊ ᐱᐊᕗᕆᔅ: ᐊᒥᓱᑦ ᐃᓄᐃᑦ ᐅᔾᔨᕈᓱᖏᑦᑐᑦ ᓄᓇᕗᒻᒥ ᓄᐊᓯᒪᔭᕗᑦ ᑐᖅᑯᖅᑕᐅᓯᒪᒻᒪᑕ ᖃᓪᓗᓈᑦ ᓄᓇᖓᓐᓂ. ᐊᒥᓱᓂᑦ ᓄᐊᑦᑎᓯᒪᔪᒍᒍᑦ, ᐅᖓᑖᓃᑦᑐᑦ 200,000 ᒑᑎᓅᒥᑐᐊᖅ, ᐊᒻᒪ ᓴᓇᔭᐅᓯᒪᔪᑦ ᕗᐃᓂᒐᐃᒡᒥ. ᑕᐃᒪᐃᓐᓂᖓᓄᑦ, ᐅᖃᐅᓯᖃᖅᑎᓪᓗᑕ ᑖᒃᑯᐊ ᓄᐊᑕᐅᓯᒪᔪᑦ ᐊᖏᕋᐅᑎᓗᒋᑦ ᐊᒻᒪ ᐊᔾᔨᒌᖏᑦᑐᑦ ᖃᓄᐃᑦᑑᓂᖏᑦ ᐱᓕᕆᐊᑦ ᐊᐅᓚᒧᓐᓇᖅᑕᑎᓐᓂ ᐃᓄᐃᑦ ᐱᖁᑎᖏᓐᓂ ᓇᐅᔅᓯᑐᖅᑎᑯᓐᓂ, ᐊᒥᓱᑦ ᐃᓄᐃᑦ ᖁᕕᐊᓱᒍᑎᖃᖅᑐᑦ ᑕᒪᑐᒧᖓ ᐊᒻᒪ ᑕᐃᒪᐃᖁᔨᓪᓗᑎᕝ.
ᐱᖅᑯᓯᕗᑦ ᐊᒻᒪ ᐱᖅᑯᓯᑐᖃᕗᑦ ᐱᒻᒪᕆᐊᓘᔪᑦ ᐃᓄᓐᓄᑦ, ᑭᓯᐊᓂ ᐊᓯᔾᔨᖅᓯᒪᔪᒍᑦ ᕿᓚᒥᐅᓂᖃᖅᑐᒃᑯᑦ, ᐱᒋᒋᐊᖅᑐᓂ 60−ᖏᓐᓂ ᐊᒻᒪ 70−ᖏᓐᓂ ᐅᓪᓗᒥᒧᑦ ᑎᑭᑦᑐᒍ. ᐊᑐᓕᕈᓐᓇᖅᓯᓯᒪᔪᒍᒍᑦ ᓱᑲᑦᑐᒥᑦ ᐊᒻᒪ ᐃᖅᑲᓇᐃᔭᖃᑦᑕᖅᑐᒍᑦ ᖃᓪᓗᓈᑎᑐᑦ ᑐᕌᖓᓂᖃᓂᖅᑕᓂᑦ ᒫᓐᓇ, ᑭᓯᐊᓂᓕ ᑕᑯᔪᓐᓇᖅᑐᒍᑦ ᐃᓚᖏᓐᓂ ᔭᒐᐃᕙᓪᓕᐊᓕᖅᑐᑕ ᐱᖅᑯᓯᑐᖃᑦᑎᓐᓂᑦ, ᐃᓚᖏᑦ ᐅᕙᒍᑦ ᐱᖅᑯᓯᖏᓐᓂ — ᐱᓗᐊᖅᑐᒥᑦ ᒪᒃᑯᓂᖅᓴᐅᔪᓂᑦ ᑭᖑᕚᓂᑦ — ᐊᒻᒪ ᑕᒪᓐᓇ ᐊᖏᔪᒥᑦ ᐊᑦᑐᐃᓂᖃᖅᑐᖅ ᐅᕙᒍᑦ ᐃᓅᖃᑎᒌᓐᓂᕐᒧᑦ ᐃᓅᓂᕐᒧᑦ, ᐃᓅᖃᑎᒌᓐᓂᕐᒧᑦ ᖃᓄᐃᖏᑎᐊᕐᓂᕆᔭᓄᑦ ᐊᒻᒪ ᐱᖅᑯᓯᑎᓐᓄᑦ ᖃᓄᐃᖏᑎᐊᕐᓂᕆᔭᓄᑦ.
ᖃᐅᔨᒪᒐᕕᑦ, ᐊᒥᓱᓂᑦ ᐃᓱᒫᓘᑎᖃᕋᑦᑕ ᓄᓇᕗᒻᒥ ᑕᐃᒪᐃᑦᑎᑕᐅᔪᑦ ᐊᓯᔾᔨᖅᑐᓂᑦ ᕿᓚᒥᐅᔪᒃᑯᑦ. ᐊᒥᓲᔪᑦ ᐃᓅᖃᑎᒌᓐᓂᕐᒧᑦ ᐊᑲᐅᖏᓕᐅᕈᑎᐅᔪᑦ, ᐃᒻᒥᓃᕐᓂᖅ ᐃᓚᒋᔭᐅᓪᓗᓂ. ᖁᑦᑎᓛᖑᖃᑕᐅᔪᖅ ᓯᓚᕐᔪᐊᒥᑦ. ᑕᐃᒪᐃᓐᓂᖓᓄᑦ, ᑕᑯᔭᕋ ᐱᓕᕆᕕᐅᔪᖅ ᑲᑎᑦᑎᓪᓗᓂ ᐱᑕᖃᖏᑦᑐᓂᑦ ᐊᑯᓐᓂᖏᓐᓂ ᐃᓐᓇᑐᖃᐃᑦ ᐊᒻᒪ ᒪᒃᑯᑦᑐᑦ. ᐱᓕᕆᕕᑦᑕᖃᕐᓗᓂ, ᐃᓕᓐᓂᐊᖅᑎᒍᓐᓇᖅᑕᕗᑦ ᒪᒃᑯᑦᑐᕗᑦ ᓇᑭᓐᖔᖅᓯᒪᓂᑦᑎᓐᓂ ᐊᒻᒪ ᐃᓄᐃᑦ ᖃᓄᐃᓘᖃᑦᑕᓚᐅᕐᓂᖏᓐᓄᑦ. ᐅᓂᒃᑳᑦᑎᐊᕙᐅᔪᖅ ᐱᔾᔪᑎᒋᓪᓗᒐ ᓄᓇᖃᖅᑐᑕ ᐱᒡᒐᓇᖅᑐᒥᑦ ᐊᕙᑎᖓᓂ ᐊᒻᒪ ᐆᒪᔪᓐᓇᖅᑐᑕ ᐊᒻᒪ ᑲᔪᖏᖅᓯᒪᑦᑎᐊᖅᑐᑕ, ᐊᑐᓕᕈᓐᓇᑦᑎᐊᕆᐊᖃᖅᑐᑎᑦ ᐊᒻᒪ ᓯᓚᑐᔫᓗᑎ, ᐊᒻᒪ ᔭᒐᐃᕙᓪᓕᐊᓕᖅᑕᕗᑦ ᓇᒻᒥᓂᖅ ᓇᓗᓇᐃᖅᓯᒪᓂᕐᒧᑦ, ᐅᐱᒍᓱᓐᓂᐅᔪᖅ, ᓯᕗᒧᑉᐸᓪᓕᐊᑎᓪᓗᑕ — ᓯᕗᒧᒋᐊᖅᑐᑕ ᑕᕝᕙᓂ ᓄᑖᒥ ᓯᓚᕐᔪᐊᒥ. ᑭᓯᐊᓂᓕ ᑕᐃᒪᐃᒍᓐᓇᖏᑦᑐᒍᑦ; ᑕᒪᓐᓇ ᐱᓯᒪᒋᐊᖃᖅᑕᕗᑦ. ᖃᐅᔨᒪᔭᕿᐊᖃᖅᑐᒍᑦ ᓇᑭᓐᖔᖅᓯᒪᒻᒪᖔᑦᑕ.
ᐃᓐᓇᑐᖃᐃᑦ ᐃᓐᓇᑐᖃᕈᖅᐸᓪᓕᐊᖏᓐᓇᑎᓪᓗᒋᑦ, ᖃᓄᖅ ᑕᒪᓐᓇ ᐊᑦᑐᐃᓂᖃᖅᑲ ᐃᖅᑲᓇᐃᔮᖑᔪᒥᑦ ᐱᓕᕆᕕᒻᒥᑦ?
ᓴᑭᐊᓯ ᓴᐅᓪᓗᐊᐱᒃ: ᐃᓐᓇᑐᖃᕗᑦ ᓱᑲᑦᑐᒥᑦ ᐃᓅᒍᓐᓃᐸᓪᓕᐊᔪᑦ. ᐃᓅᒍᓐᓃᕋᐃᒻᒪᑕ, ᐅᓂᒃᑳᑦ, ᖃᐅᔨᒪᔭᐅᔪᑦ ᐊᒻᒪ ᐅᖃᐅᓰᓘᓐᓃᑦ ᐱᑕᖃᕈᓐᓃᓕᖅᑐᑦ ᓱᑲᑦᑐᒥᑦ. ᑕᐃᒪᐃᓐᓂᖓᓄᑦ, ᐱᓕᕆᐊᕆᓗᒍ ᐱᓕᕆᐊᖅ, ᐊᖏᔫᒐᓗᐊᖅᑎᓪᓗᒍ ᐊᒻᒪ ᐊᑐᕐᓂᐊᖅᑐᓂ ᐊᒥᓱᓂᑦ ᑭᓱᓕᕆᔾᔪᑎᓂᑦ, ᓱᑲᓐᓂᖅᓴᒥᑦ ᓅᒋᐊᖃᖅᑐᒍᑦ.
ᐃᓕᓐᓂᐊᕆᐊᖅᑎᑕᐅᓚᐅᖅᓯᒪᔪᖓ ᓅᑦᑎᖅᑕᐅᓚᐅᖅᑐᑕ ᓄᓇᓕᕋᓛᒥᑦ, ᐊᑐᖃᑦᑕᓚᐅᖅᑕᒃᑲ ᐃᓄᐃᑦ ᖃᐅᔨᒪᔭᖏᑦ ᐅᕙᖓ ᐊᖏᔪᖅᑳᖏᓐᓂ ᖃᐅᑕᒫᑦ ᐃᓅᓯᕐᒥᑦ: ᖃᓄᖅ ᐊᖑᓇᓱᐊᕐᓂᑎᓐᓄᑦ, ᖃᓄᖅ ᐊᖑᓇᓱᓐᓂᑎᓐᓄᑦ ᐆᒪᔪᓂᑦ, ᖃᓄᖅ ᐱᓚᑦᑐᐃᓂᕐᒥᑦ ᐆᒪᔪᓂᑦ, ᖃᓄᖅ ᖃᐅᔨᒪᒍᓐᓇᕐᓗᒋᑦ ᐊᐳᑏᑦ ᐊᐅᓪᓚᕐᓂᖃᖅᑎᓪᓗᑕ — ᑖᒃᑯᐊᓕᒫᑦ ᖃᐅᔨᒪᓂᐅᔪᑦ ᔭᒐᒪᐅᖅᑐᑦ ᓱᑲᑦᑐᒥᑦ, ᓱᑲᑦᑐᒻᒪᕆᒻᒥᑦ. ᑕᐃᒪᓐᖓᓂᑦ ᐅᓪᓗᒥᒧᑦ ᑎᑭᑦᑐᒍᒍ, ᔭᒐᐃᓯᒪᔪᒍᑦ ᐊᖏᔪᓂᑦ ᖃᐅᔨᒪᓂᐅᔪᓂᑦ. ᐱᑕᖃᕐᓗᓂ ᑖᓐᓇ ᐱᓕᕆᕕᒃ, ᐃᓱᒪᒋᔭᕋ, ᐊᖏᔪᒥᑦ ᐃᑲᔪᕐᓂᐊᖅᑐᖅ ᐊᒥᓱᓂᑦ, ᐊᒥᓱᓂᑦ ᓄᓇᕗᒻᒥᐅᓂᑦ. ᑕᒪᓐᓇᑐᐊᖑᖏᑦᑐᖅ, ᑭᓯᐊᓂ ᑲᓇᑕᒥᐅᑕᓕᒫᓄᑦ.
ᐅᐃᐊᓕᑎᑐᑦ ᐅᖃᖅᑕᐅᔭᖓ, ᑕᐅᓴᖏᓐᓃᑦᑐᑦ ᐃᑦᑕᕐᓂᓴᐃᑦ ᑕᖅᑳᓂᑦᑐᑦ ᐊᑐᖏᑕᒃᑲ, ᐅᕝᕙᓘᓐᓃᑦ ᓱᕈᓯᕐᒪ ᐊᑐᖏᑕᖏᑦ. ᐃᓕᓴᕕᒻᒥ ᐃᓕᓐᓂᐊᖅᑏᑦ ᐊᑐᖏᑕᖏᑦ — ᐅᕝᕙᓘᓐᓃᑦ ᐃᓕᓴᐃᔩᑦ — ᐱᔾᔪᑎᒋᓪᓗᒍ ᑕᑯᔪᓐᓇᖏᒻᒪᒋᑦ, ᐃᑉᐱᓐᓂᐊᔪᓐᓇᖏᒻᒪᒋᑦ.
ᐅᐃᓕᐊ ᐱᐊᕗᕆᔅ: ᑖᒃᑯᐊ ᐃᓐᓇᑐᖃᐃᑦ ᐱᓯᒪᔭᕗᑦ, ᓱᓕᔪᓂᑦ ᐃᓐᓇᑐᖃᕗᑦ ᓄᓇᒥᐅᑕᐅᓚᐅᖅᑐᑦ ᓯᕗᓂᐊᒍᑦ ᖃᓪᓗᓈᓄᑦ ᐊᐅᓚᑕᐅᓂᖏᓐᓄᑦ. ᑕᐃᒪᐃᓐᓂᖓᓄᑦ, ᓱᓕᔪᖅ, ᐃᓐᓇᑐᖃᖅᑕᖃᓂᐊᖅᑐᖅ ᑭᖑᓂᐊᒍᑦ, ᑭᓯᐊᓂ ᑕᐃᒃᑯᐊ ᓄᑖᖑᓂᐊᖅᑐᑦ ᐃᓐᓇᑐᖃᐅᓗᑎ ᓄᓇᖃᓚᐅᖅᑐᑦ ᓄᓇᓕᓐᓂᑦ. ᑕᐃᒪᐃᓐᓂᖓᓄᑦ, ᑖᒃᑯᐊ ᐃᓐᓇᑐᖃᕆᔭᕗᑦ ᐅᓪᓗᒥ ᐊᖏᔪᒥᑦ ᖃᐅᔨᒪᓂᖃᖅᑐᑦ. ᐃᓅᓚᐅᖅᑐᑦ ᐊᒻᒪ ᐱᕈᔅᓴᓪᓗᑎ ᓄᓇᒥ, ᐋᓐᓂᐊᕕᑦᑕᖃᖏᑦᑐᓂᑦ ᐅᕝᕙᓘᓐᓃᑦ ᓄᓇᓕᑦᑕᖃᑦᑕᖏᑦᑐᓂᑦ. ᐃᓅᓯᖃᓚᐅᖅᑐᖅ ᐃᓄᐃᑦ ᐃᓅᓯᖏᓐᓂ. ᐊᖏᔪᒥᑦ ᖃᐅᔨᒪᓂᖃᖅᑐᑦ ᒫᓐᓇ ᑕᒫᓃᑦᑎᓪᓗᒋᑦ, ᑕᐃᒪᐃᓐᓂᖓᓄ ᐱᕕᔅᓴᑭᑦᑑᔪᒍᑦ. ᓴᓇᔭᕆᐊᖃᖅᑕᕗᑦ ᑖᓐᓇ ᐱᓕᕆᕕᒃ ᕿᓚᒥᐅᔪᒃᑯᑦ.
ᐅᖃᐅᓯᖃᒐᓛᖅᑕᐅᒐᑯᑦ ᐊᒥᓲᓂᖏᑦ ᐃᑦᑕᕐᓂᓴᐃᑦ ᖃᓪᓗᓈᑦ ᓄᓇᖓᓃᑦᑐᑦ, ᑭᓯᐊᓂ ᐃᓱᒪᔪᖓ ᕿᒥᕐᕈᐊᕈᓐᓇᖅᓯᓯᒪᔭᑎᑦ ᐊᒻᒪ ᑕᑯᓪᓗᒋᑦ ᐃᓚᖏᑦ. ᐅᖃᐅᓯᖃᕈᓐᓇᖅᑮᑦ ᐃᓚᖏᓐᓂᑦ ᐃᕝᕕᑦ ᑕᑯᓚᐅᖅᑕᖏᓐᓂ?
ᐅᐃᓕᐊ ᐱᐊᕗᕆᔅ: ᐊᒥᓲᔪᑦ ᖃᓄᐃᑦᑐᑐᐃᓐᓇᐃᑦ — ᒥᒃᑭᓛᖓᓐᓂ ᒥᑭᔪᕋᒫ ᑑᒑᒥ ᓴᓇᖑᐊᒐᖅ ᑎᑭᑦᑐᒍ ᐊᖏᔪᓄᑦ ᖃᔭᖅ ᐅᕝᕙᓘᓐᓃᑦ ᐅᒥᐊᖅ. ᐱᑕᖃᕐᒥᔪᖅ [ᐊᕐᓇᓄᑦ] ᐊᓐᓄᕌᑦ, ᓲᕐᓗ ᐊᒪᐅᑏᑦ ᐅᕝᕙᓘᓐᓃᑦ ᐊᑎᒌᑦ [ᐊᑎᒌᑦ] ᓴᐸᖓᖃᖅᑐᑎᑦ. ᑲᒥᑦᑕᖃᕐᒥᔪᑦ [ᑲᒫᓗᐃᑦ], ᐊᒻᒪ ᖃᓄᐃᑦᑐᑐᐃᓐᓇᐃᑦ ᐃᑦᑕᕐᓂᓴᐃᑦ. ᒑᑎᓅᒨᕈᓐᓇᖅᑎᑕᐅᓚᐅᖅᑐᖓ [ᑯᐸᐃᒃ] ᑕᑯᔭᑐᖅᑐᒋᑦ ᓄᐊᑕᐅᓯᒪᔪᑦ [ᒫᓐᓇᐅᔪᒥᑦ ᑲᓇᑕᒥ ᑕᑯᔭᒐᖃᕐᕕᒦᑦᑐᑦ ᐱᖅᑯᓯᑐᖃᕐᓄᑦ].
ᐃᓚᒋᓚᐅᖅᑕᕗᑦ ᑲᑎᒪᔨᕗᑦ ᐊᒻᒪ ᐊᓯᖏᑦ ᐃᓐᓇᑐᖃᐅᔪᑦ, ᐱᐅᔪᒥᑦ ᐃᑉᐱᓐᓂᐊᓇᖅᑐᖅ ᑕᑯᓪᓗᒋᑦ ᑮᓇᖏᑦ ᖃᓄᐃᓕᓂᕆᔭᖏᑦ ᐃᓪᓗᕈᓯᕐᒨᖅᑐᑎ ᑕᑕᑦᑐᒥ ᐃᑦᑕᕐᓂᓴᕐᓂᑦ ᑕᑯᓚᐅᖅᓯᒪᖏᑕᖏᓐᓂ ᐊᒻᒪ ᐃᔨᖏᑦ ᒪᑐᐃᑦᑎᐊᓚᐅᖅᑐᑦ. ᐃᓚᖏᑦ ᐃᑉᐱᒍᓱᓐᓂᖃᓚᐅᖅᑐᑦ, ᐊᓯᖏᑦ ᖁᕕᐊᑦᑎᐊᓚᐅᖅᑐᑦ, ᐊᒻᒪ ᐅᖃᐅᓯᖃᕈᒪᓚᐅᖅᑐᑦ ᓄᐊᑕᐅᓯᒪᔪᓂᑦ ᐊᒻᒪ ᐃᑦᑕᕐᓂᓴᐃᓂᑦ ᐱᔪᒪᔭᖏᓐᓂ. ᐅᖃᐅᓯᖃᓚᐅᖅᑐᑦ ᐊᔾᔨᒌᖏᑦᑑᑎᓂᑦ ᑭᓱᓄᑦ ᐊᑐᖅᑕᐅᕙᓚᐅᕐᓂᖏᓐᓄᑦ; ᑐᓂᓯᔪᒪᔪᑦ ᖃᐅᔨᒪᓂᕆᔭᖏᓐᓂ.
ᑕᐃᒪᐃᓐᓂᖓᓄᑦ, ᐱᐅᔪᒥᑦ ᐃᑉᐱᓐᓂᐊᓇᖅᑐᖅ ᐅᐸᔅᓯᑦᑐᒋᑦ ᐃᓄᐃᑦ ᓄᐊᑕᐅᓯᒪᔪᓂᑦ, ᐊᒻᒪ ᐃᓱᒪᑐᐃᓐᓇᕈᓐᓇᖅᑐᖓ, ᑖᓐᓇ ᐱᓯᒪᓕᕈᑦᑎᒍ ᐱᖅᑯᓯᑐᖃᓕᕆᕕᒃ, ᖃᓄᖅ ᐱᐅᔪᒻᒪᕆᐅᒐᔭᕐᓂᖓᓄᑦ ᐃᖅᑲᓇᐃᔭᖃᑎᒋᓗᒋᑦ ᐃᓐᓇᑐᖃᐃᑦ, ᐃᓕᓐᓂᐊᑎᑦᑎᓂᖃᖅᑎᓪᓗᒋᑦ ᑖᒃᑯᐊ ᓄᐊᑕᐅᓯᒪᔪᑦ ᑭᓲᓚᐅᕐᒪᖔᑕ, ᑭᓱᓄᑦ ᐊᑐᖅᑕᐅᕙᓚᐅᕐᒪᖔᑕ, ᐊᒻᒪ ᑐᓂᔭᐅᓗᑎ ᑖᒃᑯᐊ ᖃᐅᔨᒪᓂᐅᔪᑦ ᒪᒃᑯᑦᑐᓄᑦ.
ᑖᓐᓇ ᐱᓕᕆᐊᖅ ᐃᖅᑲᓇᐃᔮᖑᓯᒪᔪᖅ ᐊᑯᓂᐅᔪᒥᑦ. ᑭᓲᕙᑦ ᐃᓚᖏᑦ ᐊᐳᕈᑎᐅᓛᖑᔪᑦ ᑕᒪᓐᓇ ᑕᐃᒪᐃᑦᑎᓪᓗᒍ?
ᐅᐃᓕᐊ ᐱᐊᕗᕆᔅ: ᐊᐳᕈᑎᐅᓛᖑᖑᓚᐅᖅᑐᖅ ᑮᓇᐅᔭᖃᖅᑎᑕᐅᓂᕐᒧᑦ; ᐊᑭᑭᑦᑑᖏᑦᑐᖅ. ᐊᒥᓲᓂᖏᓐᓄᑦ ᐃᑦᑕᕐᓂᓴᐃᑦ ᐊᒻᒪ ᓄᐊᑕᐅᓯᒪᔪᑦ ᐅᑎᐅᔾᔭᐅᓂᐊᖅᑐᑦ, ᐱᓕᕆᕕᖃᕆᐊᖃᖅᑐᒍᑦ ᐊᖏᓂᖓ ᓈᒻᒪᓪᓗᓂ ᐃᓗᐊᓃᑦᑎᓪᓗᒋᑦ ᑖᒃᑯᐊ ᓄᐊᑕᐅᓯᒪᔪᑦ, ᑐᖅᑯᖅᑕᐅᓗᑎ, ᑕᑯᔅᓴᐅᑎᑕᐅᓗᑎ ᐊᒻᒪ ᐊᑐᖅᑕᐅᓗᑎ.
ᐱᓕᕆᕕᐅᔪᖅ ᐊᖏᔪᒐᓚᐅᔪᖅ, ᖃᓂᒋᔭᖓᓂ 6,000 ᑭᑉᐹᕆᑦᑐᑦ ᒦᑕᐃᑦ. ᐊᑭᖓ ᐊᑭᑐᔪᒻᒪᕆᐅᔪᖅ ᐱᔾᔪᑎᒋᒋᓪᓗᒍ ᐊᔾᔨᐅᖏᑦᑐᓂ ᖃᐅᔨᒪᖃᑦᑎᓪᓗᒍ, ᐊᔾᔨᐅᖏᑦᑐᓂ ᓯᓚᖓᓄ ᐊᐅᓚᑕᐅᓂᖓ, UV ᓴᐳᒻᒥᔭᐅᓂᖓᓄ, ᐊᑦᑕᓇᐃᖅᓯᒪᑎᑦᑎᓂᕐᒧᑦ, ᐃᑭᔾᔭᐃᒃᑯᑎᓂᑦ. ᐃᓪᓗᒐᔪᖏᑦᑐᓂᑦ ᐃᓪᓘᔪᖅ, ᑕᐃᒪᐃᓐᓂᖓᓄᑦ ᐊᑭᒃᑲᓐᓂᖏᓐᓂ ᐱᖃᓯᐅᔾᔨᔪᑦ.
ᐱᒋᐊᖅᑐᓂ ᓴᓇᓯᒪᓂᖓᓄ ᓴᓇᓯᒪᔪᓕᐅᖅᓯᒪᓂᖓ ᓴᖅᑭᖅᑎᑕᐅᓂᖓᓄ ᓄᓇᖓ ᑎᑭᑦᑐᒍ ᓴᓇᔭᐅᓂᖓᓄᑦ ᐃᓪᓗᖅ ᖃᐅᔨᓇᓱᐊᖅᑐᒋᑦ ᐊᔾᔨᒌᖏᑦᑐᑦ ᐱᓕᕆᐊᑦ ᐊᐅᓚᓂᖃᕈᓐᓇᖅᑐᑦ ᐱᓕᖕᕆᕕᒻᒥ — ᑎᑭᓐᓂᖃᖅᑐᖅ ᖃᓂᒋᔭᖓᓄ $150 ᒥᓕᐊᓐ. ᑖᓐᓇ ᐊᖏᓛᖑᔪᖅ ᐊᐳᕈᑎᐅᔪᓄᑦ.
ᑕᑯᓯᒪᔪᖓ ᓴᓇᓯᒪᓂᖓᓄᑦ ᐱᑕᖃᖅᑎᑕᐅᔪᓂᑦ, ᑭᓯᐊᓂ ᐅᖃᐅᓯᖃᕈᓐᓇᖅᑭᑦ ᐃᓯᕐᕕᖓᒍᑦ? ᖃᓄᖅ ᐃᓱᒪᒋᔭᖃᓂᐊᖅᑭᑦ ᐊᒻᒪ ᐃᑉᐱᒋᓂᐊᖅᑭᐅᒃ?
ᓴᑭᐊᓯ ᓴᐅᓪᓗᐊᐱᒃ: ᑲᑎᒪᖃᑎᖃᖅᑎᓪᓗᑕ ᓄᓇᓕᒻᒥ, ᐅᕙᑦᑎᓐᓂ ᐅᖃᐅᔾᔨᓚᐅᖅᑐᑦ ᓇᓗᓇᐃᖅᓯᒪᑦᑎᐊᖅᑐᒥ ᐱᓕᕆᕕᐅᔪᖅ ᑭᒡᒐᖅᑐᐃᔭᕆᐊᖃᖅᑐᓂ ᓄᓇᒥᑦ ᐊᒻᒪ ᖃᓄᖅ ᐃᓕᓯᒪᓂᖓᓄᑦ — ᑭᑉᐹᕆᑦᑐᒡᒍᑎᐅᔾᔮᖏᑦᑐᑦ. ᐊᔾᔨᐅᒋᔭᐅᔾᔮᖏᑦᑐᖅ — ᐱᐅᔫᓗᓂ ᓯᓚᑖᓂ ᐊᒻᒪ ᐃᓗᐊᓂ.
ᐅᐃᓕᐊ ᐱᐊᕗᕆᔅ: ᑕᐃᒪᐃᓐᓂᖓᓄᑦ, ᑕᑯᒍᕕᐅᒃ ᐱᓕᕆᕕᐅᔪᖅ [ᓯᓚᑖᓂ], ᑎᑎᖅᑐᒐᖅᓯᒪᔪᑦ ᐱᖃᓯᐅᔾᔨᔪᑦ ᑖᔅᒧᒥᖓ. ᑕᑯᒍᓐᓇᖅᑕᐃᑦ ᖃᒻᒪᖅ, ᖃᒻᒪᖅ. ᑕᑯᒍᓐᓇᖅᑕᐃᑦ ᖃᔭᖅ ᓇᓗᓇᐃᖅᓯᒪᔪᒥ ᑕᑯᔅᓴᐅᓂᖓᓂ ᐃᓪᓗᒥ. ᑕᑯᒍᓐᓇᖅᑕᑎᑦ ᐊᖅᓴᕐᓃᑦ ᑕᑯᒍᕕᐅᒃ ᐃᓪᓗᖅ ᓯᓚᑖᓂ.
ᐃᓯᕈᕕᑦ, ᑐᓐᖓᓇᕐᓂᖃᕆᐊᓕᒃ [ᐱᒧᓐᓇᖅᑎᑕᐅᓗᑎ ᐳᓚᕋᖅᑎᑦ] ᑕᑯᓐᓇᖑᐊᕐᓗᑎ ᓄᐊᑕᐅᓯᒪᔪᓂᑦ. ᐊᔾᔨᒌᖏᑦᑑᑎᑦ ᐱᓕᕆᐊᑦ ᐊᐅᓚᓂᖃᓂᐊᖅᑐᑦ ᐱᓕᕆᕕᒻᒥᑦ, ᕿᔪᓕᕆᕕᑦᑕᖃᕐᓗᓂ, ᓂᕿᓄᑦ ᐊᒡᒍᐃᕕᒃ, ᐊᒻᒪᓗᑦᑕᐅᖅ ᒥᖅᓱᕕᒻᒥᑦ. ᐃᓚᒍᑕᖃᖅᑐᑦ ᑕᑯᔅᓴᐅᑎᑕᐅᔪᓄᑦ ᐃᕝᕕᑦ ᑕᑯᒍᓐᓇᓂᐊᖅᑕᖏᓐᓂ ᓄᐊᑕᐅᓯᒪᒧᓂᑦ ᐊᒻᒪ ᐃᓐᓇᑐᖃᐃᑦ ᐊᒻᒪ ᒪᒃᑯᑦᑐᑦ ᖃᓄᐃᓘᖃᑦᑕᐅᑎᓂᖃᕐᓗᑎ.
ᑖᓐᓇ ᐱᓕᕆᕕᒃ ᐱᑕᖃᖅᑎᑦᑎᓂᐊᖅᑐᖅ ᐃᓄᐃᑦ ᓂᐱᖏᓐᓂ ᓇᒻᒥᓂᖅ ᐅᓂᒃᑳᕐᓂᖃᖅᑐᒥ, ᐊᓯᐊᓃᖔᖏᑦᑐᓂᑦ ᑕᑯᔭᒐᖃᕐᕕᒻᒥ ᖃᓪᓗᓈᑦ ᓄᓇᖓᓐᓂ ᐅᕝᕙᓘᓐᓃᑦ ᐊᓯᐊᓂᑦ ᓇᑭᑐᐃᓐᓇᖅ. ᑭᓯᐊᓂ ᐱᒻᒪᕆᐅᓛᕆᔭᖓ, ᐃᓱᒪᒋᔭᕋ, ᖃᐅᔨᓴᕈᓐᓇᓂᐊᖅᑐᑕ ᐊᒻᒪ ᐊᐱᖅᓱᕐᓂᕆᔭᕗᑦ, ᐊᒻᒪ ᐅᖃᐅᓯᕆᔪᓐᓇᓕᕐᓗᑎᒍ ᐅᓂᒃᑲᕗᑦ ᐅᕙᒍᑦ ᑕᑯᓐᓇᖅᑕᖏᑎᒍᑦ — ᐃᓄᓐᓄᑦ ᐃᓄᓐᓃᖔᖅᑐᓂᑦ.
Science & Tech
ᐃᓄᐃᑦ ᑕᑯᓐᓇᖅᑕᖏᑦ ᐱᒻᒪᕆᐅᓂᖏᑦ ᖃᓪᓗᓈᓄᑦ ᖃᐅᔨᓴᕐᓂᐅᔪᑦ ᑕᐃᒪᐃᓐᓂᖃᖅᑎᑕᐅᑎᓪᓗᒋᑦ ᐱᓕᕆᖃᑎᖃᖅᑐᑎᑦ ᓄᓇᓕᓐᓂᑦ. ᖃᓄᖅ ᓴᖑᒍᓐᓇᖅᑭᑕ ᒫᓐᓇᐅᔪᒥᑦ ᐊᑐᖅᑕᐅᕙᑦᑐᓂᑦ ᐃᑉᐱᒍᓱᓐᓂᖃᑦᑎᐊᓂᖅᓴᒧᑦ ᐊᑐᖅᑕᐅᔪᓐᓇᖅᑐᒥᑦ?
Environment
ᖁᓛᓂ ᓄᓇᓪᓗᐊᑕᖓᓂ ᑲᓇᑕᒥ ᐱᐅᒋᔭᐅᒻᒪᕆᑦᑐᖅ ᓇᓄᕐᓄᑦ, ᑐᑦᑐᓄᑦ ᐊᒻᒪ ᐃᖃᓗᓐᓄᑦ ᓱᓕ ᐸᕕᓴᑦᑕᐅᓯᒪᖏᑦᑐᑦ ᐅᔭᕋᓐᓂᐊᓂᕐᒧᑦ. ᓄᓇᓕᒻᒥᐅᑕᐃᑦ ᑕᓗᕐᔪᐊᖅ, ᓄᓇᕗᑦ, ᑕᐃᒪᐃᖏᓐᓇᑎᑦᑎᒐᓱᐊᖅᑐᑦ.
People & Culture
ᕿᒧᒃᓯᕐᓂᖅ ᖁᑦᑎᒃᑐᒥ ᐅᖓᓯᖕᓂᖃᖅᑐᒥᒃ 500-ᑭᓛᒥᑐᓂᒃ ᑕᓱᐃᕙᓪᓕᐊᓂᖏᑦ ᐊᑐᖅᑕᐅᔪᓐᓃᓕᓚᐅᖅᑐᒥᒃ ᐃᓄᐃᑦ ᐃᓕᖅᑯᓯᒃᓴᔭᓪᓚᑦᑖᖓᓂᒃ
Places
ᐃᖅᑲᐅᒪᔭᐅᓂᖏᑦ ᓄᓇᕗᑦ ᐅᐊᑦᑎᐊᕈᖓ, ᐅᓪᓗᒥᐊᔪᖅ ᐊᒻᒪ ᓯᕗᓂᔅᓴᒥ